റിലീസിനു മുമ്പേ ക്യാമ്പസ് കീഴടക്കാന്‍ ഒരു മെക്‌സിക്കന്‍ അപാരത!!! പുതിയ പ്രചരണ തന്ത്രങ്ങള്‍

വാഹന പ്രചരണ ജാഥയ്ക്ക് തുടക്കം കുറിച്ചത് യൂണിവേഴ്‌സിറ്റി കോളേജില്‍ നിന്നുമാണ്. ടിവി രാജേഷ് എംഎല്‍എയാണ് പ്രചരണ വാഹനത്തിന്റെ ആദ്യ യാത്ര ഉദ്ഘാടനം ചെയ്തത്. ചിത്രത്തിന്റെ സംവിധായകന്‍ ടോം ഇമ്മട്ടി, നിര്‍മാതാവ് അനൂപ് കണ്ണന്‍, വില്ലനായി അഭിനയിക്കുന്ന രൂപേഷ് പീതാംബരന്‍ എന്നിവര്‍ ചടങ്ങില്‍ എത്തിയിരുന്നു.

റിലീസിന് മുമ്പേ ക്യാമ്പസില്‍ ചിത്രത്തിന് ലഭിച്ച സ്വീകാര്യതയാണ് ഇത്തരത്തിലൊരു ആശയത്തിന് രൂപം നല്‍കാന്‍ കാരണമെന്ന് നിര്‍മാതാവ് അനൂപ് കണ്ണന്‍ പറഞ്ഞു. ചിത്രത്തിന്റെ പോസ്റ്ററുകള്‍ പതിച്ച രണ്ട് കാറുകളാണ് പ്രചരണത്തിനായി തയാറാക്കിയിരിക്കുന്നത്. തിരുവനന്തപുരം മുതല്‍ കാസര്‍ഗോഡ് വരെയുള്ള ക്യാമ്പസുകളില്‍ ഈ വാഹനമെത്തും.

കലാലയ രാഷ്ട്രീയത്തിന്റെ കഥപറയുന്ന ചിത്രമാണ് ഒരു മെക്‌സിക്കന്‍ അപാരത. എഴുപതുകളുടെ പശ്ചാത്തലത്തിലാണ് കഥപറയുന്നത്. ടൊവിനോ, നീരജ്, രൂപേഷ് പീതാംബരന്‍, ഗായത്രി സുരേഷ് എന്നിവര്‍ പ്രധാന വേഷത്തിലെത്തുന്നു. സംവിധായകനായ അനൂപ് കണ്ണനാണ് ചിത്രത്തിന്റെ നിര്‍മാണം.

മാര്‍ച്ച് ആദ്യവാരം തിയറ്ററിലെത്തുന്ന ചിത്രത്തിന്റെ ട്രെയിലറും പാട്ടുകളും ഇതിനോടകം ഹിറ്റായിക്കഴിഞ്ഞു. പ്രേക്ഷകരില്‍ നിന്നും മികച്ച പ്രതികരണമാണ് ഇവയ്ക്ക് ലഭിച്ചുകൊണ്ടിരിക്കുന്നത്. ഏറ്റവും ഒടുവിലായി പുറത്തിറങ്ങിയ പ്രണയ ഗാനവും പ്രേക്ഷകര്‍ ഏറ്റെടുത്തുകഴിഞ്ഞു.