റെക്കോര്‍ഡുകള്‍ തകര്‍ത്തെറിഞ്ഞ് മാമാങ്കം! ബോക്‌സോഫീസിനെ വിറപ്പിച്ച സിനിമ പുതിയ ഉയരങ്ങളിലെത്തി

45 രാജ്യങ്ങളില്‍ ഒന്നിച്ച് 2000 സ്‌ക്രീനുകളിലായിരുന്നു മാമാങ്കം റിലീസ് ചെയ്തത്. റിലീസിനെത്തി രണ്ടാം ആഴ്ചയിലേക്ക് കടന്നിരിക്കുന്ന മാമാങ്കം ഇപ്പോഴും അതേ രീതിയില്‍ തന്നെയാണ് പ്രദര്‍ശനം നടത്തുന്നത്. ഇതിനകം മുപ്പതിനായിരം ഷോ പൂര്‍ത്തിയാക്കിയെന്നാണ് പുതിയ റിപ്പോര്‍ട്ട്. പലയിടങ്ങളിലും ഇപ്പോഴും ഹൗസ്ഫുള്‍ ഷോ നടക്കുന്നുണ്ട്. കേരളത്തിലും പുറത്തും വിദേശ രാജ്യങ്ങളിലുമെല്ലാം ഇത് തന്നെയാണ് സ്ഥിതി.

സമ്മിശ്ര പ്രതികരണങ്ങളാണ് സിനിമയെ കുറിച്ച് വന്നതെങ്കിലും ചരിത്ര സിനിമയാണെന്നുള്ളതും വലിയ മുതല്‍ മുടക്കിലൊരുക്കിയ സാങ്കേതിക വിദ്യകളും മാമാങ്കത്തെ മറ്റ് സിനിമകളില്‍ നിന്നും വേറിട്ട് നിര്‍ത്തിയിരിക്കുകയാണ്. മമ്മൂട്ടി, ഉണ്ണി മുകുന്ദന്‍, മാസ്റ്റര്‍ അച്യുതന്‍ എന്നിവരുടെ പ്രകടനത്തിനാണ് ഏറ്റവുമധികം പ്രേക്ഷക പ്രശംസ ലഭിച്ചിരിക്കുന്നത്. ഇതല്ലാതെ ശ്രദ്ധേമായ ഒത്തിരി കഥാപാത്രങ്ങളെ അവതരിപ്പിച്ച താരങ്ങളും വാര്‍ത്തകളില്‍ നിറഞ്ഞ് കൊണ്ടിരിക്കുകയാണ്.

റിലീസ് ദിവസം ആഗോളതലത്തില്‍ 23 കോടിയ്ക്ക് മുകളില്‍ കളക്ഷന്‍ ലഭിച്ചെന്നാണ് നിര്‍മാതാവ് വ്യക്തമാക്കിയത്. നാല് ദിവസം കൊണ്ട് അറുപത് കോടിയിലെത്തി. ലൂസിഫറിന് ശേഷം കോടികള്‍ വാരിക്കൂട്ടി ബോക്‌സോഫീസിനെ വിറപ്പിച്ച മറ്റൊരു സിനിമയായി ഇതോടെ മാമാങ്കം മാറി. നൂറ് കോടി ക്ലബ്ബിലേക്ക് അധിക ദൂരമില്ലെന്നാണ് റിപ്പോര്‍ട്ടുകളില്‍ നിന്നും മനസിവാവുന്നത്. വരും ദിസങ്ങളില്‍ പുതിയ കണക്ക് വിവരം സിനിമയുടെ അണിയറ പ്രവര്‍ത്തകര്‍ പുറത്ത് വിടുമെന്നാണ് കരുതുന്നത്.

അതേ സമയം മാമാങ്കം ചൈനയിലേക്ക് കൂടി റിലീസ് ചെയ്യുകയാണെന്നാണ് ഏറ്റവും പുതിയ വിവരങ്ങള്‍. ഇതിനകം 45 രാജ്യങ്ങളില്‍ സിനിമ എത്തിച്ചു. ആയോധനകലകള്‍ക്ക് പ്രധാന്യം നല്‍കി ഒരുക്കിയിരിക്കുന്ന സിനിമ ആയതിനാല്‍ ചൈനയില്‍ തരംഗമുണ്ടാക്കാന്‍ മാമാങ്കത്തിന് കഴിയുമെന്നാണ് സൂചന. നേരത്തെ മലയാളത്തില്‍ നിന്നും പല സിനിമകളും ചൈനയിലെത്തിക്കാന്‍ ശ്രമിച്ചിരുന്നെങ്കിലും റിലീസ് സാധിച്ചിരുന്നില്ല. ഇതോടെ ചൈനയില്‍ റിലീസ് ചെയ്യുന്ന ആദ്യ മലയാള സിനിമയെന്ന നേട്ടം മാമാങ്കത്തിന് സ്വന്തമാക്കാം.