മമ്മൂട്ടിയ്ക്കും രാജീവ് പിള്ളയ്ക്ക് രക്ഷിക്കാനായില്ല, മുന്‍ഷി വേണു മരണത്തിന് കീഴടങ്ങി

സിനിമയില്‍ വേണു

തിരുവനന്തപുരം വഴുതക്കാട് സ്വദേശിയായ വേണുവിനെ ജനശ്രദ്ധയിലെത്തിച്ചത് ഏഷ്യാനെറ്റിന്റെ ക്യാപ്‌സ്യൂള്‍ സറ്റയറായ മുന്‍ഷിയിലെ വേഷമാണ്. തുടര്‍ന്ന് പേരിനൊപ്പം 'മുന്‍ഷി' എന്ന പേരും പതിച്ചുകിട്ടി. കമല്‍ സംവിധാനം ചെയ്ത്, ദിലീപ് ഇരട്ടവേഷത്തിലെത്തിയ പച്ചക്കുതിരയിലൂടെയാണ് സിനിമാപ്രവേശം.

ചെയ്തു തീര്‍ത്തത്

തിളക്കം, ഛോട്ടാ മുംബൈ, കഥ പറയുമ്പോള്‍, ഉട്ടോപ്യയിലെ രാജാവ് തുടങ്ങി പിന്നീടുവന്ന നിരവധി സിനിമകളില്‍ രസികന്‍ കഥാപാത്രങ്ങളെ വേണു അവതരിപ്പിച്ചു. ചോട്ടാ മുംബൈ എന്ന ചിത്രത്തില്‍ ഷക്കീല വന്നോ എന്ന വേണുവിന്റെ ചോദ്യം ഇന്നും ട്രോള്‍ ബോക്‌സുകളില്‍ സജീവമാണ്.

കഷ്ടപ്പാടുകളിലൂടെ ജീവിതം

ബന്ധുക്കള്‍ അധികമില്ലാത്ത വേണു പത്തുവര്‍ഷത്തോളമായി ചാലക്കുടിയിലെ ഒരു ലോഡ്ജിലായിരുന്നു താമസം. രോഗബാധിതനായതോടെ സിനിമകളിലേക്ക് ആരും വിളിക്കാതെയായി. വാടക കൊടുക്കാന്‍ കഴിയാതെവന്നതോടെ അവസാനം ലോഡ്ജില്‍ നിന്നും പടിയിറങ്ങേണ്ടിവന്നു.

അമ്മ സഹായിച്ചില്ല

താരസംഘടനയായ അമ്മയില്‍ അംഗമല്ലാത്തതിനാല്‍ അവിടെനിന്നുള്ള സഹായം വേണുവിന് ലഭിച്ചില്ല. എഴുപതോളം സിനിമകളില്‍ ചെറുതും വലുതുമായ കഥാപാത്രങ്ങള്‍ അഭിനയിച്ചിട്ടുണ്ടെങ്കിലും അംഗത്വ ഫീസ് നല്‍കാനില്ലാത്തതിനാലാണ് അമ്മയില്‍ അംഗത്വം എടുക്കാതിരുന്നത്.