അച്ഛന്റെ മകന്‍ തന്നെ, ഡ്യൂപ്പിനെ ഉപയോഗിക്കാതെയാണ് പ്രണവിന്റെ ആക്ഷന്‍! ഹിന്ദി സിനിമ പോലെ ആയിരിക്കില്ല

ആദിയുടെ ആക്ഷന്‍

പ്രണവ് മോഹന്‍ലാല്‍ നായകനായി അഭിനയിക്കുന്ന ആദ്യ സിനിമ എന്ന ലേബലിലാണ് ജിത്തു ജോസഫിന്റെ ആദി എന്ന സിനിമ ഇത്രയധികം ശ്രദ്ധിക്കപ്പെട്ട് തുടങ്ങിയത്. ആക്ഷന് പ്രധാന്യം കൊടുത്ത് നിര്‍മ്മിക്കുന്ന സിനിമ ഞെട്ടിക്കാനുള്ള ഒരുക്കത്തിലാണ്.

ഡ്യൂപ്പ് പോലും ഇല്ലായിരുന്നു

ചിത്രത്തില്‍ ഡ്യൂപ്പിനെ പോലും ഉപയോഗിക്കാതെയായിരുന്നു പ്രണവിന്റെ ആക്ഷന്‍ രംഗങ്ങള്‍ ചിത്രീകരിച്ചിരുന്നത്. ചിത്രീകരണത്തിനിടെ പ്രണവിന് പരിക്കേല്‍ക്കുകയും ചെയ്തിരുന്നു. ചിത്രത്തിലെ ആക്ഷന്‍ രംഗങ്ങളെ കുറിച്ചുള്ള കൂടുതല്‍ കാര്യങ്ങള്‍ സംവിധായകന്‍ പറയുകയാണ്.

ആവര്‍ത്തനമല്ല

ഹിന്ദി, തമിഴ് സിനിമകളില്‍ കാണുന്നത് പോലെയുള്ള ഒരു ആക്ഷന്‍ സിനിമയല്ല ആദി. പ്രേക്ഷകര്‍ അത്തരത്തിലുള്ള സിനിമയായിരിക്കുമോ എന്ന തരത്തില്‍ ആശങ്കകളുണ്ടെന്നും എന്നാല്‍ കുറച്ച് ആക്ഷന്‍ സീനുകള്‍ ഉള്‍പ്പെടുത്തിയ ആദി ഒരു റിയലസ്റ്റിക് സിനിമയായിരിക്കുമെന്നുമാണ് ജിത്തു ജോസഫ് പറയുന്നത്.

പാര്‍ക്കര്‍ അഭ്യാസം

ഹോളിവുഡ് സിനിമകളില്‍ കൂടുതലായും കാണുന്ന പാര്‍ക്കര്‍ അഭ്യാസം ആദിയിലുമുണ്ട്. സിനിമയില്‍ അത്തരം രംഗങ്ങള്‍ ചിത്രീകരിക്കുന്നതിന് ഫ്രാന്‍സില്‍ നിന്നും ഡ്യൂപ്പിനെ ഉപയോഗിക്കാമെന്ന് പറഞ്ഞിരുന്നെങ്കിലും അത് താന്‍ തന്നെ ചെയ്യാമെന്ന് പറഞ്ഞ് പ്രണവ് മുന്നോട്ട് വരികയായിരുന്നു. അതിന് വേണ്ടി വിദേശത്ത് നിന്നും പ്രണവ് പാര്‍ക്കര്‍ പഠിക്കുകയും ചെയ്തിരുന്നു.

സിനിമയുടെ റിലീസ്

ചിത്രീകരണം പൂര്‍ത്തിയായ സിനിമയുടെ പോസ്റ്റ് പ്രൊഡക്ഷന്‍ വര്‍ക്കുകള്‍ പുരോഗമിച്ച് കൊണ്ടിരിക്കുകയാണ്. ആരാധകര്‍ വലിയ പ്രതീക്ഷയോടെ കാത്തിരിക്കുന്ന സിനിമ ജനുവരി 26 നാണ് റിലീസിനെത്തുന്നത്.