എന്തിനാണ് ഈ വാശി! ഇതൊക്കെ കാണുമ്പോള്‍ വിഷമം തോന്നുന്നു! ശബരിമല വിഷയത്തില്‍ ദേവി അജിത്ത്

ദേവി അജിത്ത് പറഞ്ഞത്

തിരുവന്തപുരത്താണ് എന്റെ വീട്. വീടിനടുത്തുളള അമ്പലങ്ങളിലെല്ലാം ഞാന്‍ പോകാറുണ്ട്. ഷൂട്ടിംഗ് ഇല്ലാത്ത ദിവസങ്ങളില്‍ മിക്കപ്പോഴും തന്നെ പോകും. കുട്ടിക്കാലം മുതലെ അങ്ങനെ തന്നെയാണ് തുടരുന്നത്. ദൈവം ഉണ്ടെന്നു തന്നെ ഞാന്‍ വിശ്വസിക്കുന്നു. വിഷമഘട്ടങ്ങളില്‍ ദൈവം തന്നെയാണ് എന്നെ സഹായിച്ചിട്ടുളളത്. അതുകൊണ്ട് തന്നെ ഞാനൊരു ഭക്തയാണ്. അമ്പലങ്ങളില്‍ വെറുതെ പോകുന്നവര്‍ ഉണ്ടോ എന്നെനിക്കറിയില്ല. ഞാന്‍ പറഞ്ഞുവരുന്നത് ഭക്തിയുടെ കാര്യമാണ്. ശബരിമലയില്‍ പോയിട്ടുണ്ടെന്നും അതിന് ഭാഗ്യം കിട്ടിയ കുട്ടിയാണ് താനെന്നും ദേവി അജിത്ത് പറയുന്നു.

അയ്യപ്പന്റെ മുന്നില്‍ നില്‍ക്കുമ്പോഴുളള അനുഭൂതി

നാലാം ക്ലാസില്‍ പഠിക്കുന്ന സമയത്തായിരുന്നു ശബരിമലയില്‍ പോയത്. അയ്യപ്പന്റെ മുന്നില്‍ നില്‍ക്കുമ്പോള്‍ നമ്മുക്ക് കിട്ടുന്ന അനുഭൂതി എല്ലാവരും പറയുന്നതു പോലെ കാണേണ്ട കാഴ്ച തന്നെയാണ്. അവിടെ നിന്നും വരാന്‍ പോലും തോന്നില്ല. ശബരിമല ക്ഷേത്രവുമായി ബന്ധപ്പെട്ട് എന്തുക്കൊണ്ടാണ് ഒരു നിയമം ഉണ്ടാക്കിയിട്ടുളളതെന്ന് നമ്മുക്ക് എല്ലാവര്‍ക്കും അറിയാം. അതില്‍ എന്തിനാണ് ഇത്ര വാശി കാണിക്കുന്നത്. നിങ്ങള്‍ക്ക് അയ്യപ്പനെ കാണണമെങ്കില്‍ അടുത്തുളള അമ്പലങ്ങളില്‍ പോകാമല്ലോ,ദേവി അജിത്ത് പറയുന്നു.

അതിന് ആരും തടസം നില്‍ക്കുന്നില്ല.

അല്ലെങ്കില്‍ ആ പ്രായം വരുമ്പോള്‍ നിങ്ങള്‍ക്ക് പോകാമല്ലോ. അതിന് ആരും തടസം നില്‍ക്കുന്നില്ല. എന്നാല് ഇപ്പോള്‍ തന്നെ പോകണമെന്നത് ഭക്തിയുടെ മാര്‍ഗമാണെന്ന് എനിക്ക് തോന്നുന്നില്ല. ഭക്തി മാര്‍ഗമാണെങ്കില്‍ ഇവിടെ മറ്റ് അമ്പലങ്ങളുണ്ട്. എല്ലാ ദൈവങ്ങളും ഒന്നല്ലേ. ഇവിടെ നിന്നും വിളിച്ചാലും അയ്യപ്പന്‍ വിളി കേള്‍ക്കും. ഭംഗി കാണാനാണോ അവിടെ പോകുന്നത്. ശുദ്ധമായ സ്ഥലമാണത്.

അതൊരു പുണ്യകര്‍മമാണ്

ശബരിമലയില്‍ പോകുന്ന ഓരോരുത്തരും അയ്യപ്പന്മാരായാണ് പോകുന്നത്. വൃതമെടുത്ത് വൃത്തിയിലും വെടുപ്പിലുമാണ് അവര്‍ പോകുന്നത്. കഴിക്കുന്നതില്‍ പോലും ശ്രദ്ധിച്ചും പ്രാര്‍ത്ഥനാനുഭൂതിയിലുമാണ് അവര്‍ എത്തുന്നത്. അതൊരു പുണ്യകര്‍മമാണ്.ഇത് സ്ത്രീകള്‍ക്ക് സാധിക്കില്ലെന്നത് എന്നെ പോലെ തന്നെ മറ്റുളളവര്‍ക്കും അറിയാവുന്ന കാര്യമാണ്. അങ്ങനെ പോകാന്‍ കഴിയാത്ത സ്ഥലത്തേക്ക് എന്തിനാണ് ഇത്രയും വാശികാണിച്ച് പോകണം എന്നു പറയുന്നത്.

ഓരോരുത്തരും അത് വേണ്ടെന്നു വെയ്ക്കണം

എന്നോട് നിങ്ങള്‍ ദേഷ്യപ്പെടുമായിരിക്കും. എന്നാല്‍ അതിനോട് യോജിക്കാന്‍ കഴിയില്ല. അതില്‍ വേദനയുണ്ട്. ഇതല്ല ശരിയായ മാര്‍ഗം നമ്മുടെ നാട്ടില്‍ സ്ത്രീകള്‍ക്ക് ശബരിമലയില്‍ കയറാന്‍ കഴിയാത്തതിലാണോ വലിയ പ്രശ്‌നം. മറ്റ് എന്തെല്ലാം പ്രശ്‌നങ്ങള്‍ ഇവിടെ നടക്കുന്നുണ്ട്. എത്ര ചാരിറ്റി പ്രവര്‍ത്തനങ്ങള്‍ ഇവിടെ ചെയ്യാം. ഫെമിനിസമാണോ, എന്തിനാണ് ഈ കടും പിടിത്തം. ഓരോരുത്തരും അത് വേണ്ടെന്നു വെയ്ക്കണം. ദേവി അജിത്ത് ഫേസ്ബുക്ക് ലൈവില്‍ പറഞ്ഞു.

വീഡിയോ കാണൂ