ഗാനഗന്ധര്‍വ്വന്‍ പോസ്റ്ററിലെ ആ നമ്പര്‍ കലാസദന്‍ ഉല്ലാസിന്റെത്! വേറിട്ട പ്രൊമോഷനുമായി അണിയറക്കാര്‍

ഗാനഗന്ധര്‍വ്വന്‍

ഗാനമേള ഗായകമായ കലാസദന്‍ ഉല്ലാസിന്റെ ജീവിതമാണ് ഗാനഗന്ധര്‍വന്‍ എന്ന ചിത്രത്തിലൂടെ കാണിക്കുന്നത്. മമ്മൂട്ടി ആദ്യമായിട്ടാണ് ഇത്തരമൊരു റോളില്‍ എത്തുന്നത്. ചരിത്ര പ്രാധാന്യമുളള സിനികളും മാസ് എന്റര്‍ടെയ്‌നറുകളും ചെയ്യുന്ന സമയത്താണ് ഇത്തരമൊരു സിനിമയുമായി മെഗാസ്റ്റാര്‍ എത്തുന്നത്. പഞ്ചവര്‍ണ്ണ തത്ത എന്ന സിനിമയ്ക്ക് ശേഷം രമേഷ് പിഷാരടി സംവിധാനം ചെയ്യുന്ന രണ്ടാമത്തെ സിനിമ കൂടിയാണിത്. ആദ്യ ചിത്രത്തില്‍ നിന്നും വേറിട്ടു നില്‍ക്കുന്ന പ്രമേയമാണ് സംവിധായകന്‍ പുതിയ സിനിമയില്‍ അവതരിപ്പിക്കുന്നത്, ഹാസ്യ രംഗങ്ങള്‍ ഒരുപാടുളള ചിത്രമാണ് രമേഷ് പിഷാരടിയില്‍ നിന്നും എല്ലാവരും പ്രതീക്ഷിക്കുന്നത്.

തരംഗമായ ഫസ്റ്റ്ലുക്ക്

ഗാനഗന്ധര്‍വ്വന്റെ ഫസ്റ്റ്‌ലുക്ക് പോസ്റ്റര്‍ കണ്ട് എല്ലാവരും ഒന്നടങ്കം ഞെട്ടിയിരുന്നു. ഒരു ഗാനമേള ട്രൂപ്പിന്റെ ബുക്കിംഗ് പോസ്റ്റര്‍ എന്ന നിലയില്‍ തയ്യാറാക്കിയ സിനിമയുടെ അല്ല, സിനിമയിലെ പോസ്റ്റര്‍ എന്ന ക്യാപ്ഷനോടെയാണ് ഫസ്റ്റ്‌ലുക്ക് എത്തിയിരുന്നത്. ചിത്രത്തിലെ താരങ്ങളെയെല്ലാം അണിയറപ്രവര്‍ത്തകര്‍ പോസ്റ്ററില്‍ കാണിച്ചിരുന്നു. ഒപ്പം തന്നെ ഗാനമേള ബുക്കിംഗിന് വിളിക്കേണ്ട നമ്പര്‍ എന്ന രീതിയില്‍ വ്യക്തമായി തന്നെ ഒരു നമ്പറും കൊടുത്തിരുന്നു. കൗതുകം മൂലം നിരവധി പേരായിരുന്നു ആ നമ്പറിലേക്ക് വിളിച്ചിരുന്നത്.

പ്രൊമോഷനായി സ്വന്തമാക്കിയ നമ്പര്‍

എന്നാല്‍ ആ നമ്പറിലേക്ക് വിളിച്ച ശേഷമായിരുന്നു എല്ലാവര്‍ക്കും കാര്യം പിടികിട്ടിയിരുന്നത്. ഗാനഗന്ധര്‍വ്വന്റെ അണിയറപ്രവര്‍ത്തകര്‍ പ്രൊമോഷനായി സ്വന്തമാക്കിയ നമ്പറായിരുന്നു അത്. കലാസദന്‍ ഉല്ലാസായിട്ടാണ് ചിത്രത്തില്‍ മമ്മൂക്ക എത്തുന്നത്. പോസ്റ്ററില്‍ നല്‍കിയ നമ്പറില്‍ വിളിച്ചാല്‍ കലാസദന്‍ ഉല്ലാസ് എന്ന പേരാണ് ട്രു കോളറില്‍ കാണാനാവുക. അണിയറപ്രവര്‍ത്തകര്‍ നല്‍കിയ നമ്പറിലേക്ക് വിളിച്ചാല്‍ ഗാനഗന്ധര്‍വ്വനായി കാത്തിരിക്കുക എന്ന പരസ്യ വാചകവും കേള്‍ക്കാനാകും.

വമ്പന്‍ താരനിര

അതേസമയം മമ്മൂക്കക്കൊപ്പം വമ്പന്‍ താരനിര തന്നെയാണ് രമേഷ് പിഷാരടിയുടെ ഗാനഗന്ധര്‍വ്വനില്‍ അണിനിരക്കുന്നത്. നാല് നായികമാരാണ് ചിത്രത്തിലുളളതെന്നും അറിയുന്നു. ഒപ്പം മനോജ് കെ ജയന്‍, സുരേഷ് കൃഷ്ണ, ഹരീഷ് കണാരന്‍, മണിയന്‍ പിള്ള രാജു, ധര്‍മജന്‍ ബോള്‍ഗാട്ടി എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു. ആന്റോ ജോസഫ് ഫിലിംസാണ് ചിത്രത്തിന്റെ വിതരണം ഏറ്റെടുത്തിരിക്കുന്നത്. രമേഷ് പിഷാരടിയും ഹരി പി നായരും ചേര്‍ന്നാണ് രചന നിര്‍വഹിച്ചിരിക്കുന്നത്. സെപ്റ്റംബര്‍ അവസാനത്തിലോ ഒക്റ്റോബര്‍ ആദ്യ വാരത്തിലോ സിനിമ തിയറ്ററുകളിലെത്തുമെന്നും റിപ്പോര്‍ട്ടുകള്‍ സൂചിപ്പിക്കുന്നു.