മലയാളത്തെ കൂടുതല്‍ ഉയരങ്ങളില്‍ എത്തിക്കുന്ന ചിത്രം!!! ടേക്ക് ഓഫിനെ പ്രശംസകൊണ്ട് മൂടി മഞ്ജുവാര്യര്‍!!

ഒറ്റവാക്കില്‍ ടേക്ക് ഓഫിനെ ഉജ്ജ്വലം എന്ന് വിശേഷിപ്പിക്കാമെന്നാണ് മഞ്ജുവാര്യരുടെ പക്ഷം. ഈ സിനിമ മലയാളത്തെ കൂടുതല്‍ ഉയരത്തിലെത്തിക്കുമെന്നും മഞ്ജു പറയുന്നു. തന്റെ ഫേസ്ബുക്ക് പോസ്റ്റിലാണ് മഞ്ജുാര്യര്‍ ഇക്കാര്യം വ്യക്തമാക്കിയത്.

രാജേഷ് പിള്ളയുടെ സ്മരണാര്‍ത്ഥം അദ്ദേഹത്തിനായി അദ്ദേഹത്തിന്റെ സുഹൃത്തുക്കള്‍ നിര്‍മിച്ച ചിത്രമാണ് ടേക്ക് ഓഫ്. ഈ വിജയം ആകാശത്തേക്ക് ടേക്ക് ഓഫ് ചെയ്യപ്പെടുമ്പോള്‍ അതിന്റെ ചെരുവിലെവിടെയോ ഞാന്‍ ഉണ്ടെന്ന് വിശ്വസിക്കുന്ന രാജേഷ് പിള്ളയെ തന്നെയാകും ചിത്രത്തിന്റെ വിജയം ഏറ്റവും കൂടുതല്‍ സന്തോഷിപ്പിക്കുക എന്നും മഞ്ജു തന്റെ പോസ്റ്റില്‍ കുറിക്കുന്നു.

ചിത്രത്തിലെ അഭിനേതാക്കളേയും മഞ്ജു അഭിനന്ദിക്കുന്നുണ്ട്. ചാക്കോച്ചനും ഫഹദും മത്സരിച്ച് അഭിനയിച്ചു. പാര്‍വതിയുടെ പ്രകടനത്തിന് പ്രശംസകളൊന്നും മതിയാകില്ല. അത്രയും അവിസ്മരണീയമാണത്. ആസിഫ് അലിയും മികച്ച പ്രകടനം കാഴ്ചവെച്ചെന്ന് മഞ്ജുവാര്യര്‍ കുറിക്കുന്നു. സംവിധായകന്‍ മഹേഷ് നാരായണനും നിര്‍മാതാവ് ആന്റോ ജോസഫിനുമുണ്ട് അഭിനന്ദനം.

യുദ്ധകാലത്ത് ഇറാഖില്‍ കുടുങ്ങിപ്പോകുന്ന മലയാളി നേഴ്‌സുമാരുടെ ജീവിതവും അതിജീവനവുമാണ് ടേക്ക് ഓഫ് പറയുന്നത്. മഹേഷ് നാരായണനും പിവി ഷാജികുമാറും ചേര്‍ന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. ചിത്രത്തിന്റെ ട്രെയിലര്‍ പുറത്തിറങ്ങിയപ്പോള്‍ തന്നെ ഒരു അന്താരാഷ്ട്ര നിലവാരമുള്ള ചിത്രമെന്ന് വിലയിരത്തപ്പെട്ടിരുന്നു. ആ നിരീക്ഷണത്തെ ശരിവയ്ക്കുന്നുണ്ട് സിനിമ.

മഞ്ജുവാര്യരുടെ ഫേസ്ബുക്ക് പോസ്റ്റ് കാണാം.