മമ്മൂക്ക ചെയ്യുന്ന വര്‍ക്കൗട്ട് കണ്ടാല്‍ അത്ഭുതപ്പെട്ടുപോകും, മെഗാസ്റ്റാറിനെ കുറിച്ച് പേഴ്‌സണല്‍ ട്രെയിനര്‍

മമ്മൂക്ക ചെയ്യുന്ന വര്‍ക്കൗട്ട് കണ്ടാല്‍ അത്ഭുതപ്പെട്ടുപോവുമെന്ന് വിബിന്‍ സേവ്യര്‍ പറയുന്നു. പക്ഷേ സോഷ്യല്‍ മീഡിയയില്‍ വര്‍ക്കൗട്ട് ചിത്രങ്ങള്‍ ഇടുന്നത് കുറവായതുകൊണ്ട് ആരും ഒന്നും അറിയുന്നില്ല എന്നുമാത്രം. 2007ലാണ് മമ്മൂക്കയ്ക്ക് വേണ്ടി രണ്ട് ചെറുപ്പക്കാര്‍ ഞാന്‍ വര്‍ക്ക് ചെയ്യുന്ന ഫിറ്റ്‌നെസ് സെന്ററിനെ കുറിച്ച് അന്വേഷിച്ച് എത്തിയതെന്ന് വിബിന്‍ പറയുന്നു.

അവര്‍ എഴുതി തന്ന ഫോം കമ്പ്യൂട്ടറില്‍ എന്റര്‍ ചെയ്യാന്‍ എടുത്തപ്പോഴാണ് പ്രൊഫഷന്റെ കോളത്തില്‍ ആക്ടര്‍ എന്ന് കണ്ടത്. പേര് മുഹമ്മദ് കുട്ടി. ദുല്‍ഖറും സുഹൃത്തുമാണ് അന്ന് വന്നത് എന്ന് അപ്പോഴാണ് അറിയുന്നത്. പിന്നീട് വന്ന ശേഷം എന്റെ യോഗ്യതകള്‍ ചോദിച്ചു. മുംബൈയില്‍ ഊര്‍മ്മിള മഡോദ്കറെ ട്രെയിന്‍ ചെയ്യിപ്പിച്ചിട്ടുണ്ട് എന്നറിഞ്ഞപ്പോള്‍ ചിരിച്ചുകൊണ്ട് പറഞ്ഞു, എനിക്ക് ഊര്‍മിളയാകേണ്ട, ഇനിയും അഭിനയിക്കാനുളള എനര്‍ജിയും ഫിറ്റ്‌നെസും വേണം. അതുമാത്രം മതി.

അന്ന് തന്നെ അദ്ദേഹത്തിന്റെ പേഴ്‌സണല്‍ ട്രെയിനറായി ജോയിന്‍ ചെയ്തു. ഇന്നും അതേ പദവിയില്‍. വിബിന്‍ സേവ്യര്‍ പറഞ്ഞു. നോമ്പ് സമയത്ത് പോലും അദ്ദേഹം വര്‍ക്കൗട്ട് മുടക്കാറില്ലെന്നും വിബിന്‍ പറയുന്നു. നോമ്പ് തുറന്ന് എന്തെങ്കിലും ചെറുതായി കഴിച്ച ശേഷം വര്‍ക്കൗട്ട് കഴിഞ്ഞിട്ടേ പ്രധാന ഭക്ഷണം കഴിക്കൂ. ഹോട്ടലുകള്‍ ആണെങ്കില്‍ അവിടുത്തെ ജിം അന്വേഷിക്കും. ആവശ്യമുളള എക്വിപ്‌മെന്റ്‌സ് ഇല്ലെങ്കില്‍ അറേഞ്ച് ചെയ്യും.

ആദ്യകാലത്ത് പല ട്രെയിനിങ് ഉപകരണങ്ങളും പറഞ്ഞ് ഉണ്ടാക്കിപ്പിക്കുമായിരുന്നു. എവിടെപ്പോകുമ്പോഴും ട്രാവല്‍ ബാഗില്‍ ചെറിയ ഡംബല്‍സ് കാണും. ഇപ്പോള്‍ കാരവാനില്‍ ജിം ഉണ്ടെന്നത് പോലും വാര്‍ത്തയല്ല. പക്ഷേ റെഡിമെയ്ഡ് ഡംബല്‍സ് കിട്ടാത്ത കാലത്താണ് മമ്മൂക്ക ഇതൊക്കെ ചെയ്തത്. രുചികരമായ ഭക്ഷണങ്ങള്‍ മമ്മൂക്കയ്ക്ക് ഏറെ ഇഷ്ടമാണെന്നും എന്നാല്‍ ഡയറ്റ് കൃത്യമായി പാലിക്കാന്‍ മമ്മൂക്കയെ കഴിഞ്ഞ ആളുളളൂവെന്നും വിബിന്‍ പറഞ്ഞു. തന്റെ കാരവാനില്‍ ഇഷ്ടപ്പെട്ടവരെ വിളിച്ച് രുചികരമായ ഭക്ഷണം നല്‍കി സല്‍ക്കരിക്കുന്ന പതിവ് മമ്മൂക്കയ്ക്കുണ്ട്. പക്ഷേ കൂടെ കഴിക്കില്ല, നോക്കിയിരുന്ന് സന്തോഷിക്കും. വിബിന്‍ പറഞ്ഞു.