ഹോം

വാർത്ത

ദിലീപിനെ നായകനാക്കി രാജസേനന്‍ സംവിധാനം ചെയ്യുന്ന റോമിയോയുടെ ചിത്രീകരണം നടന്നുവരുന്നതേയുള്ളൂ. അതിനിടയില്‍ തന്നെ രാജസനേനനും ദിലീപും ചേര്‍ന്നുള്ള അടുത്ത ചിത്രത്തിന്റെ പദ്ധതികള്‍ ഒരുങ്ങിക്കഴിഞ്ഞു.

റോമിയോക്കു ശേഷം ദിലീപ് വീണ്ടും അഭിനയിക്കുന്ന രാജസേനന്‍ ചിത്രമായിരിക്കും ദ ഗ്രേയ്റ്റ് ആലിബാബ. ആയിരത്തിയൊന്നു രാവുകളിലെ കഥ ആസ്പദമാക്കിയാണ് ഈ ചിത്രമൊരുക്കുന്നത്.

മിസ് ഇന്ത്യ നീഹാരിക സിംഗാണ് ചിത്രത്തിലെ നായിക. ദിലീപിന്റെ പ്രിയപ്പെട്ട തിരക്കഥാകൃത്തുക്കളായ ഉദയ് കൃഷ്ണ- സിബി കെ.തോമസ് ടീമാണ് ഈ ചിത്രത്തിനും രചന നിര്‍വഹിക്കുന്നത്.

പ്രൊജക്ടിനെ കുറിച്ച് ധാരണയായെങ്കിലും ഒരു വര്‍ഷം കഴിഞ്ഞേ ചിത്രത്തിന്റെ ഷൂട്ടിംഗ് ആരംഭിക്കുകയുള്ളൂ. 2008 ഡിസംബറിലായിരിക്കും ഈ ചിത്രത്തിന്റെ ഷൂട്ടിംഗ് തുടങ്ങുന്നത്. 2009ലെ ദിലീപിന്റെ വിഷുച്ചിത്രമായിട്ടായിരിക്കും ദ ഗ്രേയ്റ്റ് ആലിബാബ റിലീസ് ചെയ്യുന്നത്.

റാഫി മെക്കാര്‍ട്ടിന്‍ തിരക്കഥയെഴുതിയ റോമിയോയുടെ ചിത്രീകരണം നടന്നുവരികയാണ്. ഇതിനു മുമ്പ് ഡാര്‍ലിംഗ് ഡാര്‍ലിംഗാണ് ദിലീപ് മുഖ്യകഥാപാത്രത്തെ അവതരിപ്പിച്ച രാജസേനന്‍ ചിത്രം. വിനീതായിരുന്നു ചിത്രത്തിലെ മറ്റൊരു നായകന്‍.