റൊമാനിയന്‍ താരത്തെ സല്‍മാന്‍ സ്വന്തമാക്കുമോ?

By Lakshmi

| Published: Friday, May 24, 2013, 15:25 [IST]

റൊമാനിയന്‍ ടിവി താരം ലുലിയ വാണ്ടൂറുമായി സല്‍മാന്‍ ഖാന്‍ പ്രണയത്തിലാണെന്ന വാര്‍ത്ത വന്നിട്ട് നാളുകുറേയായി. സല്‍മാന്‍ ഉടന്‍ ലുലിയയെ വിവാഹം കഴിയ്ക്കാന്‍ പോവുകയാണെന്നും റിപ്പോര്‍ട്ടുണ്ടായിരുന്നു.

എന്നാല്‍ ഇപ്പോള്‍ സല്‍മാന്‍ ഇതിനെക്കുറിച്ച് ഒന്നും മുറിച്ച് പറയുന്നില്ല. ഗോവയില്‍ പുതിയ ചിത്രത്തിന്റെ ചിത്രീകരണത്തിരക്കുകളാണ് താരമിപ്പോള്‍, ലുലിയയും ഗോവയില്‍ ഉണ്ടെന്നും ഇവര്‍ രണ്ടുപേരും ഒന്നിച്ച് സമയം ചെലവഴിക്കുന്നുണ്ടെന്നുമാണ് ഗോവയില്‍ നിന്നുള്ള റിപ്പോര്‍ട്ടുകള്‍.

വീട്ടുകാരും കൂട്ടുകാരുമെല്ലാം സല്‍മാന്‍-ലുലിയ ബന്ധത്തിന് അനുകൂലമാണത്രേ. എല്ലാവര്‍ക്കും ഒരാവശ്യം മാത്രമേയുള്ളു, ഇത്തവണയെങ്കിലും സല്‍മാന്‍ വിവാഹിതനാകണം. എല്ലാവരും സല്‍മാനോട് ഇക്കാര്യം ആവശ്യപ്പെട്ടിട്ടുമുണ്ടത്രേ.

ഭായി ഈ ബന്ധത്തെ വളരെ ഗൗരവത്തോടെയാണ് കാണുന്നത്. രണ്ട് വര്‍ഷത്തോളമായി ലുലിയയുമായുള്ള ബന്ധം തുടങ്ങിയിട്ട്. ആദ്യകാലത്തൊന്നും ആര്‍ക്കും ഇക്കാര്യം അറിയുമായിരുന്നില്ല. ഇപ്പോള്‍ അദ്ദേഹം എല്ലാവരോടും ഈ ബന്ധത്തെക്കുറിച്ച് പറയുന്നുണ്ട്. കേട്ടവരെല്ലാം ഭായിയോട് ലുലിയയെ കെട്ടാനാണ് പറയുന്നത്. പക്ഷേ കല്യാണത്തെക്കുറിച്ച് അദ്ദേഹം ഒന്നും പറയുന്നില്ല-സല്‍മാനുമായി ഏറെ അടുപ്പമുള്ള ഒരാള്‍ പറയുന്നു.

എന്തായാലും ഇനിയും അധികകാലം സല്‍മാന്‍ ബാച്ചിലറായി തുടരില്ലെന്നാണ് അദ്ദേഹവുമായി അടുപ്പമുള്ളവര്‍ പറയുന്നത്.