ബിഗ് ബജറ്റ് ചിത്രം മമ്മൂട്ടിയ്ക്കും മോഹന്‍ലാലിനും മാത്രമല്ല ചാക്കോച്ചനുമുണ്ട്! ഇത്തവണ മിന്നിക്കും!!

ചെന്നൈയില്‍ ഒരു നാള്‍

അന്തരിച്ച നടന്‍ രാജേഷ് പിള്ളയ്‌ക്കൊപ്പം ട്രാഫീക് എന്ന ചിത്രത്തില്‍ അസിസ്റ്റന്റായി പ്രവര്‍ത്തിച്ച സംവിധായകനാണ് ഷഹീദ് ഖാദര്‍. ഷഹീദ് സംവിധാനം ചെയ്യുന്ന സിനിമയാണ് ചെന്നൈയില്‍ ഒരു നാള്‍. കുഞ്ചാക്കോ ബോബന്‍ നായകനായി അഭിനയിക്കുന്ന സിനിമയെ കുറിച്ച് പലതരത്തിലും വാര്‍ത്തകള്‍ വന്നിരുന്നെങ്കിലും ഔദ്യോഗികമായ കൂടുതല്‍ വിവരങ്ങളൊന്നുമില്ലായിരുന്നു. ഒടുവില്‍ ടൈംസ് ഓഫ് ഇന്ത്യയ്ക്ക് കൊടുത്ത അഭിമുഖത്തിലാണ് തന്റെ പുതിയ സിനിമയെ കുറിച്ച് ഷഹീദ് വെളിപ്പെടുത്തല്‍ നടത്തിയിരിക്കുന്നത്.

സ്‌പോര്‍സ് സിനിമയോ?

ചെന്നൈയില്‍ ഒരു നാള്‍ എന്ന ചിത്രം ഒരു സ്‌പോര്‍സ് മൂവിയാണെന്ന് നേരത്തെ റിപ്പോര്‍ട്ടുകള്‍ വന്നിരുന്നു. സിനിമ ഒരു ഭാര്യയും ഭര്‍ത്താവും തമ്മിലുള്ള ആത്മബന്ധത്തിന്റെ കഥയാണ് പറയുന്നത്. നിത്യ മേനോനാണ് കുഞ്ചാക്കോ ബോബന്റെ ഭാര്യയുടെ വേഷത്തിലെത്തുന്നത്. നേരത്തെ 2012 ല്‍ ഇരുവരും പോപ്പിന്‍സ് എന്ന സിനിമയില്‍ ഒന്നിച്ചഭിനയിച്ചിരുന്നു. ചാക്കോച്ചന്‍ ഒരു കായിക താരമായിട്ടാണ് ചിത്രത്തിലെത്തുന്നത്. അതിനാല്‍ ഒരു സ്‌പോര്‍സ് സിനിമ യുടെ പശ്ചാതലമായിരിക്കും ഈ ചിത്രത്തിനുണ്ടാവുന്നതെന്നാണ് സംവിധായകന്‍ പറയുന്നത്.

അണിയറ വിശേഷങ്ങള്‍

സംവിധാനത്തിനൊപ്പം ഷഹീദ് തന്നെയാണ് സിനിമയ്ക്ക് തിരക്കഥ ഒരുക്കിയിരിക്കുന്നതും. കായികപ്രേമിയായ നായകന്‍ കൊല്‍ക്കത്ത ട്രംവേയില്‍ ജോലി ചെയ്യുന്ന ഒരാളാണ്. അതിനാല്‍ കൊല്‍ക്കത്തയാണ് സിനിമയുടെ പശ്ചാതലമായി വരുന്നത്. മാര്‍ച്ചോടെ സിനിമയുടെ ചിത്രീകരണം ആരംഭിക്കാനുള്ള തയ്യാറെടുപ്പിലാണ് അണിയറ പ്രവര്‍ത്തകര്‍. ഇ4 എന്റര്‍ടെയിന്‍മെന്‍സിന്റെ ബാനറിലാണ് ചിത്രം നിര്‍മ്മിക്കുന്നത്. സിനിമയുടെ പേരിലും മറ്റ് താരങ്ങളെ കുറിച്ചും വ്യക്തത ഇനിയും വന്നിട്ടില്ല. വരും ദിവസങ്ങളില്‍ കൂടുതല്‍ വിവരങ്ങള്‍ വരുമെന്ന പ്രതീക്ഷയിലാണ് ആരാധകര്‍.

ചാക്കോച്ചന്റെ സിനിമകള്‍

കൈനിറയെ സിനിമകളുമായി കുഞ്ചാക്കോ ബോബന്‍ തിരക്കോട് തിരക്കാണ്. കഴിഞ്ഞ വര്‍ഷം തിയറ്ററുകളിലേക്ക് എത്തിയ എല്ലാ സിനിമകളും നല്ല അഭിപ്രായമായിരുന്നു സ്വന്തമാക്കിയത്. ശിക്കാരി ശംഭു പോലെയുള്ള ചിത്രങ്ങള്‍ ബോക്‌സോഫീസില്‍ സാമ്പത്തിക വിജയം കരസ്ഥമാക്കുകയും ചെയ്തിരുന്നു. ക്രിസ്തുമസിന് മുന്നോടിയായി ഡിസംബര്‍ 24 ന് തിയറ്ററുകളിലേക്ക് എത്തിയ തട്ടിന്‍പ്പുറത്ത് അച്യൂതനാണ് കുഞ്ചാക്കോ ബോബന്‍ നായകനായി അഭിനയിച്ച് തിയറ്ററുകളിലേക്ക് എത്തിയ അവസാന ചിത്രം. 2019 ല്‍ വേറെയും സിനിമകള്‍ റിലീസിനൊരുങ്ങുകയാണ്. അള്ള് രാമേന്ദ്രന്‍ എന്ന സിനിമയായിരിക്കും ഉടന്‍ റിലീസിനെത്തുക.

നിത്യ മേനോന്‍ മലയാളത്തിലേക്ക്

ചെറിയൊരു ഇടവേളയ്ക്ക് ശേഷം നിത്യ മേനോന്‍ മലയാളത്തിലേക്ക് തിരിച്ചെത്തിയിരിക്കുകയാണ്. ചിത്രീകരണം പൂര്‍ത്തിയായ പ്രാണയാണ് നിത്യയുടെ ഉടന്‍ റിലീസ്് തീരുമാനിച്ചിരിക്കുന്ന സിനിമ. വി കെ പ്രകാശ് സംവിധാനം ചെയ്യുന്ന ചിത്രം ത്രില്ലര്‍ ഗണത്തിലാണ് നിര്‍മ്മിക്കുന്നത്. മലയാളത്തിന് പുറമേ തെലുങ്ക്, കന്നഡ, ഹിന്ദി എന്നിങ്ങനെ ഇന്ത്യയിലെ വിവിധ ഭാഷകളിലായിട്ടാണ് ചിത്രം നിര്‍മ്മിച്ചത്. റസൂല്‍ പൂക്കുട്ടി, പിസി ശ്രീറാം, ലൂയിസ് ബാങ്ക്‌സ് എന്നിങ്ങനെ നിരവധി പേരാണ് സിനിമയുടെ പിന്നണിയിലുള്ളത്. നിത്യ നായികയാവുന്ന മറ്റൊരു മലയാള ചിത്രം ടികെ രാജീവ് കുമാര്‍ സംവിധാനം ചെയ്യുന്ന കോളാമ്പിയാണ്.