'കേരള പോലീസിന് അയ്യപ്പന്‍ നായരുടെ ബിഗ് സല്യൂട്ട്'! ബിജു മേനോന്റെ വീഡിയോ വൈറല്‍

കൊറോണ വൈറസിനെ പ്രതിരോധിക്കാനായി രാജ്യം മുഴുവന്‍ ആരോഗ്യ പ്രവര്‍ത്തകര്‍ക്കൊപ്പം തന്നെ ഏറെ ശ്രമകരമായ ജോലി ചെയ്യുന്നവരാണ് പോലീസുകാരും. രാപ്പകലില്ലാതെ ഇത്തരം സേവനങ്ങള്‍ ചെയ്യുന്ന പോലീസുകാരെ അഭിനന്ദിച്ചുകൊണ്ടാണ് ബിജു മേനോന്‍ എത്തിയിരിക്കുന്നത്. മൃദുഭാവത്തോടും കര്‍ത്തവ്യ ബോധത്തോടും മുന്‍ കരുതലോടും കൂടി നാടിന്റെ രക്ഷക്കായ് പണിയെടുക്കുന്ന കേരളത്തിലെ ഒരോ പോലീസുകാരനും ആരോഗ്യ പ്രവര്‍ത്തകനും അവരുടെ കൂടുംബത്തിനും എന്റെ നിസ്വാര്‍ഥമായ നന്ദി എന്ന് കുറിച്ചുകൊണ്ടാണ് പുതിയ വീഡിയോ ബിജു മേനോന്‍ പങ്കുവെച്ചിരിക്കുന്നത്.

ഒരു യാത്രയ്ക്കായുളള പാസിനായി തൃശ്ശൂര്‍ സിറ്റി പോലീസ് കമ്മീഷണര്‍ കാര്യാലയത്തില്‍ നടന്‍ എത്തുന്നതും ഇതിനിടെ തിരിച്ചറിയുന്ന പോലീസിന്റെ സേവനങ്ങളെക്കറിച്ചുമാണ് വീഡിയോയില്‍ കാണിക്കുന്നത്. ഒരു യാത്രാ പാസിനായാണ് കമ്മീഷണര്‍ ഓഫീസിലേക്ക് താന്‍ യാത്രയായതെന്ന് വീഡിയോയില്‍ ബിജു മേനോന്‍ പറയുന്നു. കുട്ടിക്കാലത്ത് വളര്‍ന്നപ്പോഴും പോലീസ് ഒരു വികാരമായിരുന്നു.

അറിയാതെ ഞാനും എന്റെ സിനിമയിലെ അയ്യപ്പന്‍ നായര്‍ എന്ന പോലീസുകാരനെ ഓര്‍ത്തുപോയി. നാടിന്റെ രക്ഷകരാകുന്ന കേരള പോലീസിന് എന്റെ ഒരു ബിഗ് സല്യൂട്ട്. വീഡിയോയില്‍ ബിജു മേനോന്‍ പറഞ്ഞു. പോലീസുകാരുടെ സേവനങ്ങള്‍ക്കുളള സല്യൂട്ട് നല്‍കിയും ലോക് ഡൗണ്‍ കാലത്ത് എല്ലാവരോടും വീട്ടിലിരിക്കാനുളള നിര്‍ദ്ദേശവും നല്‍കിയാണ് മൂന്ന് മിനിറ്റോളമുളള ബിജു മേനോന്റെ വീഡിയോ അവസാനിക്കുന്നത്. പോലീസിന്റെയും മറ്റു പ്രവര്‍ത്തകരുടെയും ആത്മസമര്‍പ്പണത്തോടെ ഈ കാലവും നമ്മള്‍ അതിജീവിക്കുമെന്ന് വീഡിയോയില്‍ ബിജു മേനോന്‍ പറഞ്ഞു.