നസ്രിയ വിളിക്കാറുളളത് ലക്കി അലി എന്നാണ്, സിനിമകളുടെ വിജയത്തെ കുറിച്ച് ഫഹദ് ഫാസില്‍

എന്റെ ഭാര്യ എന്നെ വിളിയ്ക്കുന്നത് ലക്കി അലി എന്നാണ് എന്ന് ഫഹദ് പറയുന്നു. പലപ്പോഴും സിനിമ വിജയിക്കുന്നത് ഭാഗ്യം കൊണ്ടു മാത്രമാണ്. സത്യത്തില്‍ ഞാന്‍ ഭാഗ്യവാനാണ്. ശരിയായ സമയത്ത് ശരിയായ സ്ഥലത്ത് എത്തുകയാണ് ഉണ്ടായത്. മാജിക്കോ റോക്കറ്റ് ശാസ്ത്രമോ ഒന്നുമല്ല. സംഭവിച്ചുപോവുന്നതാണെന്നും നടന്‍ പറഞ്ഞു.

സിനിമകള്‍ തിരഞ്ഞെടുക്കുന്നതിനെ കുറിച്ചും അഭിമുഖത്തില്‍ ഫഹദ് പറഞ്ഞു. എന്നോട് കഥ പറയുന്നതിനെ ആശ്രയിച്ചിരിക്കും ഞാന്‍ ചെയ്യുന്ന സിനിമകളെന്ന് നടന്‍ പറയുന്നു. ആവര്‍ത്തന വിരസത തോന്നിയാല്‍ ഞാനൊരു കഥയും കേള്‍ക്കില്ല. വളരെ പുതുമയോടെ എന്നോട് സിനിമയുടെ കഥ പറയുമ്പോഴാണ് ഞാന്‍ ആ ചിത്രം ചെയ്യാന്‍ തീരുമാനിക്കുന്നത്.

റീമേക്ക് ചിത്രങ്ങളാണെങ്കിലും കഥ പുതുമയോടെ പറഞ്ഞ് കേള്‍പ്പിച്ചാല്‍ ചെയ്യാന്‍ താല്‍പര്യം തോന്നുമെന്നും ഫഹദ് പറഞ്ഞു. ഒരോ കഥ തന്നെ വ്യത്യസ്ത രീതിയില്‍ പറയുന്നത് കേള്‍ക്കാനും ഇഷ്ടമാണ്. ഫഹദ് സിനിമകള്‍ എല്ലാം വിജയിക്കുന്നതില്‍ എന്തോ ഒരു മാജിക്ക് ഉണ്ടെന്ന് വിശ്വസിക്കുന്നവരുണ്ട്, എന്നാല്‍ അതിലൊരു മാന്ത്രികതയും ഇല്ലെന്നും അഭിമുഖത്തില്‍ നടന്‍ പറഞ്ഞു.

അതേസമയം ജോജി, ഇരുള്‍ തുടങ്ങിയവയാണ് ഫഹദ് ഫാസിലിന്‌റെതായി ഒടുവില്‍ പുറത്തിറങ്ങിയ സിനിമകള്‍. ഒടിടി വഴിയാണ് രണ്ട് ചിത്രങ്ങളും റിലീസ് ചെയ്തത്. മലയാളത്തിന് പുറമെ തമിഴിലും രണ്ട് സിനിമകള്‍ ചെയ്തിരുന്നു താരം. വേലൈക്കാരന്‍, സൂപ്പര്‍ ഡീലക്‌സ് തുടങ്ങിയവയാണ് ഫഹദ് തമിഴില്‍ അഭിനയിച്ച സിനിമകള്‍.

Recommended Video

Fahad Fazil to play the villain in Kamal Haasan's upcoming movie 'Vikram'? | FilmiBeat Malayalam

ഇപ്പോള്‍ ആദ്യ തെലുങ്ക് ചിത്രത്തിന്‌റെയും തിരക്കുകളിലാണ് നടന്‍. അല്ലു അര്‍ജുന്റെ ബിഗ് ബഡ്ജറ്റ് ചിത്രം പുഷ്പയില്‍ ഫഹദാണ് വില്ലന്‍ വേഷത്തില്‍ എത്തുന്നത്. സംവിധായകന്‍ സുകുമാര്‍ ഒരുക്കുന്ന ചിത്രം വലിയ ആകാംക്ഷകളോടെയാണ് ആരാധകര്‍ കാത്തിരിക്കുന്നത്. തെലുങ്കും മലയാളവും ഉള്‍പ്പെടെ അഞ്ച് ഭാഷകളിലാണ് ചിത്രം പുറത്തിറങ്ങുക.