കലാഭവന്‍ മണിയുടെ പിന്നിലായി നിന്ന ആ പയ്യന്‍, ജയസൂര്യയുടെ പഴയകാല ചിത്രവുമായി രഞ്ജിത്ത് ശങ്കര്‍

ഇപ്പോള്‍ രഞ്ജിത്ത് ശങ്കര്‍ പങ്കുവെച്ച ജയസൂര്യയുടെ ഒരു ചിത്രം സോഷ്യല്‍ മീഡിയയില്‍ വൈറലാവുകയാണ്. ജയസൂര്യയുടെ ഒരു പഴയകാല ചിത്രത്തിന് സംവിധായകന്‍ കുറിച്ച ക്യാപ്ഷനും ശ്രദ്ധേയമായി. അഞ്ചരക്കല്യാണം സിനിമയുടെ ലൊക്കേഷനില്‍ സ്‌ക്രിപ്റ്റ് വായിക്കുന്ന കലാഭവന്‍ മണിയെ നോക്കിനില്‍ക്കുന്ന ജയസൂര്യയുടെ ഒരു ചിത്രമാണ് വന്നത്. അണിയറക്കാരുടെ സമീപം നിന്ന് കലാഭവന്‍ മണി സ്‌ക്രിപ്റ്റ് വായിക്കവേ പുറകിലായിട്ടാണ് ജയസൂര്യ നില്‍ക്കുന്നത്.

'ഒരിക്കലും പ്രതീക്ഷ കൈവിടാതെ പരിശ്രമിച്ചുകൊണ്ടിരിക്കുന്ന ഒരാളെ തോല്‍പ്പിക്കുക പ്രയാസമാണ്' എന്ന അടിക്കുറിപ്പോടെയാണ് രഞ്ജിത്ത് ശങ്കര്‍ ജയസൂര്യയുടെ ചിത്രം പോസ്റ്റ് ചെയ്തത്. 1997ലാണ് വിഎം വിനു സംവിധാനം ചെയ്ത അഞ്ചരക്കല്യാണം പുറത്തിറങ്ങിയത്. ജഗദീഷ്, കലാഭവന്‍ മണി, ജനാര്‍ദ്ദനന്‍, കല്‍പ്പന, മാള അരവിന്ദന്‍, സലീംകുമാര്‍, കനകലത ഉള്‍പ്പടെയുളള താരങ്ങളാണ് പ്രധാന വേഷങ്ങളിലെത്തിയത്.

അതേസമയം ജയസൂര്യയുടെ കരിയറില്‍ മികച്ച സിനിമകള്‍ നടന് സമ്മാനിച്ച സംവിധായകനാണ് രഞ്ജിത്ത് ശങ്കര്‍. പുണ്യാളന്‍ അഗര്‍ബത്തീസ് എന്ന സൂപ്പര്‍ ഹിറ്റ് ചിത്രത്തിലൂടെയാണ് ഈ കൂട്ടുകെട്ട് മലയാളത്തില്‍ തുടങ്ങിയത്. ചിത്രത്തിലെ ജോയ് താക്കോല്‍ക്കാരന്‍ എന്ന കഥാപാത്രം ജയസൂര്യയുടെതായി ഏറെ ശ്രദ്ധിക്കപ്പെട്ടു.

പിന്നാലെ സുസു സുധീ വാത്മീകം, പ്രേതം, പുണ്യാളന്‍ പ്രൈവറ്റ് ലിമിറ്റഡ്, ഞാന്‍ മേരിക്കുട്ടി, പ്രേതം 2 എന്നീ സിനിമകളും ജയസൂര്യ-രഞ്ജിത്ത് ശങ്കര്‍ കൂട്ടുകെട്ടില്‍ മലയാളത്തില്‍ പുറത്തിറങ്ങി. അതേസമയം അണിയറയില്‍ ഒരുങ്ങുന്ന പുതിയ സിനിമയും ജയസൂര്യയെ നായകനാക്കി കൊണ്ടാണ് രഞ്ജിത്ത് ശങ്കര്‍ ഒരുക്കുന്നത്. സണ്ണി എന്ന ചിത്രമാണ് ഈ കൂട്ടൂകെട്ടില്‍ ഒരുങ്ങുന്ന പുതിയ സിനിമ.

Recommended Video

Jayasurya's journey so far

സിനിമയുടെ ടീസര്‍ മുന്‍പ് സോഷ്യല്‍ മീഡിയയില്‍ പുറത്തിറങ്ങിയിരുന്നു. കോവിഡ് മാനദണ്ഡങ്ങള്‍ പാലിച്ച് ഒരുക്കിയ സിനിമയാണ് സണ്ണി. ജയസൂര്യയുടെതായി ഇതുവരെ കാണാത്ത തരത്തിലുളള കഥാപാത്രമായിരിക്കും ചിത്രത്തിലേത് എന്നാണ് റിപ്പോര്‍ട്ടുകള്‍. സണ്ണിക്ക് പുറമെ, ആട് 3, രാമസേതു, ജോണ്‍ ലൂഥര്‍, കത്തനാര്‍, മേരി ആവാസ് സുനോ, ഉള്‍പ്പെടെയുളളവയും ജയസൂര്യയുടെതായി ആരാധകര്‍ ഒന്നടങ്കം ആകാംക്ഷകളോടെ കാത്തിരിക്കുന്ന ചിത്രങ്ങളാണ്.