മരണമാസായി നിവിന്‍ പോളി! ബോക്‌സോഫീസ് തകര്‍ക്കാന്‍ പറ്റിയോ?മിഖായേലിന്റെ കളക്ഷന്‍ റിപ്പോര്‍ട്ട് പുറത്ത്

മിഖായേല്‍

2019 ല്‍ റിലീസ് ചെയ്യുന്ന നിവിന്‍ പോളിയുടെ ആദ്യ സിനിമയാണ് മിഖായേല്‍. നൂറ് കോടി ക്ലബ്ബിലെത്തിയ കായംകുളം കൊച്ചുണ്ണിയ്ക്ക് പിന്നാലെ എത്തിയതിനാല്‍ മിഖായേലിനെ കുറിച്ച് വലിയ ആകാംഷയായിരുന്നു. റിലീസിന് മുന്‍പ് സിനിമയില്‍ നിന്നും പുറത്ത് വന്ന ക്യാരക്ടര്‍ പോസ്റ്ററുകളും ടീസറും ട്രെയിലറുമെല്ലാം പ്രതീക്ഷ വര്‍ദ്ധിപ്പിച്ചു. നിവിന്‍ പോളി സ്‌റ്റൈലിഷ് ലുക്കിലെത്തിയ സിനിമയ്ക്ക് മോശമില്ലാത്ത പ്രതികരണമാണ് തുടക്കത്തില്‍ ലഭിച്ചത്.

തുടക്കം മോശമാക്കിയില്ല

ബിഗ് റിലീസായി തന്നെയാണ് മിഖായേല്‍ എത്തിയത്. ആദ്യ ദിവസം കേരളത്തില്‍ 140 ഓളം സ്‌ക്രീനുകളിലായിരുന്നു ചിത്രം പ്രദര്‍ശനത്തിനെത്തിയത്. അതിനൊപ്പം തിരുവനന്തപുരം എറണാകുളം മള്‍ട്ടിപ്ലെക്‌സുകളിലും നല്ല സ്വീകരണമായിരുന്നു. റിലീസ് ദിവസം കൊച്ചിന്‍ മള്‍ട്ടിപ്ലെക്‌സില്‍ 12 ഷോയും തിരുവനന്തപുരം പ്ലെക്‌സില്‍ 17 ഷോ യുമായിരുന്നു മിഖായേലിന് ലഭിച്ചത്. ഈ പ്രദര്‍ശനങ്ങളില്‍ നിന്നുമായി മോശമില്ലാത്ത സാമ്പത്തിക വിജയം കരസ്ഥമാക്കാന്‍ സിനിമയ്ക്ക് കഴിഞ്ഞിട്ടുണ്ട്.

ആദ്യദിന കളക്ഷന്‍

കൊച്ചി മള്‍ട്ടിപ്ലെക്‌സില്‍ ശക്തമായ തുടക്കമായിരുന്നു മിഖായേലലിന് ലഭിച്ചത്. ഫോറം കേരള പുറത്ത് വിട്ട കണക്കുകള്‍ പ്രകാരം 87 ശതമാനം ഓക്യൂപന്‍സിയോടെ 4.36 ലക്ഷമാഅണ് സിനിമയ്ക്ക് ആദ്യദിവസം ലഭിച്ചത്. റിലീസ് ദിവസം 6 ഹൗസ് ഫുള്‍ ഷോ ആയിരുന്നു എന്നതാണ് ശ്രദ്ധേയം. തിരുവനന്തപുരം പ്ലെക്‌സിലെ കണക്കുകള്‍ നോക്കുകയാണെങ്കില്‍ 58.67 ശതമാനം ഒക്യൂപന്‍സിയോടെ 4.77 ലക്ഷമാണ് മിഖായേലിന് സ്വന്തമാക്കാന്‍ കഴിഞ്ഞത്.

രണ്ടാം ദിനം

മിഖായേലിന്റെ രണ്ടാം ദിനത്തില്‍ കൊച്ചിന്‍ മള്‍ട്ടിപ്ലെക്‌സില്‍ ഒരു ഷോ കൂടി അധികം ലഭിച്ചിരുന്നു. അതില്‍ നിന്നും 4.19 ലക്ഷം സ്വന്തമാക്കി ആദ്യ രണ്ട് ദിവസം കൊണ്ട് 8.54 ലക്ഷത്തിലെത്തി. അതേ സമയം തിരുവനന്തപുരം പ്ലെക്‌സില്‍ 4 ലക്ഷം നേടി 8.81 ലക്ഷത്തിലെത്തി. വരും ദിവസങ്ങളില്‍ ഇതിലും മികച്ച പ്രകടനം നടത്താന്‍ സിനിമയ്ക്ക് കഴിയുമെന്നാണ് ആരാധകരുടെ വിശ്വാസം. കേരള ബോക്‌സോഫീസിലും യുഎഇജിസിസി പോലെയുള്ള സെന്ററുകളില്‍ നിന്നുമുള്ള കണക്കുകള്‍ വരുന്നതോടെ സിനിമയുടെ വിജയം എത്രത്തോളമുണ്ടെന്ന് വ്യക്തമാവും.