രണ്ടാമൂഴം വിവാദം! ഒരു വിട്ടുവീഴ്ചയ്ക്കും തയ്യാറല്ലെന്ന് എംടി! കേസ് പരിഗണിക്കുന്നത് 13ലേക്ക് മാറ്റി

നിലപാടില്‍ ഉറച്ച് എംടി

ചിത്രത്തില്‍ നിന്നും പിന്മാറുന്നതായും തിരക്കഥ തിരികെ ലഭിക്കണമെന്നുമുളള നിലപാടില്‍ ഉറച്ചുനില്‍ക്കുകയാണ് എംടി വാസുദേവന്‍ നായര്‍. കേസില്‍ മധ്യസ്ഥ ചര്‍ച്ചയ്ക്കില്ലെന്ന് എംടിയുടെ അഭിഭാഷകന്‍ ഇന്ന് കോടതിയെ അറിയിച്ചിരുന്നു. ബുധനാഴ്ച കേസ് വീണ്ടും പരിഗണിച്ചപ്പോഴാണ് എംടിയുടെ അഭിഭാഷകന്‍ വീണ്ടും ഇക്കാര്യം അറിയിച്ചിരുന്നത്. കോഴിക്കോട് ഒന്നാം ക്ലാസ് അഡീഷണല്‍ മുന്‍സിഫ് മജിസ്‌ട്രേറ്റ് കോടതി ആയിരുന്നു കേസ് പരിഗണിച്ചിരുന്നത്.

അഭിഭാഷകന്‍ പറഞ്ഞത്

എംടിയുടെ കേസ് പരിഗണിക്കുന്നത് നവംബര്‍ 13ാം തിയ്യതിയിലേക്കാണ് കോടതി മാറ്റിവെച്ചിരിക്കുന്നത്. സിനിമയുമായി ബന്ധപ്പെട്ട് തിരക്കഥ നല്‍കിയതല്ലാതെ ഒരു കാര്യവും മുന്നോട്ട് പോയിട്ടില്ലെന്നും അതുകൊണ്ട് മധ്യസ്ഥ ചര്‍ച്ചയുടെ സാഹചര്യം നിലനില്‍ക്കുന്നതല്ല എന്നും അഭിഭാഷകന്‍ കോടതിയെ അറിയിച്ചിട്ടുണ്ട്. നേരത്തെ വിഎ ശ്രീകുമാര്‍ മേനോന്‍ എംടിയുമായുളള കേസില്‍ മധ്യസ്ഥനെ വെക്കണമെന്ന് കോടതിയോട് ആവശ്യപ്പെട്ടിരുന്നു. സിനിമയുമായുളള പ്രാരംഭ പ്രവര്‍ത്തനങ്ങള്‍ നടക്കുകയാണെന്നും കേസ് വേഗം തീരണമെന്ന് ആഗ്രഹമുണ്ടെന്നും അതുകൊണ്ട് ചര്‍ച്ചയ്ക്കായി മധ്യസ്ഥനെ വെക്കണമെന്നുമായിരുന്നു ശ്രീകുമാര്‍ മേനോന്‍ ആവശ്യപ്പെട്ടത്. ഇതേതുടര്‍ന്നായിരുന്നു ബുധനാഴ്ച കോടതി വീണ്ടും വാദം കേട്ടിരുന്നത്.

നാലു വര്‍ഷമായിട്ടും നടന്നില്ല

രണ്ടാമൂഴത്തിന്റെ ചിത്രീകരണം വൈകുന്നതുമായി ബന്ധപ്പെട്ട് ഒക്ടോബര്‍ 11നായിരുന്നു എംടിയുടെ പ്രതികരണം എത്തിയിരുന്നത്. മൂന്നുവര്‍ഷം കൊണ്ട് സിനിമാ നിര്‍മ്മിക്കാമെന്ന് കരാറുണ്ടെങ്കിയെങ്കിലും നാലു വര്‍ഷമായിട്ടും ഒന്നും നടക്കുന്നില്ലെന്ന് എംടി പറഞ്ഞിരുന്നു. തുടര്‍ന്ന് ചിത്രത്തില്‍ നിന്ന് പിന്‍മാറുന്നതായി പരസ്യ പ്രസ്താവന നടത്തുകയായിരുന്നു എംടി. ഇതിന്റെ പശ്ചാത്തലത്തില്‍ കോഴിക്കോട് മുന്‍സിഫ് കോടതിയില്‍ തടസ്സ ഹര്‍ജി നല്‍കിയതായും അദ്ദേഹം അറിയിച്ചു.

ശ്രീകുമാര്‍ മേനോന്‍റെ ശ്രമങ്ങള്‍

ഇതിനു പിന്നാലെയാണ് എംടിയെ കാണാന്‍ ശ്രീകുമാര്‍ മേനോന്‍ എത്തിയിരുന്നത്. അനുരഞ്ജന ശ്രമവുമായി ശ്രീകുമാര്‍ മേനോന്‍ എത്തിയെങ്കിലും എംടി അതിന് വഴങ്ങിയില്ലായിരുന്നു. കരാര്‍ കാലാവധി കഴിഞ്ഞതും സിനിമ വൈകിയതുമായിരുന്നു അദ്ദേഹത്തെ ചൊടിപ്പിച്ചിരുന്നത്. തുടര്‍ന്ന് കോടതി സംവിധായകന്‍ ശ്രീകുമാര്‍ മേനോനെയും നിര്‍മ്മാണ കമ്പനിയായ എയര്‍ ആന്‍ഡ് എര്‍ത്ത് ഫിലിംസിനെയും താല്‍ക്കാലികമായി വിലക്കിയിരുന്നു.