ചരിത്രം തിരുത്തികുറിക്കാന്‍ ഒടിയന്റെ വരവ്! ലോകമെമ്പാടുമായി 4000 സ്‌ക്രീനുകളില്‍ റിലീസ്!

ഒടിയന്‍ എത്താറായി

ഫാന്റസി ത്രില്ലര്‍ ഗണത്തില്‍പ്പെടുന്ന ഒരു ചിത്രമായിട്ടാണ് സംവിധായകന്‍ വിഎ ശ്രീകുമാര്‍ മേനോന്‍ ഒടിയന്‍ ഒരുക്കിയിരിക്കുന്നത്. ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മ്മിച്ച ചിത്രത്തിനായി ഹരികൃഷ്ണനാണ് തിരക്കഥയൊരുക്കിയിരുന്നത്. പുലിമുരുകന് ശേഷമുളള ലാലേട്ടന്റെ വമ്പന്‍ ചിത്രമായാണ് ഒടിയന്‍ എത്തുന്നത്. ചിത്രത്തിലെ ഒടിയന്‍ മാണിക്യന്‍ എന്ന കഥാപാത്രത്തിനായി അദ്ദേഹം നടത്തിയ സമര്‍പ്പണം എല്ലാവരും കണ്ടതാണ്. ഒടിയനില്‍ മൂന്ന് വ്യത്യസ്ത ഗെറ്റപ്പുകളിലാണ് ലാലേട്ടന്‍ എത്തുന്നതെന്നാണ് അറിയുന്നത്. ബിഗ് ബഡ്ജറ്റില്‍ ഒരുങ്ങുന്ന ചിത്രത്തിലെ ലാലേട്ടന്റെ പ്രകടനത്തിനായുളള കാത്തിരിപ്പിലാണ് എല്ലാവരുമുളളത്

ചരിത്ര റിലീസ്

കേരളത്തിലെ തൊണ്ണൂറു ശതമാനം തിയ്യേറ്ററുകളിലും ഒടിയന്‍ പ്രദര്‍ശനത്തിനെത്തുമെന്ന് നേരത്തെ റിപ്പോര്‍ട്ടുകള്‍ വന്നിരുന്നു. ഇതിനോടകം അഞ്ഞൂറോളം സ്‌ക്രീനുകളില്‍ ഒടിയന്‍ കേരളത്തില്‍ ചാര്‍ട്ട് ചെയ്തു കഴിഞ്ഞതായും റിപ്പോര്‍ട്ട് വന്നിരുന്നു. നിലവില്‍ കായംകുളം കൊച്ചുണ്ണിയാണ് മലയാളത്തില്‍ എറ്റവും കൂടുതല്‍ സ്‌ക്രീനുകളില്‍ റിലീസ് ചെയ്ത ചിത്രം. ഇതിനെ മറികടന്നുകൊണ്ടായിരിക്കും ലാലേട്ടന്റെ ഒടിയന്‍ പ്രദര്‍ശനത്തിന് എത്തുക. ലോകമെമ്പാടുമുളള തിയ്യേറ്ററുകളിലും ഒരേദിവസമായിരിക്കും ചിത്രം പ്രദര്‍ശനത്തിനെത്തുക.

4000 സ്‌ക്രീനുകളില്‍

ലോകമെമ്പാടുമായി 3000-4000 സ്‌ക്രീനുകള്‍ക്കടുത്ത് ചിത്രം പ്രദര്‍ശനത്തിനെത്തുമെന്നും റിപ്പോര്‍ട്ടുകള്‍ വന്നിരുന്നു. സംവിധായകന്‍ വിഎ ശ്രീകുമാര്‍ മേനോന്‍ തന്നെയായിരുന്നു ചിത്രത്തിന്റെ റിലീസ് സംബന്ധിച്ച സൂചനകള്‍ നല്‍കിയിരുന്നത്. യുഎസ്,യുകെ,ജപ്പാന്‍,ആസ്‌ട്രേലിയ,പോളണ്ട്, ന്യൂസിലന്‍ഡ് തുടങ്ങിയ രാജ്യങ്ങളിലെല്ലാം ഒടിയന്റെ റിലീസുണ്ടാവുമെന്നും റിപ്പോര്‍ട്ടുകള്‍ വന്നിരുന്നു. ചിത്രത്തിന്റെ തെലുങ്ക് പതിപ്പും ഒരേസമയം ആയിരിക്കും പ്രദര്‍ശനത്തിന് എത്തുക.

പ്രൊമോഷന്‍ പരിപാടികള്‍

റിലീസിങ്ങിനൊരുങ്ങുന്നതിനിടെ ചിത്രത്തിന്റെ പ്രൊമോഷന്‍ പരിപാടികള്‍ തകൃതിയില്‍ നടക്കുകയാണ്. കേരളത്തിലെ ഒട്ടുമിക്ക തിയ്യേറ്ററുകളിലും ഒടിയന്റെ പോസ്റ്ററുകളും പ്രതിമകളും സ്ഥാപിച്ചാണ് അണിയറക്കാര്‍ പ്രചാരണ പരിപാടികള്‍ തുടങ്ങിയിരിക്കുന്നത്. ഒടിയന്‍ പ്രതിമയ്ക്കാപ്പമുളള ആരാധകരുടെ സെല്‍ഫികള്‍ നേരത്തെ സോഷ്യല്‍ മീഡിയയില്‍ വൈറലായി മാറിയിരുന്നു. ഒടിയന്റെ വരവ് ആഘോഷമാക്കാനുളള തയ്യാറെടുപ്പുകളിലാണ് ആരാധകര്‍ ശ്രമിക്കുന്നത്.

വമ്പന്‍ താരനിര

ലാലേട്ടനൊപ്പം വമ്പന്‍ താരനിരയാണ് ചിത്രത്തില്‍ അണിനിരക്കുന്നത്. പ്രകാശ് രാജ്, മഞ്ജു വാര്യര്‍, സിദ്ധിഖ്, ഇന്നസെന്റ്,നരേന്‍,നന്ദു,കൈലാസ്,സന അല്‍ത്താഫ് തുടങ്ങിയവരാണ് ചിത്രത്തില്‍ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തില്‍ പീറ്റര്‍ ഹെയ്ന്റെ സംഘടന രംഗങ്ങളും മുഖ്യ ആകര്‍ഷണമായിരിക്കും. എം ജയചന്ദ്രനാണ് ചിത്രത്തിന് സംഗീതമൊരുക്കിയിരിക്കുന്നത്.