ഇമയൗവിനു ശേഷം ജെല്ലിക്കെട്ടുമായി ലിജോ ജോസ് പെല്ലിശ്ശേരി! സിനിമയുടെ ചിത്രീകരണം ആരംഭിച്ചു!

ജെല്ലിക്കെട്ട്

ജെല്ലിക്കെട്ട് എന്ന പേര് പ്രഖ്യാപിച്ചതു മുതല്‍ തമിഴ്‌നാട്ടിലെ കാളപ്പോര് ജെല്ലിക്കെട്ടിനെ ആസ്പദമാക്കിയാണോ ചിത്രമെന്ന് എല്ലാവരിലും സംശയമുണ്ടായിരുന്നു. എന്നാല്‍ സിനിമയുടെ പ്രമേയം ഇപ്പോള്‍ തനിക്ക് വെളിപ്പെടുത്താനാവില്ലെന്ന് ലിജോ ജോസ് പെല്ലിശ്ശേരി തന്നെ ഒരഭിമുഖത്തില്‍ പറഞ്ഞിരുന്നു. ഒരു പോത്തും കുറെ മനുഷ്യരുമാണ് ചിത്രത്തില്‍ അഭിനയിക്കുകയെന്നായിരുന്നു ലിജോ ഫേസ്ബുക്ക് വഴി അറിയിച്ചിരുന്നത്. എസ് ഹരീഷും ആര്‍ ജയകുമാറും ഒരുക്കിയ തിരക്കഥയിലാണ് ലിജോ ഈ ചിത്രം അണിയിച്ചൊരുക്കുന്നത്.

താരനിര

ജെല്ലിക്കെട്ടില്‍ വിനായകനൊപ്പം ആന്റണി വര്‍ഗീസും എത്തുന്നുണ്ടെന്നാണ് അറിയുന്നത്. ലിജോ ജോസ് പെല്ലിശ്ശേരിയുടെ തന്നെ അങ്കമാലി ഡയറീസിലൂടെ അരങ്ങേറ്റം കുറിച്ച താരമാണ് ആന്റണി വര്‍ഗീസ്. കരിയറില്‍ വഴിത്തിരിവായ അങ്കമാലി ഡയറീസിനു ശേഷം സ്വാതന്ത്ര്യം അര്‍ദ്ധരാത്രിയില്‍ എന്ന ചിത്രത്തിലും ആന്റണി അഭിനയിച്ചിരുന്നു. സ്വാതന്ത്ര്യം അര്‍ദ്ധരാത്രിയില്‍ ചിത്രത്തിനു ശേഷം വിനായകനും ആന്റണി വര്‍ഗീസും വീണ്ടുമൊന്നിക്കുന്ന ചിത്രം കൂടിയാണ് ജെല്ലിക്കെട്ട്.

ഷൂട്ടിംഗ് ആരംഭിച്ചു

ജെല്ലിക്കെട്ടിന്റെ ഷൂട്ടിംഗ് ആരംഭിച്ചതായുളള റിപ്പോര്‍ട്ടുകള്‍ സമൂഹ മാധ്യമങ്ങളില്‍ വന്നിരുന്നു. എസ് ഹരീഷിന്റെ മാവോയിസ്റ്റ് എന്ന കഥയെ ആസ്പദമാക്കിയാണ് ചിത്രമൊരുങ്ങുന്നതെന്നാണ് സൂചന. ആന്റണിക്കും വിനായകനുമൊപ്പം ബിഗ് ബോസ് മലയാളം വിജയി സാബുമോന്‍ അബ്ദുള്‍ സമദും ചിത്രത്തില്‍ പ്രധാന വേഷത്തിലെത്തുന്നുണ്ട്. ഹൈറേഞ്ചിലാണ് സിനിമയുടെ പ്രധാന ലൊക്കേഷന്‍ എന്നാണറിയുന്നത്‌

ഗിരീഷ് ഗംഗാധരന്റെ ചായാഗ്രഹണം

അങ്കമാലി ഡയറീസിനു വേണ്ടി ചായാഗ്രഹണം നിര്‍വ്വഹിച്ച ഗിരീഷ് ഗംഗാധരനാണ് ജെല്ലിക്കെട്ടിനു വേണ്ടിയും ക്യാമറ ചലിപ്പിക്കുന്നത്. ദീപു ജോസഫ് എഡിറ്റിങ്ങ് നിര്‍വ്വഹിക്കുന്നു. പ്രശാന്ത് പിളളയാണ് ചിത്രത്തിനു വേണ്ടി സംഗീതമൊരുക്കുന്നത്. ലിജോ ജോസ് പെല്ലിശ്ശേരിയുടെ മുന്‍ചിത്രങ്ങളായ ആമേന്‍,അങ്കമാലി ഡയറീസ് തുടങ്ങിയ സിനിമകള്‍ക്കു സംഗീതമൊരുക്കിയിരുന്നതും പ്രശാന്ത് പിളളയായിരുന്നു.തോമസ് പണിക്കാരാണ് ലിജോ ജോസ് പെല്ലിശ്ശേരിയുടെ ജെല്ലിക്കെട്ട് നിര്‍മ്മിക്കുന്നത്.