മലയാളത്തിന്റെ നായികമാര്‍

ആദ്യ കാലത്ത് മലയാള സിനിമയില്‍ നായക കഥാപാത്രങ്ങോട് കിടപിടിച്ച് നില്‍ക്കുന്ന നായികമാരുണ്ടായിരുന്നു. ഷീല, അംബിക, പത്മിനി, രാഗിണി എന്നിവരെ ആ പട്ടികയില്‍ പെടുത്താം. ഇവര്‍ നായകന്റെ നിഴലില്‍ ഒതുങ്ങിപ്പോയിരുന്നില്ല.

പിന്നീട് 1980കളില്‍ മലയാള സിനിമയ്ക്ക് രണ്ടു സൂപ്പര്‍താരങ്ങളെ ലഭിച്ചു. മമ്മൂട്ടിയും മോഹന്‍ലാലും. എന്നാല്‍ ഹീറോയ്ക്ക് പ്രാധാന്യം ലഭിയ്ക്കുന്ന ചിത്രങ്ങളുടെ കുത്തൊഴുക്കിലും നായികമാര്‍ പിടിച്ചു നിന്നു. അവരുടേതായ സ്ഥാനം ഉറപ്പിക്കുന്ന കഥാപാത്രങ്ങളിലൂടെ പ്രേക്ഷക മനസ്സില്‍ നായികമാര്‍ക്ക് കഴിഞ്ഞു.

പഞ്ചാഗ്‌നി എന്ന ചിത്രത്തിലൂടെ ഗീതയ്ക്ക് പ്രേക്ഷകര്‍ എക്കാലവും ഓര്‍മ്മിയ്ക്കുന്ന ഒരു കഥാപാത്രത്തെ സമ്മാനിയ്ക്കാനായി. ഹരിഹരന്‍എംടി കൂട്ടുകെട്ടില്‍ പിറന്ന നഖക്ഷതങ്ങളിലൂടെ മോനിഷ എന്ന നടിയുടെ കഴിവ് ദേശീയതലത്തില്‍ അംഗീകരിക്കപ്പെട്ടു.

സീമ, സുഹാസിനി, സുമലത, പാര്‍വതി, ശാരി, ഉര്‍വ്വശി എന്നിവര്‍ക്കും ശക്തമായ കഥാപാത്രങ്ങളെ ലഭിച്ചു. അഞ്ചു തവണ മികച്ച നടിയ്ക്കുള്ള സംസ്ഥാന സര്‍ക്കാരിന്റെ പുരസ്‌കാരം ഉര്‍വ്വശി സ്വന്തമാക്കി. മഴവില്‍കാവടി, തലയണമന്ത്രം, കാക്കത്തൊള്ളായിരം തുടങ്ങിയ ചിത്രങ്ങളിലൂടെ നടി തന്റെ അഭിനയമികവ് തെളിയിച്ചു. നമുക്ക് പാര്‍ക്കാന്‍ മുന്തിരി തോപ്പുകള്‍ എന്ന ചിത്രത്തിലെ എന്ന ചിത്രത്തിലെ ശാരി അവതരിപ്പിച്ച സോഫിയ പതിവു നായികാ സങ്കല്‍പ്പങ്ങളെ പൊളിച്ചെഴുതുന്ന ഒന്നായിരുന്നു. തൂവാനതുമ്പികളിലെ സുമലതയുടെ വേഷം ഇന്നും പ്രേക്ഷകമനസ്സില്‍ മായാതെ നില്‍ക്കുന്നു.

1990 കളില്‍ ശക്തമായ നായികാ കഥാപാത്രങ്ങളുമായി ശോഭന അരങ്ങു വാണു. മണിച്ചിത്രത്താഴിലെ നാഗവല്ലിയായി ശോഭന അവിസ്മരണീയമായ പ്രകടനം കാഴ്ച വച്ചു. ശക്തമായ നിരവധി നായികാ കഥാപാത്രങ്ങള്‍ക്ക് ജീവന്‍ നല്‍കിയ ശോഭന 90കളില്‍ മലയാള സിനിമയില്‍ നിറഞ്ഞു നിന്ന നായികയായിരുന്നു. നായകനോളം ഒരു പക്ഷേ അതിനേക്കാള്‍ പ്രാധാന്യമുള്ള നിരവധി നായിക കഥാപാത്രങ്ങള്‍ക്കാണ് ശോഭന ജീവന്‍ നല്‍കിയത്.

90കളുടെ മധ്യത്തില്‍ മലയാള സിനിമയ്ക്ക് മഞ്ജുവാര്യര്‍ എന്ന അനുഗ്രഹീത നടിയെ ലഭിച്ചു. സല്ലാപം എന്ന തന്റെ കന്നി ചിത്രത്തിലൂടെ കഴിവു തെളിയിച്ച മഞ്ജു ഈ പുഴയും കടന്ന്, കന്‍മദം, പത്രം എന്നീ സിനിമകളിലും അഭിനയപ്രാധാന്യമുള്ള വേഷങ്ങള്‍ ചെയ്തു. കണ്ണെഴുതി പൊട്ടും തൊട്ട് എന്ന ചിത്രത്തില്‍ മഞ്ജു അവതരിപ്പിച്ച ഭദ്ര മലയാള സിനിമയിലെ ഏറ്റവും ശക്തമായ നായിക കഥാപാത്രങ്ങളിലൊന്നാണ്. ദിലീപുമായുളള വിവാഹശേഷം സിനിമയില്‍ നിന്ന് പൂര്‍ണ്ണമായും മഞ്ജു വിട്ടുനില്‍ക്കുന്നു.

ഇന്ന് പ്രതിഭയുണ്ടെങ്കിലും സിനിമയില്‍ നായികമാര്‍ക്ക് കഴിവ് തെളിയിക്കാനുതകുന്ന കഥാപാത്രങ്ങള്‍ ലഭിയ്ക്കുന്നത് വളരെ വിരളമാണ്. ടിവി ചന്ദ്രന്റെ പാഠം ഒന്ന് ഒരു വിലാപം എന്ന ചിത്രത്തിലൂടെ 2003ല്‍ മീരാ ജാസ്മിനെ ദേശീയ അംഗീകാരം തേടിയെത്തി.

എന്നാല്‍ വീണ്ടും ഒരു ഏഴു വര്‍ഷങ്ങള്‍ക്ക് ശേഷമാണ് ഗദ്ദാമ എന്ന ചിത്രത്തിലൂടെ ഒരു ശക്തമായ സ്ത്രീ കഥാപാത്രം വെള്ളിത്തിരയിലെത്തുന്നത്. ഗദ്ദാമയിലെ പ്രകടനത്തിന് കാവ്യയ്ക്ക് സംസ്ഥാന അവാര്‍ഡ് ലഭിയ്ക്കുകയും ചെയ്തു.

പുതു തലമുറയില്‍ അഭിനയത്തെ ഗൗരവമായി കാണുന്നവരുടെ എണ്ണം കുറവാണ്. പണത്തിന്റേയും ഗ്ലാമറിന്റേയും വഴിയിലൂടെ നടക്കാനുള്ള ഒരു മാര്‍ഗ്ഗം മാത്രമാണ് സിനിമ. അഭിനയപ്രാധാന്യമുള്ള കഥാപാത്രങ്ങള്‍ക്ക് വേണ്ടി ദാഹിച്ചു നടക്കുകയൊന്നുമല്ല താന്‍ എന്ന് അഭിമുഖങ്ങളില്‍ തുറന്നടിയ്ക്കുന്നവരും കുറവല്ല.

നായികമാരെ തേടി ശക്തമായ കഥാപാത്രം എത്തുന്നില്ല എന്ന് പരാതിപ്പെടുന്നവര്‍ അത്തരം വെല്ലുവിളിയുയര്‍ത്തുന്ന കഥാപാത്രങ്ങള്‍ അഭിനയിപ്പിച്ച് ഫലിപ്പിക്കാന്‍ കഴിയുന്ന നായികമാര്‍ നമുക്ക് ഇന്ന് ഉണ്ടോ എന്ന കാര്യവും ആലോചിക്കേണ്ടതാണ്.