ഇങ്ങനെയായിരുന്നു എല്ലാത്തിന്റെയും തുടക്കം! ആദ്യ സിനിമയുടെ ഓര്‍മ്മകളില്‍ മിഥുന്‍ മാനുവല്‍ തോമസ്‌

നിവിന്‍ പോളി നായകവേഷത്തില്‍ എത്തിയ ചിത്രം ജൂഡ് ആന്റണി ജോസഫാണ് സംവിധാനം ചെയ്തത്. നസ്രിയ നായികയായി എത്തിയ ചിത്രം തിയ്യേറ്ററുകളില്‍ വലിയ വിജയമാവുകയും ചെയ്തിരുന്നു. ഓം ശാന്തി ഓശാന ഷൂട്ടിംഗ് സമയത്തെ ഒരു ചിത്രം കഴിഞ്ഞ ദിവസം മിഥുന്‍ മാനുവല്‍ തോമസ് പങ്കുവെച്ചിരുന്നു.

സിനിമാ ജീവിത്തിലേക്കുളള ഓപചാരിക പ്രവേശനത്തിന്റെ ചിത്രമാണ് സംവിധായകന്‍ ഫേസ്ബുക്ക് പേജില്‍ പോസ്റ്റ് ചെയ്തിരിക്കുന്നത്. "ഇങ്ങനെയായിരുന്നു സിനിമാ ജീവിതത്തിലേക്കുള്ള ഔപചാരിക പ്രവേശനം - 'ഓം ശാന്തി ഓശാന' പൂജ 2013 ആഗസ്ത് .. നൊസ്റ്റു ഫോട്ടോ എന്ന് കുറിച്ചുകൊണ്ടാണ് മിഥുന്‍ മാനുവല്‍ പഴയകാല ചിത്രം പങ്കുവെച്ചിരിക്കുന്നത്.

ചിത്രത്തില്‍ സംവിധായകന്‍ ജോഷി, നിവിന്‍ പോളി, ജൂഡ് ആന്റണി ജോസഫ് തുടങ്ങിയവര്‍ക്കൊപ്പമാണ് മിഥുന്‍ മാനുവലും ഉളളത്. സംവിധായകന്റെ പുതിയ ചിത്രം ആരാധകര്‍ ഒന്നടങ്കം സോഷ്യല്‍ മീഡിയയില്‍ ഏറ്റെടുത്തിരുന്നു. നിരവധി പേരാണ് ചിത്രത്തിന് താഴെ കമന്റുകളുമായി എത്തിയിരിക്കുന്നത്. 2014ലാണ് മിഥുന്‍ മാനുവല്‍-ജൂഡ് ആന്റണി കൂട്ടുകെട്ടില്‍ ഓം ശാന്തി ഓശാന പുറത്തിറങ്ങിയത്.

സിനിമ തിയ്യേറ്ററുകളില്‍ സര്‍പ്രൈസ് ഹിറ്റായി മാറുകയും ചെയ്തിരുന്നു. നിവിന്‍ പോളിയും നസ്രിയയും ആദ്യമായി ഒന്നിച്ചഭിനയിച്ച ചിത്രം കൂടിയായിരുന്നു ഓം ശാന്തി ഓശാന. പിന്നാലെ 2015ലാണ് ആടിന്റെ ആദ്യ ഭാഗവുമായി മിഥുന്‍ മാനുവല്‍ തോമസ് എത്തിയത്. സിനിമ തിയ്യേറ്ററുകളില്‍ വിജയമായില്ലെങ്കിലും പിന്നീട് ഡിവിഡി ഇറങ്ങിയ സമയത്ത് പ്രേക്ഷകര്‍ ഏറ്റെടുത്തിരുന്നു.

ആടിന് പിന്നാലെയാണ് ആന്‍മരിയ കലിപ്പിലാണ്, അലമാര, ആട് 2, അര്‍ജന്റീന ഫാന്‍സ് കാട്ടൂര്‍കടവ് തുടങ്ങിയ സിനിമകള്‍ സംവിധായകന്റെതായി പുറത്തിറങ്ങിയത്.. അര്‍ജന്റീന ഫാന്‍സ് കാട്ടുര്‍കടവ് പരാജമായതിന് പിന്നാലെയാണ് അഞ്ചാം പാതിരയെന്ന ചിത്രം മിഥുന്‍ മാനുവലിന്റെതായി വലിയ വിജയം നേടിയത്. ഈ വര്‍ഷത്തെ ആദ്യ ബ്ലോക്ക്ബസ്റ്റര്‍ ചിത്രം കൂടിയായിരുന്നു അഞ്ചാം പാതിര.