മകളെ തനിച്ചാക്കി ഭാര്യയ്ക്ക് പിന്നാലെ യാത്രയായി, നിർമാതാവ് നൗഷാദ് അന്തരിച്ചു

നൗഷാദിന് ആദരാഞ്ജലികൾ അർപ്പിച്ച് കൊണ്ട് മലയാള സിനിമാ ലോകവും ആരാധകരും എത്തിയിട്ടുണ്ട്. മമ്മൂട്ടി, മോഹൻലാൽ, ബി ഉണ്ണികൃഷ്ണൻ, അ‍ജു വർഗീസ്, വിനയ് ഫോർട്ട്, ടൊവിനോ തോമസ്,നിർമ്മാതാവ് ആന്റോ ജോസഫ് തുടങ്ങിയവർ അദ്ദേഹത്തെ അനുസ്മരിച്ചു. ''അത്രയും പ്രിയപ്പെട്ട എന്റെ നൗഷുമോൻ യാത്രയായി..ഷീബയുടെ അടുത്തേയ്ക്ക്.. ദിവസങ്ങളുടെ മാത്രം ഇടവേളയിൽ സ്വർഗത്തിൽ അവർ ഒരുമിച്ചു. സ്നേഹിതാ... പ്രിയപ്പെട്ടവൾക്കൊപ്പം അവിടെ വിശ്രമിക്കുക.. പരമകാരുണികനായ അള്ളാഹു ഭൂമിയിൽ നഷ്‌വ മോളെ ചേർത്തു പിടിച്ചു കൊള്ളും'' -ആന്റോ ജോസഫ് കുറിച്ചു.

കഴിഞ്ഞ കുറച്ച് നാളുകളായി തിരുവല്ലയിലെ ആശുപത്രിയിൽ ചികിത്സയിലായിരുന്നു നൗഷാദ്. വെള്ളിയാഴ്ച രാവിലെ 8.30 ന് ആയിരുന്നു അന്ത്യം. മൂന്ന് വർഷം മുൻപ് ഉദര സംബന്ധമായ രോഗത്തിന് നൗഷാദ് ചികിത്സ തേടിയിരുന്നു. ഭാരം കുറയ്ക്കുന്നത് ഉൾപ്പെടെയുള്ള ചികിത്സ നടത്തിരുന്നു. എന്നാൽ ഇത് വിജയിച്ചെങ്കിലും നട്ടെല്ലിനുണ്ടായ തകരാറിനെ തുടർന്ന് ഒരു വർഷത്തിലേറ കൊച്ചിയിലെ ആസ്റ്റർ മെഡിസിറ്റിയിൽ ചികിത്സ നേടുകയായിരുന്നു. ഇതിന് ശേഷമാണ് പിന്നീട് തിരുവല്ലയിലേയ്ക്ക് മറ്റിയത്. രണ്ടാഴ്ച മുൻപായിരുന്നു ഹൃദയാഘാതത്ത തുടർന്ന് നൗഷാദിന്റെ ഭാര്യ ഷീബ അന്തരിച്ചത്. നഷ് വയാണ് ഇവരുടെ ഏക മകൾ.

പ്രമുഖ കേറ്ററിങ് റസ്റ്റ്റ്റന്റ് ശ്യംഖലയായ നൗഷാദ് ബിഗ് ഷെഫിന്റെ ഉടമയാണ് നൗഷാദ്. മൂന്ന് പതിറ്റാണ്ടായി പാചക രംഗത്ത് പ്രവർത്തിക്കുന്ന നൗഷാദ് ആയിരക്കണക്കിന് വിവാഹങ്ങൾക്ക് ഭക്ഷണം ഒരുക്കിയിട്ടുണ്ട്. പിതാവിൽ നിന്നാണ് നൗഷാദിന് പാചകത്തിനോടുളള താൽപര്യം പകർന്ന് കിട്ടുന്നത്. കോളേജ് വിദ്യാഭ്യാസത്തിന് ശേഷം ഹോട്ടൽ മാനേജ്മെന്റ് പഠിച്ച നൗഷാദ് കേറ്ററിങ് ബിസിനസ്സിൽ പുതിയ സാധ്യത കണ്ടെത്തി വികസിപ്പിക്കുകയായിരുന്നു. വിദേശത്തും നൗഷാദിന്റെ കേറ്ററിങ് പ്രശസ്തമാണ്. സിനിമ നിർമ്മാതാവ് മാത്രമല്ല ടെലിവിഷനിലും അദ്ദേഹം സജീവമാണ്. പാചക പരിപാടികളുമായി അദ്ദേഹം രംഗത്ത് എത്താറുണ്ട്. കുക്കറി ഷോകളിൽ അവതാരകനായും പ്രവർത്തിച്ചിട്ടുണ്ട്.

ബ്ലെസി സംവിധാനം ചെയ്ത കാഴ്ച എന്ന ചിത്രത്തിലൂടെയാണ് സിനിമ നിർമ്മാണ രംഗത്ത് എത്തുന്നത്. സ്കൂളിലും കോളേജിലും നൗഷാദിന്റെ സഹപാഠിയായിരുന്നു ബ്ലെസി. പിന്നീട്, ചട്ടമ്പിനാട്, ബെസ്റ്റ് ആക്ടർ, ലയൺ, പയ്യൻസ്, സ്പാനിഷ് മസാല എന്നീ സിനിമകൾ കൂടി നിർമിച്ചു.