Odiyan: മോഹന്‍ലാലിന് മാത്രമല്ല മഞ്ജു വാര്യര്‍ക്കും ഗംഭീര മേക്കോവര്‍, ലൊക്കേഷന്‍ ചിത്രങ്ങള്‍ വൈറല്‍!

ഒടിയനിലെ പ്രഭ

പ്രഭ എന്ന കഥാപാത്രമായാണ് മഞ്ജു വാര്യര്‍ ഒടിയനിലെത്തുന്നത്. മലയാള സിനിമയിലെ മികച്ച സ്ത്രീ കഥാപാത്രങ്ങളിലൊന്നായി പ്രഭ മാറുമെന്നായിരുന്നു താരം നേരത്തെ വ്യക്തമാക്കിയിരുന്നു. സാജിദ് യാഹിയ സംവിധാനം ചെയ്യുന്ന മോഹന്‍ലാല്‍ എന്ന സിനിമയിലും ഒടിയനിലുമായാണ് താരം ഇപ്പോള്‍ അഭിനയിക്കുന്നത്. പാലക്കാട് തേന്‍കുറിശ്ശിയില്‍ വെച്ച് സിനിമയുടെ അവസാനഘട്ട ചിത്രീകരണം പുരോഗമിക്കുകയാണ്. പ്രകാശ് രാജും മഞ്ജു വാര്യരുമുള്‍പ്പടെയുള്ള സുപ്രധാന രംഗങ്ങളാണ് ഇപ്പോള്‍ ചിത്രീകരിക്കുന്നത്. 70 ദിവസത്തോളം നീണ്ടുനില്‍ക്കുന്ന ചിത്രീകരണമാണ് നടത്തുന്നതെന്ന് അണിയറപ്രവര്‍ത്തകര്‍ വ്യക്തമാക്കിയിരുന്നു.

നിക് ഉട്ടിന്റെ സന്ദര്‍ശനം

ലോകപ്രശസ്ത ഫോട്ടോഗ്രാഫറായ നിക് ഉട്ട് കേരള സന്ദര്‍ശനത്തിനെത്തിയപ്പോള്‍ ഒടിയന്റെ ലൊക്കേഷനിലെത്തി മോഹന്‍ലാലിനെ സന്ദര്‍ശിച്ചിരുന്നു. നിക് ഉട്ടിന്റെ സന്ദര്‍ശനവേളയിലെ ചിത്രങ്ങള്‍ സോഷ്യല്‍ മീഡിയയിലൂടെ വൈറലായിരുന്നു. അങ്ങനെയാണ് മോഹന്‍ലാലിന്റെ പുതിയ ലുക്കിലുള്ള ഫോട്ടോ പുറത്തായത്. നിക് ഉട്ടിന്റെ സന്ദര്‍ശനത്തിനിടയിലെ കൂടുതല്‍ ചിത്രങ്ങള്‍ ഇപ്പോള്‍ പുറത്തുവന്നിട്ടുണ്ട്. ഒടിയനെക്കാണാനെത്തിയ നിക് ഉട്ടിനെ സ്വീകരിക്കുന്ന മഞ്ജു വാര്യരുടെ ചിത്രമാണിത്. സോഷ്യല്‍ മീഡിയയിലുടെ പ്രചരിക്കുന്ന ചിത്രങ്ങളിലൊന്നാണിത്.

പ്രഭയുടെ ഗെറ്റപ്പ്

ഒടിയന്‍ മാണിക്യനോളം പോന്ന കഥാപാത്രമാണ് പ്രഭ. മോഹന്‍ലാലിനും പ്രകാശ് രാജിനുമൊപ്പം പിടിച്ചുനില്‍ക്കുന്ന കഥാപാത്രമാണ് തന്റെയുമെന്ന് താരം വ്യക്തമാക്കിയിരുന്നു. ശരീരഭാരം കുറച്ച് യൗവനാവസ്ഥയിലുള്ള മോഹന്‍ലാലിനൊപ്പമുള്ള പ്രഭയുടെ രൂപവും ഏറെ വ്യത്യസ്തമാണ്. മെലിഞ്ഞ രൂപവുമായി നാടന്‍ ഗെറ്റപ്പിലുള്ള മഞ്ജു വാര്യരുടെ ചിത്രവും പുറത്തുവന്നിട്ടുണ്ട്. നിക് ഉട്ടിന്റെ ഫേസ്ബുക്ക് പേജിലൂടെയാണ് ഒടിയന്‍ ലൊക്കേഷനിലെ കൂടുതല്‍ ചിത്രങ്ങള്‍ പുറത്തുവന്നത്.