അംബരീഷിന്റെ പിറന്നാള്‍ ദിനത്തില്‍ ഹൃദയംതൊടുന്ന കുറിപ്പുമായി സുമലത

അംബരീഷിന്റെ വിടവാങ്ങലിന് ശേഷം സുമലത അദ്ദേഹത്തിന്റെ പാത പിന്തുടര്‍ന്ന് രാഷ്ട്രീയത്തിലേക്ക് പ്രവേശിച്ചിരുന്നു. അംബരീഷിന്റെ പിറന്നാള്‍ ദിനമായിരുന്ന ഇന്ന് പ്രിയതമനെക്കുറിച്ച് സുമലത എഴുതിയ കുറിപ്പ് ഇപ്പോള്‍ ശ്രദ്ധേയമായിരിക്കുകയാണ്.

'ആകാശത്തിന് അതിരുകളില്ല, അംബരീഷ് എന്നാല്‍ ആകാശത്തിന്റെ നാഥന്‍ എന്നാണര്‍ത്ഥം. നിങ്ങളുടെ സ്‌നേഹനിര്‍ഭരമായ ഹൃദയത്തിന് അതിരുകളില്ലായിരുന്നു. മറക്കാനാവാത്ത ഓര്‍മ്മകള്‍ സമ്മാനിച്ചാണ് നിങ്ങള്‍ ഞങ്ങളെയെല്ലാം വിട്ടുപോയത്. സന്തോഷത്തിന്റെ ഒരു ജീവിതകാലം, ഒപ്പം പരിധിയില്ലാത്ത സ്‌നേഹവും. എക്കാലത്തെയും വലിയ ഹൃദയമുള്ള മനുഷ്യന് 70 വയസ്സ് ഒരു ചെറിയ സംഖ്യയാണ്. എങ്കിലും നിങ്ങള്‍ എന്നെന്നും ജീവിക്കും. പിന്നെ എക്കാലവും പ്രായമില്ല അംബീ. എന്നേക്കും', എന്നായിരുന്നു സുമലത ഹൃദയസ്പര്‍ശിയായി കുറിച്ചത്.

അംബരീഷിന്റെയും സുമലതയുടെ നിരവധി സുഹൃത്തുക്കളും ആരാധകരും പിറന്നാള്‍ ദിനത്തില്‍ ആശംസകളും ഓര്‍മ്മപ്പൂക്കളും നേര്‍ന്ന് സോഷ്യല്‍ മീഡിയയില്‍ പോസ്റ്റുകള്‍ ഇട്ടിരുന്നു.

മകന്റെ ആദ്യസിനിമ റിലീസ് ചെയ്യുന്നതിനിടയിലായിരുന്നു അംബരീഷിന്റെ അപ്രതീക്ഷിത വിയോഗം. ഒരു റിബല്‍ ആക്ടറായാണ് സിനിമാലോകം അംബരീഷിനെ വിശേഷിപ്പിച്ചിരുന്നത്.

സിനിമയില്‍ തിളങ്ങിനിന്ന കാലത്തായിരുന്നു സുമലതയുമായുള്ള അംബരീഷിന്റെ വിവാഹം. നിരവധി പ്രതിസന്ധികളെ തരണം ചെയ്താണ് ഇരുവരും ജീവിതത്തില്‍ ഒന്നിച്ചത്. സുമലതയുമായുള്ള വിവാഹത്തിന് വീട്ടുകാരോ അടുത്ത സുഹൃത്തുക്കളോ പോലും സമ്മതിച്ചിരുന്നില്ല. അല്‍പായുസ്സുള്ള ദാമ്പത്യമായിരിക്കും ഇവരുടേതെന്നായിരുന്നു ജോത്സ്യന്മാരുടെ പ്രവചനം. പ്രതിസന്ധികളെ അവഗണിച്ച് ഇരുവരും ഒന്നിക്കുകയായിരുന്നു. പ്രവചനങ്ങളെ കാറ്റില്‍ പറത്തിയുള്ള വളരെ മനോഹരമായ ജീവിതമായിരുന്നു ഇരുവരുടേതും.