അതല്ല ഇപ്പോഴത്തെ വിഷയം! ഇത് വേറെ! അമ്മയുടെ നിര്‍ണ്ണായക യോഗത്തെക്കുറിച്ച് മോഹന്‍ലാല്‍ പറഞ്ഞത്? കാണൂ!

അമ്മയുടെ യോഗം

അപ്രതീക്ഷിതമായെത്തിയ പ്രളയക്കെടുതിയില്‍ നിന്നും കരകയറാനുള്ള തീവ്രശ്രമത്തിലാണ് നമ്മളിപ്പോള്‍. കേരളത്തെ സഹായിക്കാനുള്ള ദൗത്യത്തില്‍ സിനിമാലോകവും പങ്കുചേര്‍ന്നിരുന്നു. രക്ഷാപ്രവര്‍ത്തനത്തിനായും ക്യാംപുകളിലേക്ക് സഹായമെത്തിച്ചും താരങ്ങളും മുന്നിലുണ്ടായിരുന്നു. താരസംഘടനയായ എഎംഎംഎയുടെ നേതൃത്വത്തില്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവനയും നല്‍കിയിരുന്നു. ഇതിന് പിന്നാലെയായാണ് ധനശേഖരണത്തിനായി സ്റ്റേജ് പരിപാടി നടത്താന്‍ തീരുമാനിച്ചത്.

പ്രളയാനന്തരമുള്ള സ്റ്റേജ് ഷോ

നവകേരളനിര്‍മ്മാണം ലക്ഷ്യമാക്കി നടത്തുന്ന സ്റ്റേജ് ഷോയെക്കുറിച്ചുള്ള കാര്യങ്ങള്‍ ചര്‍ച്ച ചെയ്യുന്നതിനായാണ് കൊച്ചിയില്‍ യോഗം ചേരുന്നത്. വിദേശത്ത് വെച്ചാണ് പരിപാടി നടത്തുന്നതെന്ന് നേരത്തെ തന്നെ വ്യക്തമാക്കിയിരുന്നു. അബുദാബിയില്‍ വെച്ച് ഡിസംബര്‍ 7നാണ് പരിപാടി നടത്തുന്നത്. ഇതിന് മുന്നോടിയായുള്ള കാര്യങ്ങളാണ് യോഗത്തില്‍ ചര്‍ച്ച ചെയ്യുന്നതെന്നാണ് മോഹന്‍ലാല്‍ വ്യക്തമാക്കിയത്. അമ്മയുടെ നിര്‍ണ്ണായക യോഗത്തെക്കുറിച്ചുള്ള വിവരങ്ങളെക്കുറിച്ചുള്ള ചര്‍ച്ചകളും ഇതിനിടയില്‍ ആരംഭിച്ചിരുന്നു.

മറ്റ് വിഷയങ്ങളൊന്നുമില്ല

മറ്റ് വിഷയങ്ങളെക്കുറിച്ചുള്ള കാര്യങ്ങളൊന്നും യോഗത്തില്‍ ചര്‍ച്ചയ്ക്ക് എടുക്കില്ലെന്നുമാണ് മോഹന്‍ലാല്‍ പറഞ്ഞത്. മീ ടൂ തുറന്നുപറച്ചിലുകള്‍ നടത്തുന്നവരെ വിമര്‍ശിച്ച് രംഗത്തെത്തിയ താരത്തിന് ചുട്ട മറുപടി നല്‍കി രേവതിയും പത്മപ്രിയയും രംഗത്തെത്തിയിരുന്നു. ഇത്തരത്തില്‍ പരസ്യമായ അഭിപ്രായ പ്രകടനം നടത്തുമ്പോള്‍ ശ്രദ്ധിക്കേണ്ടതായിരുന്നുവെന്ന് സിനിമയ്ക്കകത്ത് നിന്ന് തന്നെ അടക്കം പറച്ചിലുകളുണ്ട്, എല്ലാവരും ശ്രദ്ധിക്കുന്ന വിഷയത്തെക്കുറിച്ച് സംസാരിക്കുമ്പോള്‍ പ്രസിഡന്റെന്ന നിലയില്‍ മോഹന്‍ലാല്‍ ഉത്തരവാദിത്തം കാണിക്കണമെന്നുമായിരുന്നു പലരും പറഞ്ഞത്.

നിര്‍മ്മാതാക്കളുമായുള്ള പ്രശ്‌നം പരിഹരിച്ചു

അബുദാബിയില്‍ നടക്കുന്ന പരിപാടിക്കായി താരങ്ങളെ വിട്ടുനല്‍കാനാവില്ലെന്നായിരുന്നു നിര്‍മ്മാതാക്കള്‍ വ്യക്തമാക്കിയത്. തങ്ങള്‍ക്ക് ഭീമമായ നഷ്ടം സംഭവിക്കുന്നുവെന്നുമായിരുന്നു നിര്‍മ്മാതാക്കള്‍ പറഞ്ഞത്. എന്നാല്‍ ആ പ്രശ്‌നം രമ്യമായി പരിഹരിച്ചാണ് സംഘാടകര്‍ നീങ്ങുന്നത്. മോഹന്‍ലാലിന്റെ നേതൃത്വത്തില്‍ നടത്തുന്ന പരിപാടിയുടെ ഒരുക്കങ്ങള്‍ പുരോഗമിച്ച് വരികയാണ്. നിലവിലെ തിരക്കുകള്‍ പൂര്‍ത്തിയാക്കി താരങ്ങളെല്ലാം ഷോയ്ക്കായുള്ള തയ്യാറെടുപ്പുകളിലേക്ക് കടക്കും.