സൂപ്പര്‍ താരമല്ല, സൂപ്പര്‍ നടന്‍!!! ഷൂട്ടിംഗ് പൂര്‍ത്തിയാക്കിയിട്ടും പ്രതിഫലം വാങ്ങാതെ മമ്മൂട്ടി!

ജോയ് മാത്യുവിന്റെ തിരക്കഥ

ആറ് ഭാഷകളിലേക്ക് റീമേക്ക് ചെയ്യപ്പെടുകയും പ്രേക്ഷകരുടേയും നിരൂപകരുടേയും പ്രശംസയ്ക്ക് പാത്രമാവുകയും ചെയ്ത ഷട്ടറിന് ശേഷം ജോയ് മാത്യു തിരക്കഥ എഴുതിയ ചിത്രമാണ് അങ്കിള്‍. മമ്മൂട്ടി നായകനായി എത്തിയ ചിത്രം സംവിധാനം ചെയ്യുന്നത് ഗിരീഷ് ദാമോദരനാണ്.

ജോയ് മാത്യുവില്‍ നിന്ന് മമ്മൂട്ടിയിലേക്ക്

ചിത്രത്തിലെ കേന്ദ്രകഥാപാത്രമായ കെകെ എന്ന കഥാപാത്രത്തെ ജോയ് മാത്യു അവതരിപ്പിക്കാനിരിക്കുകയായിരുന്നു. പിന്നീടാണ് ആ കഥാപാത്രം മമ്മൂട്ടിയിലേക്ക് എത്തിയത്. മമ്മൂട്ടി ആ കഥാപാത്രത്തിലേക്ക് എത്തിയതും പിന്നീടുണ്ടായ കാര്യങ്ങളും ഒരു അഭിമുഖത്തില്‍ ജോയ് മാത്യു വെളിപ്പെടുത്തുകയുണ്ടായി.

മമ്മൂട്ടി കെകെ ആകുന്നു

പുത്തന്‍ പണത്തില്‍ അഭിനയിക്കാന്‍ ചെന്നപ്പോഴായിരുന്നു അങ്കിളിന്റെ കഥ ജോയ് മാത്യു മമ്മൂട്ടിയോട് പറയുന്നത്. ബോധപൂര്‍വ്വമായിരുന്നില്ല ആ കഥ പറച്ചില്‍. സംസാരിത്തിനിടെ അങ്കിളിലേക്ക് എത്തിപ്പെടുകയായിരുന്നു. കഥ കേട്ടുകഴിഞ്ഞപ്പോള്‍ ജോയ് മാത്യു അവതരിപ്പിക്കാനിരുന്ന കെകെ എന്ന കഥാപാത്രത്തെ മമ്മൂട്ടി ഏറ്റെടുക്കുകയായിരുന്നു.

പ്രതിഫലം വാങ്ങിയില്ല

വയനാട്, കോഴിക്കോട്, ഊട്ടി എന്നിവയായിരുന്നു അങ്കിളിന്റെ പ്രധാന ലൊക്കേഷനുകള്‍. 25 ദിവസം തുടര്‍ച്ചയായി ഈ വിവിധ ലൊക്കേഷനുകളില്‍ മമ്മൂട്ടി അഭിനയിച്ചു. ഇതിനോടകം ചിത്രീകരണം പൂര്‍ത്തിയായ ചിത്രത്തിന് മമ്മൂട്ടി ഇതുവരെ പ്രതിഫലം വാങ്ങിയിട്ടില്ല.

നല്ല മനസ്

നല്ല ചിത്രത്തെ തിരിച്ചറിയാനുള്ള മമ്മൂട്ടിയുടെ നല്ല മനസിന് മുന്നില്‍ നമിക്കുന്നു. മമ്മൂട്ടി എന്ന താരത്തെ മാറ്റി നിര്‍ത്തി മമ്മൂട്ടി എന്ന നടനെ അവതരിപ്പിക്കുന്ന ചിത്രമാണ് അങ്കിള്‍. ഇടത്തംര കുടുംബത്തില്‍ സംഭവിക്കാന്‍ സാധ്യതയുള്ള കാലിക പ്രസക്തിയുള്ള ഒരു പൊള്ളുന്ന വിഷയമാണ് ചിത്രത്തിന്റെ കരുത്ത്, ജോയ് മാത്യു പറഞ്ഞു.

പ്രതീക്ഷ നല്‍കുന്ന ചിത്രം

മമ്മൂട്ടി എന്ന താരത്തിനപ്പുറം നടനെ ഉപയോഗപ്പെടുത്തുന്ന ചിത്രം ഏറെ പ്രതീക്ഷ നല്‍കുന്ന കുടുംബ ചിത്രമാണ്. നെഗറ്റീവ് ഷേഡുള്ള കഥപാത്രമാണ് മമ്മൂട്ടിയുടെ കെകെ എന്നാണ് പുറത്ത് വരുന്ന റിപ്പോര്‍ട്ടുകള്‍. ജനുവരിയിലോ ഫെബ്രുവരിയിലോ ചിത്രം പ്രദര്‍ശനത്തിന് എത്തുമെന്നാണ് പ്രതീക്ഷിക്കുന്നത്.