ആരോഗ്യമുളള കാലത്തോളം നിങ്ങളെ രസിപ്പിക്കാനായി ഇവിടെയുണ്ടാകും! പ്രായമൊരു പ്രശ്‌നമല്ലെന്ന് മോഹന്‍ലാല്‍

സൂപ്പര്‍ താരത്തിന് ആദരമര്‍പ്പിച്ചുളള വീഡിയോകളും ചിത്രങ്ങളുമെല്ലാം തന്നെ ധാരാളമായി പുറത്തുവന്നിരുന്നു. പിറന്നാള്‍ ദിനം രാവിലെ മുതല്‍ മിക്ക ചാനലുകളിലും അഭിമുഖങ്ങളും കൊടുത്തിരുന്നു ലാലേട്ടന്‍. അവതാരകരുടെ ചോദ്യങ്ങള്‍ക്ക് അദ്ദേഹം നല്‍കിയ മറുപടിയെല്ലാം ശ്രദ്ധേയമായി മാറിയിരുന്നു. അറുപത് വയസ് തികഞ്ഞു, മടിയില്ലാതെ അത് ലോകത്തോട് വിളിച്ചുപറയുകയും ചെയ്യുന്നു എങ്ങനെ കാണുന്നു ഇതിനെ എന്നായിരുന്നു ഒരു ചോദ്യം.

ഇതിന് മറുപടിയായി സ്വതസിദ്ധമായ ശൈലിയിലാണ് നടന്‍ മറുപടി നല്‍കിയത്. എന്റെ അച്ഛനും ചേട്ടനുമൊക്കെ അറുപതു വയസായിരുന്നു. നിങ്ങള്‍ക്കും അറുപതാകും. അത് കൊണ്ട് അതൊരു വിഷയമല്ല. പ്രായം ഒരു പ്രശ്‌നമാണ് എന്ന് തോന്നുന്നില്ല. ആരോഗ്യം നന്നായിരിക്കുന്ന കാലത്തോളം അഭിനയിക്കാനും രസിപ്പിക്കാനും നൃത്തം ചെയ്യാനും ഒകെ സിനിമാ നാടക അഭിനയ രംഗത്ത് ഞാന്‍ ഉണ്ടാകും എന്നാണ് കരുതുന്നത്.

അവതാരകന്റെ ചോദ്യത്തിന് മറുപടിയായി മോഹന്‍ലാല്‍ പറഞ്ഞു. പിറന്നാള്‍ ദിനത്തില്‍ തനിക്ക് വേണ്ടി പ്രാര്‍ത്ഥിക്കുന്ന ഓരോരുത്തര്‍ക്കും നന്ദി പറഞ്ഞുകൊണ്ടായിരുന്നു ലാലേട്ടന്‍ സംഭാഷണം അവസാനിപ്പിച്ചത്. പിറന്നാള്‍ ദിനത്തില്‍ തന്റെ എറ്റവും പുതിയ ചിത്രമായ ദൃശ്യം 2വിന്റെ അനൗണ്‍സ്‌മെന്റ് ടീസറും സൂപ്പര്‍ താരം പുറത്തുവിട്ടിരുന്നു. മലയാളത്തില്‍ വമ്പന്‍ വിജയമായ ദൃശ്യത്തിന്റെ രണ്ടാം ഭാഗത്തിനായി വലിയ ആകാംക്ഷകളോടെയാണ് എല്ലാവരും കാത്തിരുന്നത്.

Recommended Video

#HappyBirthdayMohanlal

കാത്തിരിപ്പിനൊടുവിലാണ് സിനിമയുടെ പ്രഖ്യാപനം മോഹന്‍ലാലും സംവിധായകന്‍ ജീത്തു ജോസഫും ചേര്‍ന്ന് നടത്തിയത്. ദൃശ്യം 2വിന്റെ കഥ കേട്ടെന്നും നല്ലൊരു ചിത്രമായിരിക്കും ഇതെന്നും മോഹന്‍ലാല്‍ പറഞ്ഞിരുന്നു. സംവിധായകന്‍ ജീത്തു ജോസഫും നിര്‍മ്മാതാവ് ആന്റണി പെരുമ്പാവൂം ഇതേ പ്രതീക്ഷകള്‍ തന്നെയാണ് പങ്കുവെച്ചത്. മോഹന്‍ലാലിന്റെ പിറന്നാളിന് ഫാന്‍സ് അസോസിയേഷന്‍ പ്രവര്‍ത്തകര്‍ നിരവധി പരിപാടികളും സംഘടിപ്പിച്ചിരുന്നു. അന്നദാന, രക്തദാനം, അവയവദാന സമ്മതപത്രം കൈമാറല്‍, ദുരിതമനുഭവിക്കുന്നവര്‍ക്കുളള സഹായം തുടങ്ങി നിരവധി പരിപാടികളാണ് ലാലേട്ടന്റെ പിറന്നാളിനോടനുബന്ധിച്ച് ആരാധകര്‍ നടത്തുന്നത്.