കീശയില്‍ തപ്പിയപ്പോള്‍ കാശില്ല, ജാഡയ്ക്ക് 500 രൂപ ഉണ്ടെന്ന് പറയുകയും ചെയ്തു, അനുഭവം പറഞ്ഞ് ചാക്കോച്ചന്‍

അതേസമയം മനോരമയ്ക്ക് നല്‍കിയ അഭിമുഖത്തില്‍ അടുത്തിടെ തനിക്കുണ്ടായ ഒരനുഭവം ചാക്കോച്ചന്‍ പങ്കുവെച്ചിരുന്നു. മാസ്‌ക്കും തൊപ്പിയും വെച്ച് താന്‍ ഇപ്പോഴും നഗരത്തിലൂടെ നടക്കാന്‍ പോവാറുണ്ടെന്ന് നടന്‍ പറയുന്നു. ആരും തന്നെ തിരിച്ചറിയാറില്ലെന്നും ചാക്കോച്ചന്‍ പറഞ്ഞു. അത്തരത്തില്‍ നടക്കാന്‍ പോയപ്പോള്‍ ഉണ്ടായ അനുഭവമാണ് നടന്‍ വെളിപ്പെടുത്തിയത്.

ഈയടുത്ത് മാസ്‌ക്കും തൊപ്പിയും വെച്ച് പനമ്പിളളി നഗറില്‍ നടക്കാന്‍ പോയതായിരുന്നു. രാത്രി ഏട്ടരയൊക്കെ ആയിക്കാണും. എനിക്ക് ദാഹിച്ചു, അവിടെ ഒരു കരിക്ക് കച്ചവടക്കാരന്‍ ഉണ്ടായിരുന്നു. പുളളീടെ അടുത്ത് ഒരു കരിക്ക് വെട്ടാന്‍ പറഞ്ഞു. പെട്ടെന്നാണ് ഓര്‍ത്തത്. എന്റെ കൈയ്യില്‍ 500 രൂപയാണ് ചില്ലറ ഇല്ല. ഞാന്‍ ആളോട് കാര്യം പറഞ്ഞു.

ആളുടെ കൈയ്യില്‍ ചില്ലറയുണ്ട്. കുഴപ്പമില്ല എന്ന് പറഞ്ഞ് ആള് വീണ്ടും കരിക്ക് വെട്ടാന്‍ തുടങ്ങി. ഞാന്‍ കീശയില്‍ തപ്പി നോക്കിയപ്പോള്‍ കാശില്ല. ഞാനാണെങ്കില്‍ ജാഡയ്ക്ക് അഞ്ഞൂറു രൂപ ഉണ്ടെന്ന് പറയുകയും ചെയ്തു. പുളളി അപ്പോഴേക്കും കരിക്ക് വെട്ടാന്‍ തുടങ്ങിയിരിക്കുന്നു. ഞാന്‍ പെട്ടെന്ന് ഇടപെട്ട് പറഞ്ഞു.

ചേട്ടാ വെട്ടണ്ട. എന്റെ കൈയ്യില്‍ കാശില്ല. ഞാനാകെ വല്ലാത്ത അവസ്ഥയില്‍ ആയിപ്പോയി. എന്തായാലും പുളളി എനിക്ക് കരിക്ക് തന്നു. കാശ് പിന്നെ കൊടുത്താല്‍ മതിയെന്നും പറഞ്ഞു. പിറ്റേദിവസം രാവിലെയാണ് ഞാന്‍ പുളളിക്ക് കാശുകൊടുത്തത്. കുഞ്ചാക്കോ ബോബന്‍ പറഞ്ഞു. അതേസമയം മോഹന്‍കുമാര്‍ ഫാന്‍സിന് പുറമെ വ്യത്യസ്ത വിഭാഗങ്ങളില്‍പ്പെട്ട സിനിമകളും ചാക്കോച്ചന്റെതായി അണിയറയില്‍ ഒരുങ്ങുന്നുണ്ട്.

മുന്‍നിര സംവിധായകര്‍ക്കും പുതിയ സംവിധായകര്‍ക്കൊപ്പമുളള സിനിമകളുമാണ് നടന്റെതായി വരാനിരിക്കുന്നത്. ചാക്കോച്ചന്‌റെ നിഴല്‍ എന്ന പുതിയ സിനിമയില്‍ ലേഡീ സൂപ്പര്‍സ്റ്റാര്‍ നയന്‍താരയാണ് നായികാ വേഷത്തില്‍ എത്തുന്നത്. അടുത്തിടെയാണ് സിനിമയുടെ ചിത്രീകരണം പൂര്‍ത്തിയായത്. അഭിനയത്തിന് പുറമെ സിനിമയില്‍ നിര്‍മ്മാണ രംഗത്തും തുടക്കം കുറിച്ച താരമാണ് ചാക്കോച്ചന്‍.