പൃഥ്വിരാജിനൊപ്പം ഐശ്യര്യ ലക്ഷ്മിയും മഡോണയും! ബ്രദേഴ്‌സ് ഡേയുടെ ഈദ് സ്‌പെഷ്യല്‍ കിടിലന്‍ പോസ്റ്റര്‍

ബ്രദേഴ്‌സ് ഡേ

ലൂസിഫറിന്റെ വിജയത്തിന് ശേഷം ഇത്തവണ ഒരു മാസ് എന്റര്‍ടെയ്‌നര്‍ ചിത്രവുമായിട്ടാണ് പൃഥ്വിരാജ് എത്തുന്നത്. കാറ്ററിംഗ് ജീവനക്കാരന്റെ റോളിലാണ് പൃഥ്വി എത്തുന്നതെന്ന് അറിയുന്നു. പക്ക എന്റര്‍ടെയ്‌നര്‍ ചിത്രമായിരിക്കും ബ്രദേഴ്‌സ് ഡേയെന്ന് സിനിമയുടെ അണിയറ പ്രവര്‍ത്തകര്‍ തന്നെ നേരത്തെ വ്യക്തമാക്കിയിരുന്നു. പ്രഖ്യാപന വേളമുതല്‍ മികച്ച സ്വീകാര്യത ലഭിച്ചുകൊണ്ടിരിക്കുന്ന ചിത്രം നിലവില്‍ അവസാന ഘട്ട ചിത്രീകരണ തിരക്കുകളിലാണുളളത്.

പൃഥ്വിക്കൊപ്പം ഐശ്വര്യയും മഡോണയും

ഐശ്വര്യ ലക്ഷ്മി,മഡോണ സെബാസ്റ്റിയന്‍ തുടങ്ങിയ നായികമാര്‍ പൃഥ്വിക്കൊപ്പം ആദ്യമായി ഒന്നിക്കുന്ന ചിത്രം കൂടിയാണ് ബ്രദേഴ്‌സ് ഡേ. ഈദിനോടനുബന്ധിച്ച് ഇവര്‍ മൂന്ന് പേരുടെയും കഥാപാത്രങ്ങളെ കാണിച്ചുകൊണ്ടുളള ഒരു പോസ്റ്ററായിരുന്നു അണിയറ പ്രവര്‍ത്തകര്‍ പുറത്തുവിട്ടിരുന്നത്. തീര്‍ത്തും കളര്‍ഫുളായ ഒരു പോസ്റ്റര്‍ തന്നെയാണ് ഇത്തവണയും സോഷ്യല്‍ മീഡിയയില്‍ ചിത്രത്തിന്റെതായി ഇറങ്ങിയിരിക്കുന്നത്.

ഷൂട്ടിംഗ് പുരോഗമിക്കുന്നു

ഐശ്വര്യ ലക്ഷ്മിക്കും മഡോണയ്ക്കും പുറമെ മിയ ജോര്‍ജ്ജ്, പ്രയാഗ മാര്‍ട്ടിന്‍,ഐമ റോസ്മി സെബാസ്റ്റിയന്‍ തുടങ്ങിയവരും ചിത്രത്തില്‍ നായികമാരായി എത്തുന്നുണ്ട്. വമ്പന്‍ താരനിര അണിനിരക്കുന്ന ഒരു ചിത്രവുമായിട്ടാണ് പൃഥ്വിരാജ് ഇത്തവണയും എത്തുന്നത്. ബ്രദേഴ്സ് ഡേയിലെ പൃഥ്വിയുടെതായി പുറത്തിറങ്ങിയ പുതിയ ഗെറ്റപ്പ് ചിത്രങ്ങളെല്ലാം വൈറലായി മാറിയിരുന്നു. താടി നീട്ടി നാടന്‍ കഥാപാത്രമായിട്ടാണ് ഇത്തവണ സൂപ്പര്‍താരം എത്തുന്നത്.

കലാഭവന്‍ ഷാജോണിന്റെ ചിത്രം

മലയാളത്തില്‍ സഹനടനായും വില്ലന്‍ വേഷങ്ങളിലൂടെയും തിളങ്ങിയ കലാഭവന്‍ ഷാജോണ്‍ ആദ്യമായി സംവിധാനം ചെയ്യുന്ന ചിത്രം കൂടിയാണ് ബ്രദേഴ്‌സ് ഡേ. ഹിറ്റ്ലറിലെ മമ്മൂട്ടി കഥാപാത്രത്തെ ഓര്‍മ്മിപ്പിക്കുന്ന തരത്തില്‍ മൂന്നോ നാലോ നായികമാരുടെ ഏക സഹോദരനായിട്ടാണ് ചിത്രത്തില്‍ പൃഥ്വി എത്തുന്നതെന്നാണ് വിവരം. തമിഴ് താരം പ്രസന്നയും ചിത്രത്തില്‍ പ്രധാന വേഷത്തില്‍ എത്തുന്നുണ്ട്.

ഓണത്തിനാണ്

ഓണത്തിനാണ് പൃഥ്വിയുടെ ബ്രദേഴ്‌സ് ഡേ തിയ്യേറ്ററുകളിലേക്ക് എത്തുകയെന്ന് അറിയുന്നു. നേരത്തെ സെപ്റ്റംബര്‍ ആറിന് ചിത്രം റിലീസ് ചെയ്യുമെന്ന് റിപ്പോര്‍ട്ടുകള്‍ വന്നിരുന്നു. ഒരു മാസ് എന്റര്‍ടെയ്‌നറിനു വേണ്ട എല്ലാവിധ ഘടകങ്ങളും ഉള്‍പ്പെടുത്തികൊണ്ടാണ് സംവിധായകന്‍ സിനിമ അണിയിച്ചൊരുക്കുന്നത്.