മമ്മൂട്ടിയും മോഹന്‍ലാലുമില്ലെങ്കില്‍ ആ ചടങ്ങ് നാഥനില്ലാത്തതുപോലെയാവുമെന്ന് ഇന്ദ്രന്‍സ്

സംസ്ഥാന അവാര്‍ഡ് വിതരണത്തില്‍ ക്ഷണിക്കേണ്ട

പോയവര്‍ഷത്തെ സംസ്ഥാന അവാര്‍ഡ് ജേതാക്കളെ നേരത്തെ തന്നെ പ്രഖ്യാപിച്ചിരുന്നു. അവാര്‍ഡ് വിതരണത്തില്‍ മുഖ്യാതിഥിയായി മോഹന്‍ലാല്‍ പങ്കെടുത്തേക്കുമെന്നുള്ള റിപ്പോര്‍ട്ടുകള്‍ പ്രചരിച്ചിരുന്നു. മുഖ്യമന്ത്രിയും സാംസ്‌കാരിക വകുപ്പ് മന്ത്രിയും മറ്റ് രാഷ്ട്രീയ സാമൂഹ്യ ചലച്ചിത്ര മേഖലയിലെ പ്രഗത്ഭരും പരിപാടിയില്‍ പങ്കെടുക്കാറുണ്ട്. ഇത്തവണ മോഹന്‍ലാല്‍ മുഖ്യാതിഥിയായി എത്തിയേക്കുമെന്നുള്ള റിപ്പോര്‍ട്ട് പ്രചരിച്ചതോടെയാണ് പ്രതിഷേധം അറിയിച്ച് നിരവധി പേര്‍ രംഗത്തെത്തിയത്. മോഹന്‍ലാല്‍ പരിപാടിയില്‍ പങ്കെടുക്കുന്നതിനോട് താല്‍പര്യമില്ലെന്ന് പലരും വ്യക്തമാക്കിയിരുന്നു.

വിവാദങ്ങള്‍ ആളിപ്പടര്‍ന്നു

മോഹന്‍ലാലിനെ ക്ഷണിച്ചുവെന്ന തരത്തില്‍ റിപ്പോര്‍ട്ടുകള്‍ പുറത്തുവന്നതോടെയാണ് സംസവിധായകരും രാഷ്ട്രീയപ്രതിനിധികളും താരങ്ങളുമൊക്കെ അവരവരുടെ നിലപാട് വ്യക്തമാക്കിയത്. ക്ഷണനേരം കൊണ്ടായിരുന്നു പല പോസ്റ്റുകളും വൈറലായത്. മോഹന്‍ലാലിനെ ക്ഷണിച്ചിട്ടില്ലെന്ന് അക്കാദമി ചെയര്‍മാനായ കമലും തന്നെ ക്ഷണിച്ചിട്ടില്ലെന്നും അറിയാത്ത വിഷയത്തെക്കുറിച്ച് താന്‍ എങ്ങനെ പ്രതികരിക്കുമെന്നുമായിരുന്നു മോഹന്‍ലാല്‍ ചോദിച്ചത്. വണ്ടിപ്പെരിയാറില്‍ ലൂസിഫറിന്റെ ലൊക്കേഷനില്‍ സമാധാനപരമായാണ് താന്‍ നില്‍ക്കുന്നതെന്നും താരം വ്യക്തമാക്കിയിരുന്നു.

പ്രതിഷേധവുമായി ഭീമഹര്‍ജി

മോഹന്‍ലാല്‍ പങ്കെടുക്കുന്നത് തടയാനായി സാംസ്‌കാരിക പ്രവര്‍ത്തകരും താരങ്ങളുമുള്‍പ്പടെയുള്ളവര്‍ ഭീമഹര്‍ജി നല്‍കിയിരുന്നു. 105 ഓളം പേരാണ് ഈ ഹര്‍ജിയില്‍ ഒപ്പിട്ടത്. എന്നാല്‍ മോഹന്‍ലാലിന്റെ പേര് ഈ ഹര്‍ജിയില്‍ ഉണ്ടായിരുന്നില്ലെന്നും അദ്ദേഹത്തിനെതിരെ പ്രവര്‍ത്തിച്ചിട്ടില്ലെന്നും വ്യക്തമാക്കി പ്രകാശ് രാജും സിദ്ധാര്‍ത്ഥ് ശിവയുമുള്‍പ്പടെയുള്ള സാംസ്‌കാരിക പ്രവര്‍ത്തകര്‍ രംഗത്തെത്തിയതോടെയാണ് ഹര്‍ജിക്ക് പിന്നിലെ തട്ടിപ്പ് പരസ്യമായത്. ഇങ്ങനെയൊരു കാര്യത്തെക്കുറിച്ച് അറിഞ്ഞിട്ടുപോലുമില്ലെന്നും താന്‍ ഒപ്പിട്ടിട്ടില്ലെന്നും വ്യക്തമാക്കി പ്രകാശ് രാജും രംഗത്തുവന്നിരുന്നു.

സംഘടിത നീക്കത്തിനെതിരെ പ്രതിഷേധം

മോഹന്‍ലാലിനെതിരെയുള്ള സംഘടിത നീക്കത്തിനെതിരെ പ്രതിഷേധം അറിയിച്ച് ആരാധകരും സിനിമാപ്രവര്‍ത്തകരുമൊക്കെയായി നിരവധി പേര്‍ രംഗത്തുവന്നിരുന്നു. അദ്ദേഹത്തപ്പോലൊരു കലാകാരനെ ഒരു തരത്തിലും അപമാനിക്കേണ്ടിയിരുന്നില്ലെന്നായിരുന്നു പലരും പറഞ്ഞത്. ഓസ്‌കാര്‍ ചടങ്ങില്‍പ്പോലും മുഖ്യാതിഥിയായി പങ്കെടുക്കാന്‍ യോഗ്യതയുള്ള താരമാണ് മോഹന്‍ലാലെന്നായിരുന്നു സന്തോഷ് പണ്ഡിറ്റ് പറഞ്ഞത്. മേജര്‍ രവി, പ്രിയദര്‍ശന്‍ തുടങ്ങിയവരും വിഷയത്തില്‍ നിലപാട് വ്യക്തമാക്കി രംഗത്തുവന്നിരുന്നു.

നിലപാട് വ്യക്തമാക്കി ഇന്ദ്രന്‍സ്

മോഹന്‍ലാല്‍ പങ്കെടുക്കണോ വേണ്ടയോ എന്ന വിവാദം ശക്തമായി തുടരുന്നതിനിടയിലാണ് പുരസ്‌കാര ജേതാക്കളിലൊരാളായ ഇന്ദ്രന്‍സ് തന്റെ നിലപാട് വ്യക്തമാക്കി രംഗത്തുവന്നത്. മോഹന്‍ലാലും മമ്മൂട്ടിയും പങ്കെടുത്തില്ലെങ്കില്‍ ആ ചടങ്ങ് നാഥനില്ലാത്ത അവസ്ഥ പോലെയാകും. ഇവരുടെ സാന്നിധ്യം ചടങ്ങിന് അത്യാവശ്യമാണ്. സിനിമാകുടുംബത്തില്‍ അവരുടെ അസാന്നിധ്യം വേദനാജനകമായ കാര്യമാണെന്നും അദ്ദേഹം വ്യക്തമാക്കിയിരുന്നു.

വേദന തോന്നി

മോഹന്‍ലാലിനെയോ മമ്മൂട്ടിയേയോ വിളിക്കാന്‍ തനിക്ക് അവസരം ലഭിച്ചിരുന്നില്ലെന്നും അവര്‍ ചടങ്ങിനെത്തുമെന്നാണ് താന്‍ പ്രതീക്ഷിക്കുന്നതെന്നും അദ്ദേഹം പറയുന്നു. പത്രസമ്മേളനത്തിനിടയിലാണ് അദ്ദേഹം ഇതേക്കുറിച്ച് വ്യക്തമാക്കിയത്. ഈ വിവാദത്തെക്കുറിച്ച് അറിഞ്ഞപ്പോള്‍ തനിക്ക് സങ്കടമാണ് തോന്നിയതെന്നും അദ്ദേഹം പറയുന്നു.വല്ലപ്പോഴുമാണ് ഒരു താരത്തിന് ഇത്തരത്തിലൊരു അവാര്‍ഡ് ലഭിക്കുന്നത്. അപ്പോള്‍ ആ ചടങ്ങില്‍ എല്ലാവരും പങ്കെടുക്കണമെന്നാണ് തന്റെ നിലപാടെന്നും താരം വ്യക്തമാക്കിയിട്ടുണ്ട്.