കുളിരോ രോമാഞ്ചമോ എന്താണെങ്കിലും എന്റെ ഫോട്ടോയില്‍ പണിതാല്‍ പണി കൊടുക്കും! ചുമ്മാ പറയുന്നതല്ല; പാര്‍വതി

തന്റെ ഫോട്ടോഷൂട്ടിലെ ചിത്രങ്ങള്‍ വളരെ മോശമായ രീതിയില്‍ പ്രചരിപ്പിച്ചവര്‍ക്കെതിരെ ഗുരുതര വിമര്‍ശനവുമായി എത്തിയിരിക്കുകയാണ് നടി പാര്‍വതി ആര്‍ കൃഷ്ണ. സിനിമയിലും മിനിസ്‌ക്രീനിലും ഒരുപോലെ സജീവമായ പാര്‍വതി ടെലിവിഷന്‍ അവതാരകയായും സജീവമാണ്. ഇതിനൊപ്പം ഇന്‍സ്റ്റാഗ്രാമിലൂടെ കിടിലന്‍ ഫോട്ടോഷൂട്ടും നടി ചെയ്യാറുണ്ട്.

വസ്ത്രധാരണവും ശരീരഭാഗങ്ങള്‍ ഫോക്കസ് ചെയ്യാതെയും അതീവ ശ്രദ്ധയോടെ ചെയ്യുന്ന തന്റെ ചിത്രങ്ങള്‍ വീഡിയോയില്‍ നിന്നും മുറിച്ചെടുത്ത് പ്രചരിപ്പിച്ചു എന്നാണ് നടി പറയുന്നത്. അങ്ങനെ ചെയ്തവര്‍ക്കുള്ള പണി കൊടുത്തെന്നും ബാക്കിയുള്ളവര്‍ക്ക് കൊടുക്കാന്‍ പോവുകയാണെന്നുമാണ് നടി പറഞ്ഞത്. ഇതിനെക്കുറിച്ച് ഇന്‍സ്റ്റാഗ്രാമിലൂടെ പങ്കുവെച്ച വീഡിയോയില്‍ പാര്‍വതി പറയുന്നത് ഇങ്ങനെയാണ്..

'വളരെ സീരിയസും അതുപോലെ വളരെയധികം വിഷമമുണ്ടാക്കിയതുമായ കാര്യം പറയാന്‍ വേണ്ടിയിട്ടാണ് ഈ വീഡിയോ ചെയ്യുന്നത്. ഞാന്‍ പൊതുവേ ഒരുപാട് ഫോട്ടോഷൂട്ട് ചെയ്യുന്ന ആളാണ്. കഴിഞ്ഞ ദിവസം ബീച്ചില്‍ നിന്നും ഫോട്ടോഷൂട്ട് ചെയ്ത് സമയത്ത് നേവലോ ക്ലീവേജോ ഒന്നും വരാതിരിക്കാന്‍ ഞാന്‍ ശ്രദ്ധിക്കുന്നുണ്ടായിരുന്നു.

അങ്ങനെ കാണിക്കുന്നതില്‍ ഞാന്‍ ഒട്ടും കംഫര്‍ട്ടബിള്‍ അല്ലാത്തതു കൊണ്ടാണ്. എന്റെ ഫോട്ടോഗ്രാഫറായ രേഷ്മ ഈ ഫോട്ടോഷൂട്ടിന്റെ ബിഹൈന്‍ഡ് ദ സീന്‍ യൂട്യൂബില്‍ അപ്ലോഡ് ചെയ്ത സമയത്ത് രോമാഞ്ചം മീഡിയ എന്ന് ഭയങ്കര പേരുള്ള ഒരു മീഡിയ, അതിലെ ഏതോ ഒരു വൈഡ് ഷോട്ടില്‍ എന്റെ നേവല്‍ കാണുന്നത് പോലെ ആകുന്നുണ്ടായിരുന്നു. ആ വൈഡ് ഷോട്ടില്‍ നിന്നും കഷ്ടപ്പെട്ട് സൂം ചെയ്ത് ഈ സീന്‍ കട്ട് ചെയ്ത് എടുത്തു.

എന്നിട്ട് രോമാഞ്ചം എന്ന പേരുള്ള മീഡിയ അവരുടെ ചാനലില്‍ പോസ്റ്റ് ചെയ്തു. വേറെയും ഒരുപാട് പേജുകളില്‍ ഇട്ടിട്ടുണ്ട്. ഇന്ന് അവരുടെ അക്കൗണ്ട് പൂട്ടിക്കാവുന്ന കാര്യങ്ങളൊക്കെ ഞാന്‍ ചെയ്തു. അതോടെ അവരുടെ അക്കൗണ്ടും പോയി. ആരും ഇതിനൊക്കെ പ്രതികരിക്കാത്തത് കൊണ്ടാവും.

എന്റെ ഫോട്ടോ ആവശ്യമില്ലാത്ത മ്യൂസിക് ഒക്കെ കേറ്റി ഇടുന്നത് എനിക്കിഷ്ടമല്ല. ആരുടെയൊക്കെ അക്കൗണ്ടില്‍ അത് വരുമോ അതൊക്കെ പോകാനുള്ളത് ഞാന്‍ ചെയ്യും. ആവശ്യമില്ലാതെ എന്റെ അടുത്ത് കൊഞ്ചനോ കുഴയാനോ വരാന്‍ താല്‍പര്യമുണ്ടെങ്കില്‍ എന്റെ വായില്‍ ഇരിക്കുന്ന പച്ചതെറി കേള്‍ക്കും. ബാക്കിയുള്ളവര്‍ ആരും റിയാക്ട് ചെയ്യാത്തത് എന്താണെന്ന് എനിക്കറിയില്ല. എന്റെ ഒരു വീഡിയോ ഫോട്ടോയോ ആവശ്യമില്ലാത്ത രീതിയില്‍ ഇടുകയോ, അതില്‍ കിടന്നു പണിയുകയോ ചെയ്താല്‍ നല്ല പണി വാങ്ങിക്കും.

ഇത് ഭീഷണി ഒന്നുമല്ല, എന്റെ വ്യക്തിസ്വാതന്ത്ര്യം വെച്ച് പറഞ്ഞതാണ്. ഇതിനെതിരെ ലീഗലായി ഞാന്‍ നീങ്ങിയിരിക്കും. നിയമപരമായി മുന്നോട്ടു പോകുമെന്ന് എല്ലാവരും വന്ന് വെറുതെ പറയുന്നതുപോലെ പറഞ്ഞതല്ല. ഞാന്‍ പോയിരിക്കും. അങ്ങനെയാണ് ഇന്ന് അവന്റെ അക്കൗണ്ട് പോയത്. അതുപോലെ മറ്റുള്ളവരുടെ പേജും ഞാന്‍ കളയും. അതിലും നല്ലത് എന്ത് രോമാഞ്ചം ആണെങ്കിലും എത്ര കുളിര് കോരിപ്പിക്കുന്ന സാധനം ആണെങ്കിലും ശരി, ആവശ്യമില്ലാതെ എന്റെ സാധനങ്ങള്‍ ഇട്ടാല്‍ പണി കിട്ടും,' എന്നുമാണ് പാര്‍വതി പറയുന്നത്.