ഹര്‍ത്താലിലും നെഗറ്റീവ് പ്രചാരണത്തിലും കുലുങ്ങാതെ ഒടിയന്‍! റിലീസ് ദിനത്തില്‍ ചിത്രം നേടിയത്? കാണൂ!

ഹര്‍ത്താല്‍ ബാധിച്ചില്ല

അവസാന നിമിഷം പ്രഖ്യാപിച്ച ഹര്‍ത്താലൊന്നും ഒടിയന്‍ മാണിക്കനെ ബാധിച്ചിരുന്നില്ല. പ്രതികൂല സാഹചര്യത്തെ അവഗണിച്ച് ജനലക്ഷങ്ങളാണ് ഒടിയനെക്കാണാനായി എത്തിയത്. സിനിമാലോകവും ആരാധകരും ഒരുപോലെ കാത്തിരുന്ന സിനിമയായിരുന്നു ഇത്. മോഹന്‍ലാല്‍ എന്ന വികാരത്തിന് മുന്നില്‍ ഹര്‍ത്താലൊന്നും വിലപ്പോയില്ലെന്നായിരുന്നു ആരാധകരും പറഞ്ഞത്. സിനിമ കാണാനായി പോവുന്നവരെ തടയില്ലെന്ന് ഹര്‍ത്താല്‍ അനുകൂലികള്‍ വ്യക്തമാക്കിയിരുന്നു. സംവിധായകനും താരങ്ങളുമൊക്കെ തിയേറ്ററുകളിലേക്കെത്തിയിരുന്നു. മലയാളത്തിന് പുറമെ തമിഴ്, തെലുങ്ക് പതിപ്പുകളും റിലീസ് ചെയ്തിരുന്നു.

അണിയറപ്രവര്‍ത്തകരുടെ ആശങ്ക

അവസാന നിമിഷം പ്രഖ്യാപിച്ച ഹര്‍ത്താല്‍ ഒടിയന് വിനയായി മാറുമോയെന്ന ആശങ്കയിലായിരുന്നു ആരാധകരും അണിയറപ്രവര്‍ത്തകര്‍. കേരളത്തിന് പുറത്തുള്ള കേന്ദ്രങ്ങളില്‍ സിനിമ റിലീസ് ചെയ്യുകയും ഇവിടെ മാറ്റി വെക്കുകയും ചെയ്താല്‍ സിനിമയുടെ വ്യാജ പതിപ്പ് പ്രചരിക്കാന്‍ സാധ്യതയുണ്ടെന്നായിരുന്നു വിലയിരുത്തല്‍. സിനിമയുടെ ക്രെഡിബിലിറ്റിയെ തകര്‍ക്കുന്ന തീരുമാനമാവും അതെന്നുമായിരുന്നു സംവിധായകന്‍ പറഞ്ഞത്. ഹര്‍ത്താല്‍ അനുകൂലികളെ കാര്യങ്ങള്‍ പറഞ്ഞ് ബോധിപ്പിച്ചിട്ടുണ്ടെന്നും സിനിമ റിലീസ് ചെയ്യുമെന്നും വ്യക്തമാക്കി സംവിധായകന്‍ രംഗത്തെത്തിയതോടെയാണ് ആശങ്കകള്‍ മാറിയത്.

തിരുവനന്തപുരത്തെ പ്രകടനം

തലസ്ഥാനനഗരിയില്‍ മികച്ച തുടക്കമാണ് ചിത്രത്തിന് ലഭിച്ചത്. അനന്തപുരിയുടെ സ്വന്തം താരമായ മോഹന്‍ലാലിന്റെ മാണിക്യന് മികച്ച സ്വീകാര്യതയായിരുന്നു ലഭിച്ചത്. 53.83 ലക്ഷം രൂപയാണ് ചിത്രം അനന്തപുരിയില്‍ നിന്നും നേടിയതെന്നുള്ള റിപ്പോര്‍ട്ടുകളാണ് പുറത്തുവന്നിട്ടുള്ളത്. ഫോറം കേരളയാണ് കലക്ഷന്‍ റിപ്പോര്‍ട്ട് പുറത്തുവിട്ടത്.

പ്രദര്‍ശനം റദ്ദാക്കി

പ്രദര്‍ശനം നടന്നുകൊണ്ടിരിക്കുന്നതിനിടയിലാണ് പ്രതിഷേധക്കാര്‍ തിയേറ്ററുകളിലേക്കെത്തിയത്. ഇതേത്തുടര്‍ന്ന് സിനിമ നിര്‍ത്തിവെച്ചതിന് പിന്നിലെ നിരാശയക്കെുറിച്ച് വ്യക്തമാക്കി ആരാധകര്‍ രംഗത്തെത്തിയിരുന്നു. പ്രതിഷേധക്കാരെ ഭയന്ന് പല സെന്ററുകളിലെയും പ്രദര്‍ശനം റദ്ദാക്കിയിരുന്നു. മുന്‍കൂട്ടി അറിയിക്കാതെ പ്രദര്‍ശനം നിര്‍ത്തിയതുമായി ബന്ധപ്പെട്ട് ആരാധകരും രോഷാകുലരായിരുന്നു.

കൊച്ചി മള്‍ട്ടിപ്ലക്‌സിലെ പ്രകടനം

കൊച്ചി മള്‍ട്ടിപ്ലക്‌സില്‍ നിന്നും ശക്തമായ പിന്തുണയാണ് ചിത്രത്തിന് ലഭിച്ചത്. ആദ്യദിനത്തില്‍ 12.66 ലക്ഷമാണ് ചിത്രം സ്വന്തമാക്കിയത്. 99.85 ആയിരുന്നു ഒക്യുപെന്‍സി. ഹര്‍ത്താലിനെത്തുടര്‍ന്ന് ചില സെന്ററുകളിലെ പ്രദര്‍ശനം മാറ്റി വെച്ചിരുന്നു. കേരളത്തില്‍ നിന്നും മികച്ച കലക്ഷന്‍ തന്നെ സിനിമ സ്വന്തമാക്കിയെന്നുള്ള റിപ്പോര്‍ട്ടുകളാണ് പുറത്തുവന്നിട്ടുള്ളത്.

ആദ്യദിന കലക്ഷനില്‍ മുന്നില്‍

മാണിക്യന്റെ വരവോട് കൂടി ബോക്‌സോഫീസിലെ പല റെക്കോര്‍ഡുകളും തകരുമെന്ന് ആരാധകര്‍ നേരത്തെ വിലയിരുത്തിയിരുന്നു. റോഷ്ന്‍ ആന്‍ഡ്രൂസ് നിവിന്‍ പോളി കൂട്ടുകെട്ടിലെത്തിയ സിനിമയുടെ കലക്ഷന്‍ തകരുമോയെന്നായിരുന്നു പലരും ചോദിച്ചത്. ആദ്യ ദിന കലക്ഷനില്‍ ഒന്നാം സ്ഥാനത്തായിരിക്കുകയാണ് ഒടിയനെന്നും ഫോറം കേരള റിപ്പോര്‍ട്ട് ചെയ്തിട്ടുണ്ട്.

ബോക്‌സോഫീസിലെ റെക്കോര്‍ഡ്

ഹര്‍ത്താലും നെഗറ്റീവ് പ്രചാരണങ്ങളും അരങ്ങുതകര്‍ക്കുന്നതിനിടയിലും ബോക്‌സോഫീസ് റെക്കോര്‍ഡുകള്‍ ഒടിയനായി വഴിമാറുന്ന കാഴ്ചകളാണ് ഇപ്പോള്‍ കണ്ടുകൊണ്ടിരിക്കുന്നത്. മോഹന്‍ലാല്‍ എന്ന താരത്തോടും അദ്ദേഹത്തിന്റെ അഭിനയമികവിനുള്ള പിന്തുണയാണ് ഇതെന്നാണ് ആരാധകര്‍ പറയുന്നത്. കേരളത്തില്‍ നിന്നും സിനിമ 7.22 കോടിയാണ് ആദ്യ ദിനത്തില്‍ സ്വന്തമാക്കിയതെന്നും ഫോറം കേരള റിപ്പോര്‍ട്ട് ചെയ്തിട്ടുണ്ട്.

ഫേസ്ബുക്ക് പോസ്റ്റ് കാണാം

ഒടിയന്‍ ഫേസ്ബുക്ക് പേജിലെ പോസ്റ്റ് കാണാം.