'ആട് ജീവിതം പൂർത്തിയാക്കണം, അതിനായി ഉടൻ ബ്രേക്ക് എടുക്കും'-പൃഥ്വിരാജ്

കുരുതിക്ക് ശേഷം റിലീസിനൊരുങ്ങുന്ന ഏറ്റവും പുതിയ പൃഥ്വിരാജ് സിനിമയാണ് ഭ്രമം. സിനിമ ആമസോൺ പ്രൈമിൽ ഒക്ടോബർ ഏഴിന് റിലീസ് ചെയ്യും. അന്ധാധുൻ എന്ന സിനിമയോടുള്ള മത്സരമായിട്ടല്ല ഭ്രമം റീമേക്ക് ചെയ്യാൻ ഉദ്ദേശിച്ചതെന്നും ആ കഥാസന്ദർഭം മലയാളത്തിലേക്ക് എത്തുമ്പോൾ എങ്ങനെയായിരിക്കുമെന്ന് അനുഭവിക്കുന്നതിന് വേണ്ടിയാണ് റീമേക്ക് ചെയ്യാൻ ഉദ്ദേശിച്ചതെന്നുമാണ് പൃഥ്വിരാജ് പറയുന്നത്. അന്ധനായി അഭിനയിക്കുന്ന ഒരാളായി അഭിനയിക്കുക എന്നത് വളെ ചലഞ്ചിങ്ങായി തോന്നിയിരുന്നുവെന്നും പൃഥ്വിരാജ് പറയുന്നു. ശങ്കറിനെ പോലൊരു സീനിയർ നടനെ ഭ്രമത്തിലൂടെ വീണ്ടും മലയാളിക്ക് മുമ്പിൽ അവതരിപ്പിക്കാൻ സാധിക്കുന്നത് സന്തോഷം നൽകുന്ന കാര്യമാണെന്നും പൃഥ്വിരാജ് പറയുന്നു. ചിത്രം റീമേക്ക് ചെയ്യാൻ ഉദ്ദേശിച്ചപ്പോഴെ ശങ്കറിനെ സിനിമയുടെ ഭാ​ഗമാക്കാൻ തീരുമാനിച്ചിരുന്നുവെന്നും അദ്ദേഹം അല്ലാതെ മറ്റൊരാൾ ആ കഥാപാത്രം ചെയ്യുന്നതിനെ കുറിച്ച് ചിന്തിച്ചിരുന്നില്ലെന്നും പൃഥ്വിരാജ് പറഞ്ഞു. പൃഥ്വിരാജിന് പുറമെ ഉണ്ണി മുകുന്ദൻ, റാഷി ഖന്ന, മംമ്ത തുടങ്ങിയവരെല്ലാം സിനിമയുടെ ഭാ​ഗമായിട്ടുണ്ട്.

'മലയാള സിനിമ ഒടിടിയിലേക്ക് ചുരുങ്ങുകയല്ല ചെയ്തത്.. ലോകം മുഴുവൻ മലയാള സിനിമ ശ്രദ്ധിക്കപ്പെടാൻ തുടങ്ങിയതിന്റെ പോസറ്റീവ് വശം കാണാനാണ് ഇഷ്ടപ്പെടുന്നത്. ഒടിടിയിലൂടെ മലയാള സിനിമ വേറൊരു തലത്തിലേക്ക് ഉയർന്നു. ഒടിടിയിലേക്ക് സിനിമകൾ റിലീസ് ചെയ്താലും തിയേറ്ററുകൾ തുറക്കുന്നത് അനുസരിച്ച് വലിയ കാൻവാസിലുള്ള ചിത്രങ്ങൾ കാണാൻ ആളുകൾ എന്തായാലും എത്തും' പൃഥ്വിരാജ് പറയുന്നു

'ഇപ്പോൾ അൽഫോൺസ് പുത്രൻ സിനിമ ​ഗോൾഡ് കേസിലാണ് അഭിനയിക്കുന്നത്. ഈ സിനിമയുടെ ഏറ്റവും വലയി പ്രത്യേകത അൽഫോൺസ് പുത്രൻ വീണ്ടും സംവിധാനം ചെയ്യുന്ന സിനിമ എന്നത് തന്നെയാണ്. ​ഗോൾഡിന് ശേഷം കടുവ പൂർത്തീകരിക്കും. ഏറെ പ്രതീക്ഷയുള്ള ഒരു സിനിമ കൂടിയാണത്. ശേഷം ഒരു ബ്രേക്ക് എടുത്ത് ആടു ജീവിതത്തിന് വേണ്ടിയുള്ള തയ്യാറെടുപ്പുകളിലായിരിക്കും. ചില ട്രാൻസ്ഫോമേഷനുകൾ ആട് ജീവിതത്തിന്റെ രണ്ടാം ഭാ​ഗത്തിന് ആവശ്യമുണ്ട് ശേഷം ഫെബ്രുവരിയോടെ ചിത്രത്തിന്റെ ഷൂട്ടിങിനായി പോകും.' പൃഥ്വിരാജ് പറഞ്ഞു. എമ്പുരാനെ കുറിച്ച് ഇപ്പോൾ ചിന്തിക്കാൻ സാധിക്കുന്നില്ലെന്നും ലൊക്കേഷൻ കാണാൻ പോലും പോകാൻ പറ്റാത്ത സാഹചര്യമാണെന്നുമാണ് പൃഥ്വിരാജ് പറയുന്നത്. ലോകത്തിന്റെ അവസ്ഥയിൽ മാറ്റം വരുന്നത് അനുസരിച്ച് അടുത്ത വർഷത്തടെ സിനിമയുമായി ബന്ധപ്പെട്ടുള്ള പ്രവൃത്തികൾ ആരംഭിച്ചേക്കുമെന്നും പൃഥ്വിരാജ് കൂട്ടിച്ചേർത്തു.

Recommended Video

സിനിമയില്‍ വേറിട്ട മേക്ക്ഓവറില്‍ സൂപ്പര്‍താരം | Filmibeat Malayalam

പൃഥ്വിരാജിനെ നായകനാക്കി രവി.കെ.ചന്ദ്രന്‍ സംവിധാനം ചെയ്ത സിനിമയാണ് ഭ്രമം. 'റേ മാത്യൂസ്' എന്ന നിഗൂഢതകള്‍ ഒളിപ്പിച്ച ഒരു പിയാനിസ്റ്റിന്‍റെ വേഷമാണ് ചിത്രത്തില്‍ പൃഥ്വിരാജിന്. കൂടാതെ ബ്രോ ഡാഡി എന്ന പൃഥ്വിരാജ് സിനിമയും റിലീസിന് തയ്യാറെടുക്കുകയാണ്. മോഹൻലാൽ നായകനായ സിനിമയുടെ റൈറ്റ്സ് ഹോട്ട്സ്റ്റാറിന് വിറ്റതായി വാർത്തകൾ വന്നിരുന്നു. എന്നാൽ ഇതുവരെയും സ്ഥിരീകരണം വന്നിട്ടില്ല.