മെഗാസ്റ്റാറിന്റെ സിബിഐ അഞ്ചാം ഭാഗം ഉടന്‍! ബാസ്‌ക്കറ്റ് കില്ലിങ് പ്രമേയമാക്കി സിനിമ

മമ്മൂട്ടി, കെ മധു, തിരക്കഥാകൃത്ത് എസ്എന്‍ സ്വാമി, സംഗീത സംവിധായകന്‍ ശ്യാം തുടങ്ങിയവര്‍ വീണ്ടും ഒന്നിക്കുന്നുവെന്ന പ്രത്യേകതകളോടെയാണ് സിബിഐ സീരീസിലെ അഞ്ചാമത്തെ ചിത്രം വരുന്നത്. ക്രൂരമായ കൊലപാതകങ്ങളുടെ രഹസ്യമഴിക്കാന്‍ സേതുരാമയ്യര്‍ വീണ്ടും എത്തുന്നതാണ് ചിത്രത്തിന്റെ പ്രമേയം. ബാസ്‌ക്കറ്റ് കില്ലിങ്ങിലൂടെയാണ് സിനിമയുടെ കഥാ വികാസമെന്നും അറിയുന്നു.

അഞ്ചാം ഭാഗം ക്രൂരമായ ജീവനൊടുക്കലുകളുടെ ഉളളറകളിലേക്ക് ആഴത്തിലിറങ്ങുന്ന ഇന്‍വെസ്റ്റിഗേഷനാണ് അവതരിപ്പിക്കുക. ഇതുവരെ കണ്ടിട്ടില്ലാത്ത കൊലപാതക രീതികളാകും ചിത്രത്തിലേതെന്നും അറിയുന്നു. ബുദ്ധിതന്ത്രങ്ങളുടെ ചതുരംഗക്കളികള്‍ തന്നെയാകും ചിത്രത്തിന്റെ മികവെന്നും സംവിധായകന്‍ കെ മധു വൃക്തമാക്കിയിരുന്നു. എസ് എന്‍ സ്വാമിയുടെ തിരക്കഥയില്‍ ഒരുങ്ങുന്ന സിനിമ സ്വര്‍ഗചിത്ര അപ്പച്ചന്‍ തന്നെയാണ് നിര്‍മ്മിക്കുന്നത്.

പ്രസാദ് കണ്ണന്‍ മീഡിയ കണ്ടന്റ് കണ്‍സള്‍ട്ടന്റായി പ്രവര്‍ത്തിക്കുന്നു. മുന്‍പ് മലയാളത്തിലെ മറ്റൊരു കിടിലന്‍ ത്രില്ലര്‍ ചിത്രമായിരിക്കും സിബിഐ അഞ്ചാം ഭാഗമെന്ന് തിരക്കഥാകൃത്ത് എസ്എന്‍ സ്വാമി തുറന്നുപറഞ്ഞിരുന്നു. ഈ തിരക്കഥ ഒരുക്കുന്നതിന് വേണ്ടി താന്‍ മാനസികമായും അല്ലാതെയും ഒരുപാട് അധ്വാനിക്കേണ്ടി വന്നിരുന്നു. ഏറെ പരിശ്രമങ്ങള്‍ക്കൊടുവിലാണ് തിരക്കഥ പൂര്‍ത്തിയാക്കിയതെന്നും എസ് എന്‍ സ്വാമി നേരത്തെ വ്യക്തമാക്കിയിരുന്നു.

മമ്മൂട്ടിയുടെ പുതിയ സിബിഐ സിനിമയില്‍ ജഗതി ശ്രീകുമാറും എത്തുമെന്ന് റിപ്പോര്‍ട്ടുകളുണ്ടായിരുന്നു. വിക്രം എന്ന കഥാപാത്രമായിട്ടായിരുന്നു മുന്‍സിനിമകളില്‍ ജഗതി ശ്രീകുമാര്‍ അഭിനയിച്ചിരുന്നത്. ഏതായാലും വലിയ പ്രതീക്ഷകളോടെയാണ് മമ്മൂട്ടി ചിത്രത്തിനായി ആരാധകര്‍ ഒന്നടങ്കം കാത്തിരിക്കുന്നത്. മലയാളത്തില്‍ കൈനിറയെ സിനിമകളുമായി മുന്നേറുന്ന വേളയിലാണ് സൂപ്പര്‍ താരത്തിന്റെ പുതിയ സിനിമയുടെ പ്രഖ്യാപനവും നടന്നിരിക്കുന്നത്.