സീരിയല്‍ മുഷിപ്പന്‍ പരിപാടി: അനൂപ്

മിനിസ്‌ക്രീനില്‍ നിന്ന് സിനിമയിലെത്തുന്ന താരങ്ങള്‍ പിന്നീട് ഒരു മടങ്ങിപ്പോകലിനെ കുറിച്ച് ചിന്തിക്കാറില്ല. സിനിമയുടെ സുഖമറിഞ്ഞാല്‍ പിന്നെ സീരിയലിനോടും ടിവിയോടും അത്ര പ്രിയമുണ്ടാവില്ലെന്നത് സത്യം തന്നെ. നടന്‍ അനൂപ് മേനോനും വ്യത്യസ്തനല്ല.

സൂര്യ ടിവിയിലും കൈരളി ചാനലിലും അവതാരകനായി പ്രവര്‍ത്തിച്ച അനൂപ് പിന്നീട് സീരിയലുകളിലൂടെ മിനിസ്‌ക്രീനില്‍ സജീവമാവുകയായിരുന്നു. അവിടെ നിന്ന് സിനിമാരംഗത്തേയ്ക്ക് കളംമാറ്റി ചവിട്ടിയ നടന് അഭിനയത്തിന് പുറമേ തിരക്കഥാരചന, ഗാനരചന എന്നീ മേഖലകളിലും തിളങ്ങാനായി.

സിനിമയിലെത്തിപ്പെടാന്‍ തന്നെ തുണച്ചത് മിനിസ്‌ക്രീന്‍ ആണെന്ന കാര്യം അനൂപ് മറക്കുന്നില്ല. എന്നാല്‍ സീരിയലില്‍ ഒരേ കഥാപാത്രത്തെ തന്നെ അവതരിപ്പിച്ചു കൊണ്ടിരിക്കുക മുഷിപ്പന്‍ പരിപാടിയാണെന്ന് അനൂപ് പറയുന്നു. സിനിമയില്‍ നിന്ന് കൈനിറയെ ഓഫറുകള്‍ ലഭിക്കുമ്പോള്‍ വീണ്ടും സീരിയലില്‍ പോയി ബോറടിക്കേണ്ടതില്ലല്ലോ.