കാസ്റ്റിംഗ് കൗച്ച് വിവാദത്തില്‍ പവന്‍ കല്ല്യാണിനെ ന്യായീകരിച്ച് അല്ലു അര്‍ജുന്‍! കാണൂ

കാസ്റ്റിംഗ് കൗച്ച് വിവാദം

സിനിമാ ലോകത്തെ ഒന്നടങ്കം ഞെട്ടിച്ചുകൊണ്ടായിരുന്നു കാസ്റ്റിംഗ് കൗച്ചിനെതിരെ വ്യത്യസ്ഥ പ്രതിഷേധവുമായി ശ്രീറെഡ്ഡി രംഗത്തെത്തിയിരുന്നത്. ടെലിവിഷനില്‍ നിന്ന് സിനിമയിലെത്തിയ നടിക്ക് നേരിടേണ്ടി വന്നതും മറ്റുളളവര്‍ നേരിട്ടതുമായ ദുരനുഭവങ്ങളെക്കുറിച്ചായിരുന്നു ശ്രീറെഡ്ഡി പ്രതിഷേധത്തിനിടയില്‍ മാധ്യമങ്ങളോട് വെളിപ്പെടുത്തിയിരുന്നത്. സിനിമയില്‍ കാസ്റ്റിംഗ് കൗച്ച് ഇല്ലെന്നു കരുതിയവരെ ഒന്നടങ്കം ഞെട്ടിച്ചുകൊണ്ടായിരുന്നു ശ്രീറെഡ്ഡി പ്രതിഷേധവുമായി എത്തിയിരുന്നത്.

നടിയുടെ പ്രതിഷേധം

തെലുങ്ക് ഫിലിം ചേംബറിന് മുന്നിലായിരുന്നു നടി പ്രതിഷേധവുമായി എത്തിയിരുന്നത്. ഫിലിം ചേംബറിനു മുന്നില്‍ ടൊപ് ലെസ് ആയാണ് ശ്രീറെഡ്ഡി കാസ്റ്റിംഗ് കൗച്ചിനെതിരെ തുറന്നടിച്ചിരുന്നത്. മാധ്യമങ്ങളെ ഒന്നടങ്കം വിളിച്ചു കൂട്ടിയതിനു ശേഷമായിരുന്നു നടിയുടെ പ്രതിഷേധം നടന്നിരുന്നത്. മാധ്യമങ്ങള്‍ വലിയ രീതിയിലായിരുന്നു നടിയുടെ പ്രതിഷേധത്തിന് പ്രാധാന്യം കൊടുത്തിരുന്നത്. എല്ലാ ചാനലുകളിലും ഈ വിഷയത്തെ മുന്‍നിര്‍ത്തിയായിരുന്നു ചര്‍ച്ചകള്‍ നടന്നിരുന്നത്. നടിയുടെ പ്രതിഷേധത്തെ അനുകൂലിച്ചും പ്രതികൂലിച്ചും നിരവധിപേരാണ് രംഗത്തെത്തിയിരുന്നത്. ചിലര്‍ പ്രശസ്തിക്കു വേണ്ടിയാണ് ശ്രീറെഡ്ഡി പ്രതിഷേധവുമായി എത്തിയതെന്ന് തുറന്നടിച്ചിരുന്നു. എന്നാല്‍ സംവിധായകനായ രംഗോപാല്‍ വര്‍മ്മയടക്കമുളളവര്‍ നടിയെ പിന്തുണച്ച് രംഗത്തെത്തിയിരുന്നു

പവന്‍ കല്ല്യാണ്‍ പറഞ്ഞത്

കാസ്റ്റിംഗ് കൗച്ച് വിവാദത്തില്‍ ശ്രീറെഡ്ഡിയെ പിന്തുണച്ച് ആദ്യം രംഗത്തെത്തിയിരുന്നത് തെലുങ്കിലെ സൂപ്പര്‍താരം പവന്‍ കല്ല്യാണായിരുന്നു. നടിയുടെ പ്രതിഷേധത്തിന് പിന്തുണയുമായെത്തിയ പവന്‍ കല്ല്യാണ്‍ പിന്നീട് തന്റെ നിലപാട് മാറ്റി രംഗത്തെത്തിയിരുന്നു. ചാനലുകള്‍ക്ക് മുന്നില്‍ സങ്കടപ്പെട്ടിട്ട് കാര്യമില്ലെന്നും ഈ വിഷയത്തില്‍ നിയമസഹായം തേടുകയാണ് വേണ്ടതെന്നും നടിയെ അറിയിച്ചിരുന്നു. എന്നാല്‍ പവന്‍ കല്ല്യാണിനെ വിമര്‍ശിച്ച് ശ്രീറെഡ്ഡി രംഗത്തെത്തിയിരുന്നു. നിങ്ങളെ അണ്ണാ എന്ന് വിളിച്ചതില്‍ ഇപ്പോള്‍ ഖേദിക്കുന്നുവെന്നും മൂന്ന് വിവാഹം കഴിച്ച നിങ്ങള്‍ക്ക് സ്ത്രീകളോട് ഒട്ടും ബഹുമാനമില്ലെന്നും ശ്രീറെഡ്ഡി പറഞ്ഞു.

പവന്‍ കല്ല്യാണിനെ ന്യായീകരിച്ച് അല്ലു അര്‍ജുന്‍

കാസ്റ്റിംഗ് കൗച്ച് വിവാദത്തില്‍ പവന്‍ കല്ല്യാണിനു നേരെ നടക്കുന്ന വ്യക്തിഹത്യക്കെതിരെ അല്ലു അര്‍ജുന്‍ രംഗത്ത് എത്തിയിരിക്കുകയാണ്. പവന്‍ കല്ല്യാണിനു നേരെ നടക്കുന്ന വ്യക്തിഹത്യ വിഷമമുണ്ടാക്കുന്നുവെന്നും ആഡംബരജീവിതത്തില്‍ നിന്ന് മാറി നാടിനെ സേവിക്കാനെത്തിയ അദ്ദേഹത്തിനു നേരെ ഇത്തരത്തില്‍ സമീപിക്കരുതെന്നും അല്ലു പറഞ്ഞു. രാഷ്ട്രീയത്തില്‍ ഇത്തരം ആക്രമണങ്ങള്‍ സാധാരണമാണെങ്കിലും സിനിമാ രംഗത്തു നിന്നും അദ്ദേഹത്തിനെതിരെ ഒരാള്‍ സംസാരിച്ചത് ശരിയായില്ലെന്നും അല്ലു പറഞ്ഞു. ചാനലുകള്‍ റേറ്റിംഗ് കൂട്ടാന്‍ വേണ്ടിയാണ് ഇത്തരം വ്യക്തിഹത്യകള്‍ നടത്തുന്നത്. പവന്‍ കല്ല്യാണിനെതിരെ പറഞ്ഞ ആളെയും അവരെ കൊണ്ട് പറയിപ്പിച്ച ആളെയും താന്‍ ശക്തമായി എതിര്‍ക്കുന്നു. ഇത്തരം രീതികള്‍ ആവര്‍ത്തിക്കരുതെന്നും ഇനി ഒരാള്‍ക്കു നേരെയും ഇങ്ങനെ ചെയ്യരുതെന്നും അല്ലു പറഞ്ഞു.