പ്രിയ വാര്യര്‍ക്കെതിരെ കേസുമായി ഒരു കൂട്ടര്‍! പ്രശസ്തി മുതലാക്കാന്‍ ഇതിലും നല്ല വഴി വേറെയില്ല...

മതവികാരം വൃണപ്പെടുത്തിയോ?

ഒരു അഡാറ് ലവിലെ മാണിക്യ മലരായ പൂവി എന്ന് തുടങ്ങുന്ന പാട്ടിനെതിരെ കേസ് വന്നിരിക്കുകയാണ്. മതവികാരം വൃണപ്പെടുത്തി എന്ന ആരോപണവുമായി ഹൈദരബാദില്‍ നിന്നും ഒരു കൂട്ടം മുസ്ലീം യുവാക്കളാണ് രംഗത്തെത്തിയിരിക്കുന്നത്.

വീഡിയോ ഇല്ല

ഹൈദരബാദ് പോലീസാണ് ഇക്കാര്യം വ്യക്തമാക്കിയിരിക്കുന്നത്. എന്നാല്‍ പരാതിയുമായി ആളുകള്‍ വന്നെങ്കിലും ഇവര്‍ ഗാനത്തിന്റെ വീഡിയോ ഇനിയും ഹാജരാക്കിയിട്ടില്ല. ഇതിനാല്‍ പരാതിയുടെ അടിസ്ഥാനത്തില്‍ എഫ്‌ഐആര്‍ രജിസ്റ്റര്‍ ചെയ്തിട്ടില്ലെന്നും പോലീസ് പറയുന്നു.

ഒന്നിലേറെ തവണ വിവാദം

മാണിക്യ മലരായ പൂവി എന്ന് തുടങ്ങുന്ന പാട്ട് ഒന്നിലധികം തവണ വിവാദമായ ഒരു പാട്ടാണ്. 1978 ല്‍ പിഎംഎ ജബ്ബാര്‍ എഴുതിയ പാട്ട് തലശ്ശേരി സ്വദേശിയായ റഫീക്ക് ആയിരുന്നു ആകാശവാണിയിലാണ് പാട്ട് ആദ്യമായി പാടിയിരുന്നത്. ഒരു കല്യാണ വേളയില്‍ പാട്ടിന്റെ പകര്‍പ്പകവകാശം മൂസ്സ എരഞ്ഞോളി റഫീക്കില്‍ നിന്നും എഴുതി വാങ്ങിയിരുന്നതായും റിപ്പോര്‍ട്ടുകളുണ്ട്. മൂസ്സാക്കയുടെ ശബ്ദത്തില്‍ അന്നേ ആ പാട്ട് ഹിറ്റായിരുന്നു.

വീണ്ടും ഹിറ്റ്

വര്‍ഷങ്ങള്‍ക്ക് ശേഷം ഒമര്‍ ലുലുവിന്റെ ഒരു അഡാറ് ലവിലൂടെ പാട്ട് വീണ്ടും പുനാരവിഷ്‌കരിച്ചപ്പോളാണ് കേസ് വന്നിരിക്കുന്നത്. പാട്ട് ഇംഗ്ലീഷിലേക്ക് മൊഴിമാറ്റുമ്പോള്‍ അത് നബിയെ അധിക്ഷേപിക്കുന്നതാണെന്നാണ് യുവാക്കളുടെ പരാതിയില്‍ പറയുന്നത്.

പ്രശസ്തിയിലേക്ക്

വര്‍ഷങ്ങളായി മുസ്ലീം സമുദായത്തിനുള്ളില്‍ അറിയുന്ന പാട്ടാണ് മാണിക്യ മലരായ പൂവി. എന്നാല്‍ ഇന്ന് ലോകം മുഴുവന്‍ വൈറലായി കൊണ്ടിരിക്കുന്ന പാട്ടിനെതിരെ കേസുമായി വരാന്‍ കാരണം ചുളുവില്‍ പ്രശസ്തിയിലേക്ക് എത്താം എന്ന ആഗ്രഹത്തോടെയാണെന്നാണ് സോഷ്യല്‍ മീഡിയയിലൂടെ സിനിമാ പ്രേമികള്‍ പറയുന്നത്.

പിന്നണിയിലുള്ളവർ

ഒരു അഡാറ് ലവിന് വേണ്ടി മാണിക്യ മലരായ പൂവിയ്ക്ക് വീണ്ടും സംഗീതം പകർന്നത് ഷാന്‍ റഹ്മാനാണ്. ശേഷം വിനീത് ശ്രീനിവാസന്‍ ആലപിച്ച പാട്ട് ഒരു കോടിയലധികം വ്യൂസാണ് യൂട്യൂബിലൂടെ നേടിയിരിക്കുന്നത്. പാട്ട് ഹിറ്റായതിന് പിന്നാലെ ടീസറും വന്നിരുന്നു.