കമ്മട്ടിപ്പാടത്തിന് ശേഷം ലഭിച്ച മികച്ച കഥാപാത്രമാണ് സി ഐ സതീഷ്! മനസ് തുറന്ന് അനില്‍ നെടുമങ്ങാട്‌

അയ്യപ്പന്‍ നായര്‍ക്കും കോശി കുര്യനും ഇടയില്‍ തലയുയര്‍ത്തി നിഷ്പക്ഷതയോടെ നിന്ന കഥാപാത്രമായ സി ഐ സതീഷായാണ് അനില്‍ നെടുമങ്ങാട് എത്തിയത്. കമ്മട്ടിപ്പാടത്തിലെ വില്ലന്‍ വേഷത്തിന് ശേഷം നടന് ലഭിച്ച മികച്ചൊരു വേഷം കൂടിയാണിത്. സിനിമ വിജയകരമായി മുന്നേറവെ അയ്യപ്പനും കോശിയും അനുഭവങ്ങള്‍ അനില്‍ നെടുമങ്ങാട് പങ്കുവെച്ചിരുന്നു.

മനോരമയ്ക്ക് നല്‍കിയ അഭിമുഖത്തിലാണ് നടന്‍ സംസാരിച്ചത്. കമ്മട്ടിപ്പാടത്തിന് ശേഷം ലഭിക്കുന്ന മികച്ച കഥാപാത്രമാണ് സി ഐ സതീഷെന്ന് അനില്‍ നെടുമങ്ങാട് പറയുന്നു. 75 ദിവസത്തോളം ഷൂട്ടിംഗുണ്ടായിരുന്നു. ആദ്യാവസാനമുളള മുഴുനീള കഥാപാത്രം ലഭിക്കുന്നത് ഇതാദ്യമാണ്. സംവിധായകന്റെ മനസില്‍ സതീഷ് എന്ന കഥാപാത്രം എങ്ങനെ വേണമെന്നുളള വ്യക്തമായ ധാരണയുണ്ടായിരുന്നു.

നടപ്പ്, സംസാരം, രീതികള്‍ തുടങ്ങിയ കാര്യങ്ങള്‍ അദ്ദേഹം വ്യക്തമായി പറഞ്ഞു തന്നിരുന്നു. ഞാന്‍ അത് മനസിലാക്കി ചെയ്തു എന്നു മാത്രം. വലിയ പഠനത്തിനൊന്നും പോയിട്ടില്ല. സച്ചി ചേട്ടന്റെ മനസിലുളള കഥാപാത്രത്തെ ഞാന്‍ ചെയ്തു എന്നുമാത്രം. ബിജു മേനോനും പൃഥ്വിരാജും പ്രോംപ്റ്റര്‍ ഇല്ലാതെ ഡയലോഗ് പറയുന്ന വ്യക്തികളാണ്.

ക്ലൈമാക്‌സിലെ സംഘടന രംഗങ്ങളില്‍ ഇരുവരും ഡ്യുപ്പിനെയും ഉപയോഗിച്ചിട്ടില്ല. കഥാപാത്രത്തിന് വേണ്ടി അത്രയധികം കഷ്ടപ്പെടുന്ന രണ്ടുപേര്‍ക്കൊപ്പം അഭിനയിക്കുമ്പോള്‍ ഞാന്‍ കാരണം റീടേക്ക് എടുത്ത് അവര്‍ക്ക് ബുദ്ധിമുട്ട് ഉണ്ടാക്കരുതെന്ന് ആഗ്രഹമുണ്ടായിരുന്നു. ആ ഒരു ഉത്കണ്ഠയൊഴിച്ചാല്‍ ഏറെ ആസ്വദിച്ചു ചെയ്ത കഥാപാത്രമാണ് സി ഐ സതീഷ്. അഭിമുഖത്തില്‍ അനില്‍ നെടുമങ്ങാട് വ്യക്തമാക്കി.