ഇത് തള്ളല്ല, ഒടിയന്റെ ഒടിവിദ്യയില്‍ ബോക്‌സോഫീസ് കുലുങ്ങി!റെക്കോര്‍ഡ് തകര്‍ത്ത് ലാലേട്ടന്‍!!

ഒടിയന്റെ ജൈത്രയാത്ര

പുലിമുരുകന് ശേഷം മോഹന്‍ലാല്‍ നായകനായി അഭിനയിച്ച ബിഗ് ബജറ്റ് ചിത്രമാണ് ഒടിയന്‍. ചിത്രീകരണം ആരംഭിച്ചത് മുതല്‍ സിനിമയെ കുറിച്ചുള്ള പ്രതീക്ഷകളായിരുന്നു. ഒടുവില്‍ ഡിസംബര്‍ പതിനാലിന് സിനിമ തിയറ്ററുകളിലേക്ക് എത്തി. റിലീസിനെത്തിയ ഒടിയന് മുന്നില്‍ പ്രതിസന്ധികളുടെ കൂമ്പാരമായിരുന്നു. ഹര്‍ത്താല്‍ വില്ലന്റെ വേഷത്തിലെത്തിയതോടെ അണിയറ പ്രവര്‍ത്തകരും ആരാധകരും ആശങ്കയിലായി. എന്നാല്‍ കേരളത്തില്‍ എല്ലായിടത്തും യാതൊരു കുഴപ്പവുമില്ലാതെ ഒടിയന്റെ പ്രദര്‍ശനം നടന്നിരുന്നു. നെഗറ്റീവ് റിവ്യൂസായിരുന്നു മറ്റൊരു പ്രതിസന്ധി. എന്നാല്‍ ഇതൊന്നും സിനിമയെ സാരമായി ബാധിച്ചിട്ടില്ലെന്നാണ് കളക്ഷന്‍ റിപ്പോര്‍ട്ടുകളില്‍ നിന്നും വ്യക്തമാവുന്നത്.

കേരളത്തിലെ പ്രദര്‍ശനം

റിലീസ് ദിവസം കേരളത്തില്‍ വലിയ തിരക്കായിരുന്നു ഒടിയന് ലഭിച്ചത്. മുന്‍കൂട്ടിയുള്ള ബുക്കിംഗ് അടക്കം ടിക്കറ്റുകളെല്ലാം ചൂടപ്പം പോലെയാണ് വിറ്റ് പോയത്. ആഗോളതലത്തില്‍ ആദ്യദിനം 32.5 കോടി രൂപ സ്വന്തമാക്കിയെന്നാണ് സംവിധായകന്‍ ശ്രീകുമാര്‍ മേനോന്‍ വ്യക്തമാക്കിയത്. 11.5 കോടിയാണ് കേരളത്തില്‍ നിന്ന് മാത്രം കളക്ട് ചെയ്തത്. മറ്റ് ഇന്ത്യന്‍ സെന്ററുകളില്‍ നിന്നും 5 കോടിക്കടുത്ത് സ്വന്തമാക്കിയെന്നും യുഎഇ/ജിസിസി മേഖലകളില്‍ നിന്നും 7 കോടി, ആഗോള സെന്ററുകളില്‍ നിന്നും 11 കോടി രൂപയും സ്വന്തമാക്കിയെന്നാണ് ശ്രീകുമാര്‍ മേനോന്‍ ഏഷ്യാനെറ്റ് ന്യൂസിന്റെ ചര്‍ച്ചയില്‍ പങ്കെടുക്കവേ വെളിപ്പെടുത്തിയത്.

കോടികള്‍ പെട്ടിയില്‍

റിലീസ് ദിവസം മുപ്പത് കോടിയ്ക്ക് മുകളില്‍ സ്വന്തമാക്കിയ ഒടിയന്‍ പിന്നീടുള്ള ദിവസങ്ങളിലും വിപ്ലവം സൃഷ്ടിച്ച് കൊണ്ടിരിക്കുകയാണ്. മൂന്ന് ദിവസങ്ങള്‍ക്കുള്ളില്‍ അറുപത് കോടിയാണ് ഒടിയന്‍ വാരിക്കൂട്ടിയിരിക്കുന്നത്. ഒടിയന്റെ ഔദ്യോഗിക പേജിലൂടെയായിരുന്നു കണക്ക് വിവരങ്ങള്‍ പുറത്ത് വിട്ടത്. മലയാളത്തില്‍ നിന്നും ഏറ്റവും വേഗത്തില്‍ 50 കോടി ക്ലബ്ബിലെത്തിയ ചിത്രമെന്ന റെക്കോര്‍ഡും സിനിമ നേടി. കേരളത്തില്‍ മാത്രമല്ല തെലുങ്കിലും തമിഴിലുമെല്ലാം ഒടിയന്‍ പുതിയ ചരിത്രം സൃഷ്ടിച്ച് കൊണ്ടിരിക്കുകയാണ്.

കാര്‍ണിവല്‍ സിനിമാസില്‍

നാല് ദിവസം കൊണ്ട് കാര്‍ണിവല്‍ സിനിമാസില്‍ നിന്നും ഒരു കോടിയ്ക്ക് മുകളിലാണ് സിനിമ സ്വന്തമാക്കിയിരിക്കുന്നത്. ഇപ്പോഴും 101 ഓളം ഷോ ലഭിക്കുന്ന സിനിമ 1.25 കോടിയാണ് ഇവിടങ്ങളില്‍ നിന്നും കളക്ട് ചെയ്തിരിക്കുന്നത്. അതേ സമയം കൊച്ചിന്‍ മള്‍ട്ടിപ്ലെക്‌സില്‍ വളരെ പതുക്കെയാണ് സിനിമയുടെ ഓട്ടം. ഇതിനകം 55.65 ലക്ഷമാണ് സിനിമ നേടിയിരിക്കുന്നത്.