സാഹചര്യങ്ങളോട് പെരുമാറാന്‍ അറിയില്ലായിരുന്നു, ഗായത്രി എല്ലാം പഠിപ്പിച്ചു എന്ന് ആര്യ

ഡാന്‍സാണ് ശ്വാസം

ചെറുപ്പം മുതലേ കലാരംഗത്ത് സജീവമാണ്. ഡാന്‍സിലാണ് കൂടുതല്‍ ശ്രദ്ധിച്ചത്. സംസ്ഥാന സ്‌കൂള്‍ കലോത്സവത്തില്‍ മൂന്ന് തവണ മോഹിനിയാട്ടത്തിന് ഒന്നാം സ്ഥാനത്തെത്തിയത് ആര്യയാണ്. അതോടെ ചില പരസ്യ ചിത്രങ്ങളില്‍ അഭിനയിക്കാന്‍ അവസരം വന്നു. അതായിരുന്നു തുടക്കം

സീരിയലിലേക്ക്

പരസ്യത്തിലൂടെ ചെമ്പട്ട് എന്ന സീരിയലില്‍ അവസരം ലഭിച്ചു. അതില്‍ ദേവി പാര്‍വ്വതിയുടെ വേഷമായിരുന്നു. അതിന് ശേഷം മഴവില്‍ മനോരമയില്‍ സംരക്ഷണം ചെയ്തിരുന്ന അമ്മുവിന്റെ അമ്മ എന്ന സീരിയലില്‍ അവസരം ലഭിച്ചു. അമ്മുവിന്റെ അമ്മയില്‍ നെഗറ്റീവ് വേഷമായിരുന്നു.

പഠനത്തിലേക്ക് ശ്രദ്ധ

അമ്മുവിന്റെ അമ്മ കഴിഞ്ഞ ശേഷം പഠനത്തിലായി കൂടുതല്‍ ശ്രദ്ധ. കാലടി ശ്രീശങ്കരചാര്യ യൂണിവേഴ്‌സിറ്റിയില്‍ മോഹിനിയാട്ടത്തില്‍ ബാച്ചിലര്‍ ഡിഗ്രി ചെയ്തുകൊണ്ടിരിയ്ക്കുകയാണ് ആര്യ. അതിനിടയില്‍ ഗായത്രിയിലേക്കുള്ള ക്ഷണം വന്നപ്പോള്‍ നിരസിക്കാന്‍ കഴിഞ്ഞില്ല.

പോസ്റ്റ് വുമണിന്റെ വേഷം

സീരിയലില്‍ ഞാന്‍ പോസ്റ്റ് വുമണായിട്ടാണ് അഭിനയിക്കുന്നത്. സംവിധായകന്‍ ആന്റണി സര്‍ ഒരു പോസ്റ്റ് വുമണിന്റെ മാനറിസങ്ങളെല്ലാം മനസ്സിലാക്കി എനിക്ക് പറഞ്ഞു തന്നിരുന്നു. സ്റ്റാമ്പ് അടിയ്ക്കുന്നതും സൈക്കിളില്‍ പോകുന്നതുമൊക്കെ നിരീക്ഷിച്ചു ചെയ്തതാണ്. പോസ്റ്റ് വുമണിന്റെ യൂണിഫോം ഇടുമ്പോള്‍ ഒരു അഭിമാനമാണ് എനിക്ക്.

ഗായത്രിയില്‍ നിന്ന് പഠിച്ചു

ടൈറ്റിലില്‍ പറഞ്ഞത് പോലെ കുടുംബത്തിലെ ഇളയവളാണ് സീരിയലിലെ ഗായത്രി. ജീവിതത്തില്‍ ഞാന്‍ അച്ഛനും അമ്മയ്ക്കും ഒറ്റമകളാണ്. അതുകൊണ്ട് തന്നെ ലാളന കൂടുതലായിരുന്നു. സാഹചര്യങ്ങളോട് പെരുമാറാന്‍ അറിയില്ലായിരുന്നു. എന്നാല്‍ ഗായത്രിയിലൂടെ ഞാന്‍ പലതും പഠിച്ചു. കൂടുതല്‍ ബോള്‍ഡ് ആയി. ഒരു സാഹചര്യത്തെ ഒറ്റയ്ക്ക് നേരിടാന്‍ ഇപ്പോള്‍ എനിക്ക് സാധിക്കും. കുറച്ചുകൂടി സ്വാതന്ത്രം കിട്ടിയതുപോലെ.

അടുത്ത പരിപാടി

ഇപ്പോള്‍ ഇളയവള്‍ ഗായത്രിയില്‍ മാത്രമാണ് മുഴുവന്‍ ശ്രദ്ധയും. ഒരു നല്ല മോഹിനിയാട്ടം നര്‍ത്തകിയാകണം എന്നാണ് എന്റെ ആഗ്രഹം. കൂടുതല്‍ ക്ലാസുകള്‍ മിസ്സാകാതെ നോക്കാനാണ് ശ്രദ്ധിക്കുന്നത്. കൂട്ടുകാരും ടീച്ചേഴ്‌സും വളരെ അധികം പിന്തുണ നല്‍കുന്നുണ്ട് - ആര്യ പറഞ്ഞു.