എന്ത് കൊണ്ട് മമ്മൂട്ടി മികച്ച നടന്‍ ആയില്ല? ദേശീയ പുരസ്‌കാരത്തെ കുറിച്ച് മേജര്‍ രവി പറയുന്നു

എന്ത് കൊണ്ടാണ് മമ്മൂട്ടിയ്ക്കും പേരന്‍പിനും ദേശീയ ചലച്ചിത്ര പുരസ്‌കാരം ലഭിക്കാതെ പോയതെന്ന് സംവിധായകന്‍ മേജര്‍ രവി പറഞ്ഞിരിക്കുകയാണ്. 'പേരന്‍പ് ഞാനും മറ്റ് ജൂറി അംഗങ്ങളും ഏറെ പ്രതീക്ഷയോടെ വീക്ഷിച്ച ചിത്രമായിരുന്നു. എന്നാല്‍ രണ്ടാം പകുതിയില്‍ സിനിമ എവിടെയൊക്കെയോ വലിഞ്ഞ് പോയിട്ടുണ്ട്.

ഇഴച്ചില്‍ മമ്മൂട്ടിയുടെ പ്രകടനത്തില്‍ നിന്നുള്ള ശ്രദ്ധ വ്യതിചലിപ്പിച്ചു. രണ്ടാം പകുതിയില്‍ വലിച്ചിലുണ്ടെന്ന് പറഞ്ഞാണ് സിനിമ പിറകിലേക്ക് തള്ളി പോകുന്നത്. എന്നാല്‍ മമ്മൂട്ടിയുടെ പേര് അവസാന റൗണ്ടില്‍ വരെ ഉണ്ടായിരുന്നു'.

ഞാനും മമ്മൂട്ടിയ്ക്ക് വേണ്ടി ഏറെ വാദിച്ചിരുന്നു. മമ്മൂട്ടിയുടെ കാര്യത്തില്‍ കേവലം ഒരു പരാമര്‍ശമോ അവാര്‍ഡ് പങ്കിടലോ സാധിക്കില്ല. നല്‍കുകയാണെങ്കില്‍ മികച്ച നടനുള്ള പുരസ്‌കാരം തന്നെ കൊടുക്കേണ്ടി വരുമെന്നും മേജര്‍ രവി പ്രതികരിക്കുന്നു. ഉറി- ദ സര്‍ജിക്കല്‍ സ്‌ട്രൈക്ക് എന്ന ചിത്രത്തോട് പ്രത്യേക താല്‍പര്യം ഉണ്ടായിട്ടില്ല.

ജൂറിയിലെ പത്ത് പേരും പത്ത് അഭിപ്രായമാണ് പറഞ്ഞത്. പലവട്ടം വഴക്കിട്ട് ടേബിള്‍ വിട്ട് പോയിട്ടുണ്ട്. ഉത്തരേന്ത്യയില്‍ ചിത്രത്തിന് ലഭിച്ച വലിയ ജനപ്രീതിയാണ് അവാര്‍ഡിന് പരിഗണിക്കാന്‍ കാരണമായത്. കേന്ദ്ര സര്‍ക്കാരിന്റെ രഹസ്യ അജണ്ട ദേശീയ പുരസ്‌കാരത്തില്‍ ഉണ്ടായിട്ടില്ലെന്നും മേജര്‍ രവി പറയുന്നു.