ഒടുവില്‍ 'വാരിക്കുഴിയിലെ കൊലപാതകം' സിനിമയാകുന്നു! മണിയന്‍പിള്ള രാജു മമ്മൂട്ടിയോട് പറഞ്ഞ കഥ?

വാരിക്കുഴിയിലെ കൊലപാതകം

നവാഗതനായ രജിഷ് മിഥിലയാണ് വാരിക്കുഴിയിലെ കൊലപാതകം എന്ന പേരില്‍ സിനിമ സംവിധാനം ചെയ്യുന്നത്. രജിഷ് തന്നെ രചന നിര്‍വഹിക്കുന്ന ചിത്രത്തിന്റെ ചിത്രീകരണം ആലപ്പുഴയില്‍ ആരംഭിച്ചു കഴിഞ്ഞു. അമിത് ചക്കാലയ്ക്കലാണ് ചിത്രത്തില്‍ നായകനായി എത്തുന്നത്.

നമ്പര്‍ 20 മദ്രാസ് മെയിലുമായുള്ള ബന്ധം

മോഹന്‍ലാലും മമ്മൂട്ടിയും ഒന്നിച്ചഭിനയിച്ച നമ്പര്‍ 20 മദ്രാസ് മെയിലുമായി വാരിക്കുഴിയിലെ കൊലപാതകം എന്ന ചിത്രത്തിന് ഒരു ബന്ധമുണ്ട്. മമ്മൂട്ടി എന്ന നടനായി അതിഥി വേഷത്തിലാണ് മമ്മൂട്ടി ചിത്രത്തില്‍ എത്തുന്നത്. വാരിക്കുഴിയിലെ കൊലപാതം എന്ന ചിത്രത്തിലും ഒരു സൂപ്പര്‍ താരം അതിഥി വേഷത്തില്‍ എത്തുമെന്നാണ് റിപ്പോര്‍ട്ട്.

മമ്മൂട്ടിയോട് പറഞ്ഞ കഥ

ഹിച്ച്‌കോക്ക് കഞ്ഞിക്കുഴി എന്ന മണിയന്‍പിള്ള രാജുവിന്റെ നോവലിസ്റ്റ് കഥാപാത്രം മമ്മൂട്ടിയോട് പറയുന്ന കഥയാണ് വാരിക്കുഴിയിലെ കൊലപാതകം. ട്രെയിന്‍ യാത്രക്കിടെ തങ്ങളുടെ അടുത്ത കൂപ്പയില്‍ സഹയാത്രികനായി എത്തുന്ന മമ്മൂട്ടിയോട് കഥ പറയാനും പരിചയപ്പെടാനുമാണ് മണിയന്‍പിള്ള രാജുവും ജഗദീഷും എത്തുന്നത്.

അര്‍ദ്ധരാത്രി പത്ത് മണി

ഏറെ രസകരമായ ഈ രംഗത്തില്‍ മമ്മൂട്ടിയോട് മണിയന്‍പിള്ള രാജു കഥ പറയുന്നതും ഏറെ രസകരമാണ്. അര്‍ദ്ധരാത്രി പത്ത് മണി എന്ന് പറഞ്ഞാണ് ഹിച്ച് കോക്ക് കഥ ആരംഭിക്കുന്നത്. എന്നാല്‍ തുടക്കത്തില്‍ തന്നെ മമ്മൂട്ടി ഹിച്ച് കോക്കിനെ ഒഴിവാക്കുകയും ചെയ്യുന്നു.

കഥയില്ല പേര് മാത്രം

നമ്പര്‍ 20 മദ്രാസ് മെയിലില്‍ ഹിച്ച് കോക്ക് കഥ പറയുന്നില്ല. എന്നാല്‍ വാരിക്കുഴിയിലെ കൊലപാതകം എന്ന പേര് ക്ലിക്കായി. അതുകൊണ്ട് തന്നെ ഇത് ഹിച്ച്‌കോക്ക് കഞ്ഞിക്കുഴിയുടെ കഥയല്ല. ആ പേര് മാത്രമായിരിക്കും ചിത്രത്തിലുണ്ടാകുക.

ചിറകൊടിഞ്ഞ കിനാവുകള്‍ക്ക് ശേഷം

മമ്മൂട്ടി-ശ്രീനിവാസന്‍ കോമ്പിനേഷനില്‍ കമല്‍ സംവിധാനം ചെയ്ത സിനിമയാണ് അഴകിയ രാവണന്‍. മമ്മൂട്ടിയുടെ ശങ്കര്‍ ദാസ് എന്ന നിര്‍മാതാവിനോട് കഥ പറയാന്‍ എത്തുന്ന ശ്രീനിവസന്‍ കഥാപാത്രം അംബുജാക്ഷന്‍ പറയുന്ന ചിറകൊടിഞ്ഞ കിനാവുകള്‍ എന്ന കഥ പിന്നീട് അതേ പേരില്‍ ഒരു സിനിമ സ്പൂഫ് ചിത്രമായി എത്തിയിരുന്നു.