ബിഗ് ബജറ്റിലെത്തിയ കെജിഎഫിലൂടെ യുവതാരം കീഴടക്കിയത് സിനിമാലോകത്തെ! നൂറ് കോടി പെട്ടിയിലാക്കി!!

കെജിഎഫ്

കേരളക്കരയില്‍ അത്രയും പ്രധാന്യത്തോടെ നാലോളം സിനിമകളായിരുന്നു ക്രിസ്തുമസിന് മുന്നോടിയായി റിലീസിനെത്തിയത്. അതില്‍ ഫഹദ് ഫാസിലിന്റെ ഞാന്‍ പ്രകാശന്‍ ഗംഭീര പ്രകടനമാണ് കാഴ്ച വെച്ച് കൊണ്ടിരിക്കുന്നത്. അതേ ദിവസം തന്നെയാണ് കന്നഡയില്‍ നിര്‍മ്മിച്ച കെജിഎഫും റിലീസ് ചെയ്തത്. പ്രശാന്ത് നീല്‍ തിരക്കഥ എഴുതി സംവിധാനം ചെയ്ത സിനിമ ഗംഭീര പ്രകടനം നടത്തി കൊണ്ടിരിക്കുകയാണ്. ഹോംബിള്‍ ഫിലിംസിന്റെ ബാനറില്‍ വിജയ് കിരഗണ്ടൂര്‍ നിര്‍മ്മിച്ച സിനിമ 50 കോടിയോളം മുതല്‍ മുടക്കിലെത്തിയ ബിഗ് ബജറ്റ് ചിത്രമായിരുന്നു.

വമ്പന്‍ താരങ്ങളും

കന്നഡ സിനിമയിലെ റോക്കിംഗ് സ്റ്റാര്‍ എന്ന് വിളിപേരുള്ള യഷ് ആണ് കെജിഎഫിലെ നായകന്‍. ശ്രീനിധി ഷെട്ടിയാണ് നായിക. ഇവരെ കൂടാതെ ഒരുപാട് താരങ്ങളാണ് സിനിമയില്‍ അഭിനയിച്ചിരിക്കുന്നത്. ബാഹുബലിയിലൂടെ പ്രഭാസിന് ലഭിച്ച ജനപ്രീതിയാണ് കെജിഎഫിലൂടെ യഷിന് ലഭിച്ചിരിക്കുന്നത്. യഷിന്റെ കരിയര്‍ ബ്രേക്ക് മൂവിയാണിതെന്ന് ഒറ്റവാക്കില്‍ പറയാം. തിയറ്ററുകളില്‍ നിന്നും ലഭിച്ച പിന്തുണ ബോക്‌സോഫീസ് കളക്ഷനിലും പ്രകടമായിരിക്കുകയാണ്.

നൂറ് കോടി ക്ലബ്ബിലെത്തി...

കെജിഎഫിന്റെ വിജയത്തോടെ കന്നഡ സിനിമയുടെ മാര്‍ക്കറ്റും വിപുലപ്പെട്ടിരിക്കുകയാണ്. കേരളം, തമിഴ്‌നാട്, ആന്ധ്ര-തെലുങ്കാന തുടങ്ങി തെന്നിന്ത്യന്‍ സിനിമാ ലോകത്ത് വലിയ പ്രേക്ഷകശ്രദ്ധ നേടി കൊടുത്ത സിനിമ നൂറ് കോടി ക്ലബ്ബിലെത്തിയിരിക്കുകയാണ്. റിലീസിനെത്തി വെറും അഞ്ച് ദിവസം കൊണ്ടായിരുന്നു സിനിമയുടെ ഈ നേട്ടം. ആഗോളതലത്തില്‍ നിന്നുമാണ് നൂറ് കോടി സിനിമ നേടിയിരിക്കുന്നത്. കന്നഡയില്‍ നിന്നുമുള്ള ആദ്യ ആഗോള ഹിറ്റ് മൂവി എന്ന റെക്കോര്‍ഡ് കെജിഎഫ് സ്വന്തമാക്കിയിരിക്കുകയാണ്.

മിന്നുന്ന പ്രകടനം

രാജ്യത്തെ ഏറ്റവും വലിയ സ്വര്‍ണ ഖനിയായിരുന്ന കോളാര്‍ പ്രദേശത്തെ അധികരിച്ചാണ് സിനിമയുടെ കഥ ഒരുക്കിയത്. കോളാര്‍ ഗോള്‍ഡ് ഫീല്‍ഡ്‌സ് എന്നതിന്റെ ചുരുക്കെഴുത്താണ് കെജിഎഫ്. ചിത്രം തമിഴ്, തെലുങ്ക്, ഹിന്ദി, മലയാളം ഭാഷകളിലും എത്തിയിരുന്നു. മലയാളത്തില്‍ ചുരുക്കം സ്‌ക്രീനുകളാണ് സിനിമയ്ക്ക് ലഭിച്ചതെങ്കിലും അവിടെയും മിന്നുന്ന പ്രകടനമാണ് കാഴ്ച വെച്ചിരിക്കുന്നത്. നല്ല അഭിപ്രായം പ്രേക്ഷകരില്‍ നിന്നും വന്നതോടെ സിനിമ കാണാന്‍ ആവശ്യക്കാര്‍ വന്ന് കൊണ്ടിരിക്കുകയാണ്.