പൂമരത്തിലെ തന്‍റെ കഥാപാത്രത്തെക്കുറിച്ചോര്‍ത്ത് അച്ഛനും അമ്മയും ടെന്‍ഷനടിച്ചിരുന്നുവെന്ന് കാളിദാസ്!

അച്ഛനും അമ്മയ്ക്കും ടെന്‍ഷനായിരുന്നു

കലാലയ പശ്ചാത്തലത്തിലുള്ള ചിത്രമാണ് പൂമരമെന്നും കലോത്സവത്തെക്കുറിച്ചുള്ള രസകരമായ കാര്യങ്ങളെക്കുറിച്ച് ചിത്രം പറയുന്നുണ്ടെന്നുമറിഞ്ഞപ്പോള്‍ അവര്‍ ആകെ ടെന്‍ഷനിലായിരുന്നുവെന്നും താരപുത്രന്‍ പറയുന്നു. ഓണ്‍ മനോരമയ്ക്ക് നല്‍കിയ അഭിമുഖത്തിനിടയിലാണ് താരപുത്രന്‍ പൂമരത്തെക്കുറിച്ചുള്ള കൂടുതല്‍ വിശേഷങ്ങള്‍ പങ്കുവെച്ചത്. യുവജനോത്സവത്തില്‍ പങ്കെടുത്ത അനുഭവങ്ങളൊന്നും തനിക്കില്ലെന്ന് അവര്‍ക്ക് കൃത്യമായി അറിയാം. തന്നെയമുല്ല അത്തരം മത്സരങ്ങളില്‍ നിന്നൊക്കെ പരമാവധി അകലം പാലിക്കുന്നയാളാണ് താന്‍. അത്തരത്തിലുള്ള താന്‍ എങ്ങനെ ഈ കഥാപാത്രമായി മാറുമെന്നുള്ള ആശങ്കയായിരുന്നു അവരെ അലട്ടിയിരുന്നത്.

മാളവിക കണ്ടിട്ടില്ല

ഉപരി പഠനവുമായി ബന്ധപ്പെട്ട് വിദേശത്തായതിനാല്‍ സഹോദരി മാളവികയ്ക്ക് ഇതുവരെ സിനിമ കാണാന്‍ പറ്റിയിട്ടില്ല. അച്ഛനും അമ്മയും സിനിമയില്‍ മുഴുകിയാണ് കണ്ടത്. കണ്ണ് നിറഞ്ഞൊഴുകിയാണ് തിയേറ്ററുകളില്‍ നിന്നും ഇറങ്ങിയതെന്ന് പാര്‍വതിയും വ്യക്തമാക്കിയിരുന്നു. കലോത്സവ കാലത്തെ അനുസ്മരിപ്പിക്കുന്ന ചിത്രത്തിന് ഗംഭീര പ്രതികരണമാണ് ലഭിച്ചത്. ചിത്രത്തിലെ ഗാനങ്ങള്‍ നേരത്തെ തന്നെ വൈറലായിരുന്നു. ഞാനും ഞാനുമെന്റാളും എന്ന ഗാനം ആദ്യം പുറത്തുവിട്ടിരുന്നു. പിന്നീട് കടവത്തൊരു തോണിയെന്ന ഗാനവും പുറത്തുവിട്ടിരുന്നു. സിനിമ റിലീസ് ചെയ്യുന്നതിന് മുന്‍പേ തന്നെ ഗാനത്തെ പ്രേക്ഷകര്‍ നെഞ്ചേറ്റിയിരുന്നു.

അടിക്കടി റിലീസ് മാറ്റിയപ്പോള്‍

ഇത്രയധികം തവണ റിലീസ് മാറ്റിവെച്ച മറ്റൊരു ചിത്രമുണ്ടാവുമോയെന്ന സംശയത്തിലാണ് ട്രോളര്‍മാര്‍. സാങ്കേതിക പ്രശ്‌നവും മറ്റ് വിഷയങ്ങളും കാരണം റിലീസ് മാറ്റുമ്പോള്‍ ട്രോളര്‍മാരും ഈ സിനിമയെ വിടാതെ പിന്തുടരുകയായിരുന്നു. ഈ മരം എന്നെങ്കിലും പൂക്കുമോയെന്ന തരത്തില്‍ വരെ ചോദ്യങ്ങള്‍ ഉയര്‍ന്നിരുന്നു. എന്നാല്‍ സിനിമ റിലീസ് ചെയ്തപ്പോള്‍ ട്രോളിയതിന് ട്രോളര്‍മാര്‍ മാപ്പ് പറയുകയും ചെയ്തിരുന്നു. ക്ഷമ പറഞ്ഞവര്‍ക്ക് മറുപടി നല്‍കി കാളിദാസും രംഗത്തെത്തിയിരുന്നു. സിനിമയെ ഇത്രയധികം വൈറലാക്കിയത് ട്രോളര്‍മാരാണെന്ന് താരം തുറന്ന് സമ്മതിച്ചിരുന്നു. റിലീസ് വൈകിയതായി തോന്നിയതിന് പിന്നിലും ട്രോളര്‍മാരാണെന്ന് അണിയറപ്രവര്‍ത്തകരും വ്യക്തമാക്കിയിരുന്നു.

താരപദവിയില്‍ താല്‍പര്യമില്ല

ജനനം മുതല്‍ത്തന്നെ സെലിബ്രിറ്റികളായി മാറുന്നവരാണ് താരങ്ങളുടെ മക്കള്‍. സിനിമയില്‍ പ്രവേശിച്ചില്ലെങ്കില്‍ക്കൂടി അവരെന്നും സെലിബ്രിറ്റികളാണ്. എന്നാല്‍ ഇത്തരത്തിലുള്ള പദവി ശരിക്കും വലിയൊരു ഉത്തരവാദിത്തമാണ് നല്‍കുന്നത്. പോസറ്റീവിനേക്കാള്‍ നെഗറ്റീവ് സംഭവമാണ് ഇതിലുള്ളത്. സാധാരണ കുട്ടികളായി വിശേഷിപ്പിക്കുന്നതിനോടാണ് തനിക്ക് താല്‍പര്യമെന്നും കാളിദാസ് പറയുന്നു. സിനിമയിലെത്തുന്ന പുതുമുഖ താരമെന്ന തരത്തിലുള്ള പരിഗണനയാണ് താന്‍ ആഗ്രഹിച്ചിരുന്നതെന്നും താരപുത്രന്‍ വ്യക്തമാക്കുന്നു. പൂമരത്തിന് ശേഷം അല്‍ഫോന്‍സ് പുത്രന്‍ സംവിധാനം ചെയ്യുന്ന ചിത്രത്തിലാണ് കാളിദാസ് അഭിനയിക്കുന്നത്.