മോഹന്‍ലാലിന്റെ മകളാകണം, പൃഥ്വിരാജിന്റെ നായികയും!!! 'രാമച്ഛന്റെ നന്ദിനിക്കുട്ടി'യുടെ ആഗ്രഹങ്ങള്‍!!!

അമര്‍ അക്ബര്‍ അന്തോണിയിലെ പാത്തു

അമര്‍ അക്ബര്‍ അന്തോണി എന്ന ചിത്രത്തിലൂടെ ഒരു നൊമ്പരമായി പ്രേക്ഷക മനസിലേക്ക് കയറിയ ബാലതാരമാണ് മീനാക്ഷി. എന്നോ ഞാനെന്റെ മുറ്റത്തൊരറ്റത്ത് എന്ന് തുടങ്ങുന്ന ഗാനവും പാത്തു എന്ന കഥാപാത്രത്തേയും പ്രേക്ഷകര്‍ അത്ര പെട്ടന്നൊന്നും മറക്കില്ല.

ആദ്യ ചിത്രം വണ്‍ ബൈ ടു

പ്രേക്ഷകര്‍ മീനാക്ഷിയെ ഏറ്റെടുത്ത ചിത്രം അമര്‍ അക്ബര്‍ അന്തോണിയാണെങ്കിലും മീനാക്ഷിയുടെ ആദ്യ ചിത്രം അരുണ്‍കുമാര്‍ അരവിന്ദ് സംവിധാനം ചെയ്ത വണ്‍ ബൈ ടു ആയിരുന്നു. എന്നാല്‍ ചിത്രത്തിന്റെ ദൈര്‍ഘ്യം കൂടുതലായതിനാല്‍ മീനാക്ഷിയുടെ രംഗങ്ങള്‍ കട്ട് ചെയ്തു കളയുകയായിരുന്നു.

ആഗ്രഹം തുറന്ന് പറഞ്ഞ് മീനാക്ഷി

കൈരളി ചാനലിലെ ജെബി ജംഗ്ഷനില്‍ പങ്കെടുക്കവെയാണ് തന്റെ ആഗ്രഹം മീനാക്ഷി തുറന്ന് പറഞ്ഞത്. തനിക്ക് മോഹന്‍ലാലിന്റെ മകളായും പൃഥ്വിരാജിന്റെ നായികയായും അഭിനയിക്കാന്‍ ആഗ്രഹമുണ്ടെന്ന് മീനാക്ഷി പറഞ്ഞു. ഇരുവര്‍ക്കുമൊപ്പം ബാലതാരമായി മീനാക്ഷി അഭിനയിച്ചിട്ടുണ്ട്.

മോഹന്‍ലാലിന്റെ മകളായി

മോഹന്‍ലാലിനെ നായകനാക്കി പ്രിയദര്‍ശന്‍ ഒരുക്കിയ ഒപ്പത്തില്‍ മോഹന്‍ലാലിന്റെ മകള്‍ക്ക് തുല്യമായ കഥാപാത്രത്തെയാണ് മീനാക്ഷി അവതരിപ്പിച്ചത്. മോഹന്‍ലാലിന്റെ രഘുരാമന്‍ എന്ന കഥാപാത്രത്തെ രാമച്ഛന്‍ എന്ന് വിളിക്കുന്ന മീനാക്ഷിയുടെ കഥാപാത്രത്തെ മകളായി മോഹന്‍ലാല്‍ സ്വീകരിക്കുകയും ചെയ്യുന്നുണ്ട്.

നേരത്തേ പറഞ്ഞ ആഗ്രഹം

തനിക്ക് പൃഥ്വിരാജിന്റെ നായികയാകണം എന്ന ആഗ്രഹം മീനാക്ഷി നേരത്തെ വ്യക്തമാക്കിയിരുന്നു. അമര്‍ അക്ബര്‍ അന്തോണി പുറത്തിറങ്ങിയതിന് പിന്നാലെയായിരുന്നു ഇത്. തനിക്ക് പൃഥ്വിരാജിനെ പണ്ടേ ഇഷ്ടമാണെന്നും മീനാക്ഷി അന്ന് പറഞ്ഞിരുന്നു.

പൃഥ്വിരാജിന്റെ മറുപടി

മീനാക്ഷി തന്റെ ഈ ആഗ്രഹം പൃഥ്വിരാജിനോട് നേരത്തെ വെളിപ്പെടുത്തിയിരുന്നു. അമര്‍ അക്ബര്‍ അന്തോണിയില്‍ അഭിനയിക്കുന്ന സമയത്തായിരുന്നു തന്റെ ആഗ്രഹം മീനാക്ഷി പൃഥ്വിരാജിനോട് വെളിപ്പെടുത്തിയത്. നമിതയെ മാറ്റി പകരം മീനാക്ഷിയെ നായികയാക്കിയാലോ എന്നായിരുന്നു തമാശ രൂപേണയുള്ള പൃഥ്വിയുടെ മറുപടി.

ദേശീയ പുരസ്‌കാരം നേടിയ താരം

സിനിമയില്‍ എത്തുന്നതിന് മുമ്പേ ദേശീയ പുരസ്‌കാരം നേടിയ താരമാണ് മീനാക്ഷി. ആല്‍ബങ്ങളിലൂടെയും ടെലിസിനിമകളിലൂടെയുമായിരുന്നു മീനാക്ഷിയുടെ ആഭിനയ ജീവിതം ആരംഭിച്ചത്. വര്‍ഷം എന്ന ടെലിസിനിമയിലെ അഭിനയത്തിനായിരുന്നു മീനീക്ഷിക്ക് ദേശീയ പുരസ്‌കാരം ലഭിച്ചത്.