മമ്മൂട്ടിയെ നായകനാക്കി ചിത്രം ചെയ്യാത്തതിന് പിന്നിലെ കാരണം വെളിപ്പെടുത്തി മേജര്‍ രവി

മോഹന്‍ലാലിനെ നായകനാക്കുന്നതിന് പിന്നില്‍

സവിശേഷമായൊരു ബന്ധമുണ്ട് ഞങ്ങള്‍ക്കിടയില്‍. ഞാന്‍ ചെയ്യുന്ന തരത്തിലുള്ള സിനിമകളോടൊക്കെ വലിയ ആവേശമുള്ള ആളാണ് അദ്ദേഹം. ലൊക്കേഷനില്‍ നമ്മള്‍ തളര്‍ന്നിരിക്കുകയാണെങ്കില്‍ ഊര്‍ജ്ജം പകരുന്ന ഒരു ഘടകമാണ് മോഹന്‍ലാല്‍. അങ്ങനെയുള്ള ഘട്ടങ്ങളില്‍ എല്ലാവരെയും ഉണര്‍ത്തി കാര്യങ്ങള്‍ ഏറ്റെടുത്ത് മുന്നോട്ട് കൊണ്ടുപോകും അദ്ദേഹം.

ആക്ഷന്‍ സീക്വന്‍സുകളോടുള്ള താല്‍പ്പര്യം

ആക്ഷന്‍ സീക്വന്‍സുകളോട് മോഹന്‍ലാലിനുള്ള താല്‍പര്യത്തെക്കുറിച്ച് പലരും പറഞ്ഞുകേട്ടിട്ടുണ്ട്. അത് സത്യമാണ്. എന്റെ സിനിമകളിലെ ആക്ഷന്‍ സീക്വന്‍സുകളൊക്കെ സൈനികമായ രീതിയിലുള്ളതാണല്ലോ? ഓരോ പുതിയ കാര്യം പറയുമ്പോഴും ഒരു ചെറിയ കുട്ടിയുടെ കൗതുകത്തോടെയാണ് അദ്ദേഹം കേട്ടിരിക്കാറ്. നമ്മളെ വിസ്മയിപ്പിക്കുന്ന രീതിയില്‍ ക്യാമറയ്ക്ക് മുന്നില്‍ അത് നടപ്പാക്കുകയും ചെയ്യും അദ്ദേഹം.

മമ്മൂട്ടിക്കൊപ്പം ഒരൊറ്റത്തവണ

മമ്മൂട്ടിയെ നായകനാക്കി മേജര്‍ രവി സംവിധാനം ചെയ്ത ചിത്രമാണ് മിഷന്‍ 90 ഡേയ്സ്. ഇടയ്ക്ക് അദ്ദേഹത്തെ നായകനാക്കി ചിത്രം ചെയ്യാന്‍ ആലോചിച്ചിരുന്നു. എന്നാല്‍ പറ്റിയ ഒരു വിഷയം കിട്ടാത്തതിനാല്‍ അതു വേണ്ടെന്നു വെക്കുകയായിരുന്നു.

സൈനിക പശ്ചാത്തലമില്ലാത്ത ചിത്രം ചെയ്യും

ആക്ഷന് പ്രാധാന്യമുള്ള ഒരു സിനിമ ചെയ്യാനുള്ള താല്‍പര്യം അദ്ദേഹം നേരത്തേ അറിയിച്ചിരുന്നു. പക്ഷേ മമ്മൂക്കയ്ക്ക് ഒരു പ്രോജക്ടുമായി വരുമ്പോള്‍ അതിനുതക്കവണ്ണമുള്ള ഒന്നാവണ്ടേ? അത്തരം ഒരു വിഷയത്തിനായുള്ള കാത്തിരിപ്പിലായിരുന്നു. മമ്മൂക്കയൊത്ത് ഇനി ചെയ്യുന്ന ചിത്രം സൈനികപശ്ചാത്തലത്തില്‍ ഉള്ളതാവില്ല.