സെക്യൂരിറ്റിമാരെയെല്ലാം തള്ളി മാറ്റി മമ്മൂട്ടി വിജയ് യുടെ അടുത്തു വന്നു, അഭിനന്ദിച്ചു

ആഘോഷം നിറഞ്ഞ രാവില്‍ താരസമ്പന്നമായിട്ടാണ് അറുപത്തിമൂന്നാമത് ബ്രിട്ടാനിയ ഫിലിം ഫെയര്‍ പുരസ്‌കാര ദാനം നടന്നത്. തമിഴിലെയും തെലുങ്കിലെയും മലയാളത്തിലെയും കന്നടയിലെയുമെല്ലാം സൂപ്പര്‍താരങ്ങളും യുവതാരങ്ങളും പരിപാടിയില്‍ പങ്കെടുത്തു.

മമ്മൂട്ടിയും ചിരജ്ജീവിയുമായിരുന്നു ചടങ്ങിലെ മെഗാതാരങ്ങള്‍. പരിപാടിയുടെ വേദിയിലേക്ക് കടക്കവെ മമ്മൂട്ടിയ്ക്ക് ചുറ്റും സെക്യൂരിമാര്‍ ഉണ്ടായിരുന്നു. ആരാധകരുടെ തൊട്ടലും തോണ്ടലും ഒഴിവാക്കി അദ്ദേഹത്തെ സുരക്ഷിതനായി ഇരിപ്പിടത്തില്‍ എത്തിക്കുകയാണ് അവരുടെ ലക്ഷ്യം.

എന്നാല്‍ സദസ്സിലേക്കുള്ള നടത്തത്തില്‍ ഒരാളെ കണ്ടപ്പോള്‍ മമ്മൂട്ടി ഒന്ന് നിന്നു. പിന്നെ സെക്യൂരിറ്റിമാരെ എല്ലാം മാറ്റി അയാളുടെ അടുത്തേക്ക് പോയി. അത് മറ്റാരുമായിരുന്നില്ല, ഈ വര്‍ഷത്തെ മികച്ച നടനുള്ള ദേശീയ പുരസ്‌കാരം നേടിയ സഞ്ചാരി വിജയ്!

നാല് തവണ ദേശീയ പുരസ്‌കാരം നേടിയ മമ്മൂട്ടി വിജയ് യെ അഭിനന്ദിച്ചു. കന്നടയില്‍ നിന്ന് ആദ്യമായി മികച്ച നടനുള്ള പുരസ്‌കാരം സ്വീകരിച്ച ആളാണ് വിജയ്. മമ്മൂട്ടിയെ പോലുള്ള ഒരാളുടെ പ്രശംസ നടന് വലിയ സന്തോഷം നല്‍കി. അദ്ദേഹത്തിനൊപ്പം ഒരു സെല്‍ഫിക്ക് പോസ് കൊടുത്ത ശേഷമാണ് മമ്മൂട്ടി പിന്നെ ഇരിപ്പിടത്തിലേക്ക് പോയത്.