ഹോം

വാർത്ത

ആരാധകരുടെ സ്വന്തം താരങ്ങളിലൊരാളാണ് മേഘ്‌ന രാജ്. അഭിനയത്തില്‍ നിന്നും ഇടവേളയെടുത്ത് അമ്മ ജീവിതം ആസ്വദിക്കുകയാണ് താരം. അമ്മയാവും മുന്‍പായാണ് നടിക്ക് ഭര്‍ത്താവിനെ നഷ്ടമായത്. 10 വര്‍ഷത്തെ സൗഹൃദത്തിന് ശേഷമായാണ് ചിരഞ്ജീവി സര്‍ജ മേഘ്‌ന രാജിനെ വിവാഹം ചെയ്തത്. സിനിമാകുടുംബത്തിലേക്കായിരുന്നു മേഘ്‌ന മരുമകളായി ചെന്നത്. വിവാഹ ശേഷവും സിനിമയില്‍ സജീവമായിരുന്നു താരം. രണ്ടാം വിവാഹ വാര്‍ഷികം ആഘോഷിച്ച് നാളുകള്‍ പിന്നിടുന്നതിനിടയിലായിരുന്നു ആ വിയോഗം.

ഗര്‍ഭിണിയായ മേഘ്‌ന ഈ വിഷമഘട്ടത്തെ എങ്ങനെ അതിജീവിക്കുമെന്നോര്‍ത്തായിരുന്നു എല്ലാവരും സങ്കടപ്പെട്ടത്. പ്രിയതമന്റെ നെഞ്ചില്‍ വീണ് പൊട്ടിക്കരയുന്ന മേഘ്‌നയുടെ ചിത്രങ്ങളും വീഡിയോയുമെല്ലാം വൈറലായി മാറിയിരുന്നു. ചിരു എന്നും തനിക്കൊപ്പമുണ്ടെന്നും കുഞ്ഞിലൂടെ അദ്ദേഹം പുനര്‍ജനിക്കുമെന്നുമാണ് വിസ്വസിക്കുന്നതെന്നും താരം പറഞ്ഞിരുന്നു.

എല്ലാകാര്യങ്ങളിലും ചിരുവിന്റെ സാന്നിധ്യം ഉറപ്പുവരുത്തുന്ന മേഘ്‌നയെയായിരുന്നു പിന്നീട് എല്ലാവരും കണ്ടത്. ഗര്‍ഭിണിയായതിന് ശേഷമുളള ചടങ്ങുകളിലെല്ലാം ചിരുവിന്റെ സാന്നിധ്യമുണ്ടായിരുന്നു.

ചിരു ആഗ്രഹിച്ചത് പോലെ മകനായിരുന്നു ജനിച്ചത്. കാത്തിരിപ്പിനൊടുവിലായി മകനെത്തിയപ്പോള്‍ എല്ലാവരും വലിയ സന്തോഷത്തിലായിരുന്നു. അടുത്തിടെയായിരുന്നു കുഞ്ഞതിഥിയുടെ തൊട്ടില്‍ കെട്ട് ചടങ്ങ് നടത്തിയത്. വൈകാതെ തന്നെ പേരിടല്‍ ചടങ്ങ് നടത്തുമെന്നും താരകുടുബം അറിയിച്ചിരുന്നു.

അതിനിടയിലായിരുന്നു കുഞ്ഞുള്‍പ്പടെ മേഘ്‌നയുടെ കുടുംബത്തിലുള്ളവര്‍ക്ക് അസുഖം സ്ഥിരീകരിച്ചത്. മാതാപിതാക്കള്‍ക്ക് അസുഖമാണെന്നുള്ള വിവരം വന്നതിന് പിന്നാലെയായാണ് തനിക്കും കുഞ്ഞിനും അസുഖമുണ്ടെന്നും ആശങ്കപ്പെടാനൊന്നുമില്ലെന്നും അറിയിച്ച് മേഘ്‌ന എത്തിയത്.

മേഘ്‌നയുടെ മകനെ ആശുപത്രിയിലേക്ക് മാറ്റിയെന്ന തരത്തിലുള്ള റിപ്പോര്‍ട്ടുകളായിരുന്നു കഴിഞ്ഞ ദിവസം മുതല്‍ പ്രചരിച്ചത്. അത് ശരിയല്ലെന്നും വ്യാജ വാര്‍ത്തയാണ് സമൂഹ മാധ്യമങ്ങളിലൂടെ പ്രചരിക്കുന്നതെന്നും വ്യക്തമാക്കി എത്തിയിരിക്കുകയാണ് താരം ഇപ്പോള്‍. ഇന്‍സ്റ്റഗ്രാം സ്‌റ്റോറിയിലൂടെയായിരുന്നു താരം ഇതേക്കുറിച്ച് പ്രതികരിച്ചത്. മേഘ്‌നയുടെ മകനാണെന്ന തരത്തിലുള്ള വീഡിയോയും പ്രചരിച്ചിരുന്നു. യാഥാര്‍ത്ഥ്യം വ്യക്തമാക്കി താരമെത്തിയതോടെ ആരാധകരും ആശ്വാസത്തിലാണ്.