താടിയും മുടിയും നീട്ടി വളർത്തി പൃഥ്വി! ഈ ലുക്ക് വെറുതെയല്ല, സസ്പെൻസ് പൊളിച്ച് രഞ്ജിത്ത്

നായകനോ വില്ലനോ ഇല്ലാത്ത രണ്ട് പച്ചയായ ജീവിതങ്ങളിലൂടെ സഞ്ചരിക്കുന്ന ചിത്രമാണ് അയ്യപ്പനും കോശിയും. അയ്യപ്പൻ എന്ന കഥാപാത്രമായി ബിജു മേനോൻ എത്തുമ്പോൾ കോശിയാകുന്നത് പൃഥ്വിരാജാണ്. അട്ടപ്പാടിയിലെ ഒരു പോലീസ് സ്റ്റേഷനിലെ എസ്ഐ ആണ് അയ്യപ്പൻ. 16 വർഷത്തെ സർവീസിന് ശേഷം പട്ടാളത്തിൽവിരമിച്ച വ്യക്തിയാണ് കോശി. ഇവർ തമ്മിലുള്ള പ്രശ്നങ്ങളിലൂടെയാണ് ചിത്രം സഞ്ചരിക്കുന്നത്.

കഥാപാത്രത്തിന് വേണ്ടി എന്ത് റിസ്ക്ക് എടുക്കാനും തയ്യാറാകുന്ന നടനാണ് പൃഥ്വി. ക്ലാസ് ടിപ്പ് ടേപ്പ് ലുക്കിലാണ് താരത്തെ അധികവും കാണുന്നത്. എന്നാൽ ഇപ്പോൾ സോഷ്യൽ മീഡിയയിലും സിനിമ കോളങ്ങളിലും ചർച്ചയാകുന്നത് പൃഥ്വിരാജിന്റെ താടി വെച്ച ലുക്കിനെ കുറിച്ചാണ്. താടിയിൽ സിനിമയിൽ പ്രത്യക്ഷപ്പെടുന്നുണ്ടെങ്കിലും നീട്ടിവളർത്തിയ താടിയുമായി താരം അധികം പൊതുവേദിയിൽ പ്രത്യക്ഷപ്പെടാറില്ല. എന്നാൽ ഇത്തവണ പതിവിലും വിപരീതമായി താടിയും മുടിയും നീട്ടി വളർത്തിയ ഗെറ്റപ്പിലാണ് പ്രസ്മീറ്റിൽ താരം എത്തിയത്.

മാധ്യമ പ്രവർത്തകരുടെ ചോദ്യത്തിന് വളരെ രസകരമായിട്ടായിരുന്നു പൃഥ്വി മറുപടി നൽകിയത്. താടി ലുക്ക് മറ്റേതെങ്കിലും ചിത്രത്തിനു വേണ്ടിയാണോ എന്നായിരുന്നു മാധ്യമപ്രവർത്തകന്റെ സംശയം. ഇപ്പോൾ തനിക്ക് സിനിമയൊന്നുമില്ലെന്നും അതുകൊണ്ടാണ് ഈ ലുക്ക് വച്ച് നടക്കുന്നതെന്നായിരുന്നു പൃഥ്വിരാജ് പറഞ്ഞത്. എന്നാൽ പൃഥ്വി പറഞ്ഞ് അവസാനിപ്പിക്കുന്നതിന് മുൻപ് മൈക്ക് രഞ്ജിത്ത് പിടിച്ച് വാങ്ങിയതിന് ശേഷം ആ സസ്പെൻസ് പരസ്യമാക്കുകയായിരുന്നു.

അവൻ നിങ്ങളോട് നുണ പറയുന്നതാണ്, ആട് ജീവിതത്തിലേയ്ക്ക് ഒരുങ്ങുകയാണ് പൃഥ്വി രഞ്ജിത്ത് പറഞ്ഞു. അതും ശരീരം കൊണ്ട്. ബെന്യാമിന്റെ നോവൽ ബ്ലെസിയെന്ന മിടുക്കനായ സംവിധായകൻ സിനിമയാക്കുന്നു. ഒരു ഷെഡ്യൂൾ ഷൂട്ട് കഴിഞ്ഞു.ഇനി ഇവൻ മെലിഞ്ഞ് വളർന്ന താടിയൊക്കെയായി മരുഭൂമിയിൽ ആടുകൾക്കൊപ്പം ജീവിക്കാൻ പോകുകയാണ്.'-രഞ്ജിത്ത് കൂട്ടുിച്ചേർത്തു.