പൃഥ്വിരാജിന്റെ ഡ്രൈവിംഗ് ലൈസന്‍സ്! അടുത്ത സിനിമയ്ക്ക് തുടക്കം കുറച്ചതിനെ കുറിച്ച് സുപ്രിയ മേനോന്‍!

പൃഥ്വിയുടെ ഡ്രൈവിംഗ് ലൈസന്‍സ്

ഹണീ ബി 2 വിന് ശേഷം ജീന്‍ പോള്‍ ലാല്‍ സംവിധാനം ചെയ്യുന്ന പുതിയ സിനിമയാണ് ഡ്രൈവിംഗ് ലൈസന്‍സ്. പൃഥ്വിരാജ് നായകനായിട്ടെത്തുന്ന സിനിമയുടെ ഷൂട്ടിംഗ് ആരംഭിച്ചിരിക്കുകയാണ്. ഇന്ന് നടന്ന പൂജ ചടങ്ങിനെ കുറിച്ച് പൃഥ്വിരാജ് തന്നെയാണ് പറഞ്ഞിരിക്കുന്നത്. ലൊക്കേഷനില്‍ നിന്നും സംവിധായകനും മറ്റ് അണിയറ പ്രവര്‍ത്തകര്‍ക്കുമൊപ്പമുള്ള ചിത്രവും താരം ആരാധകര്‍ക്കായി പങ്കുവെച്ചു. സിനിമയുടെ ഷൂട്ടിംഗ് ആരംഭിച്ചതോടെ കൂടുതല്‍ കാര്യങ്ങള്‍ പുറത്ത് വരുമെന്നുള്ള പ്രതീക്ഷയിലാണ് ആരാധകര്‍.

നിര്‍മാണവും പൃഥ്വി തന്നെ

ഒരു ബിഗ് ബജറ്റില്‍ നിര്‍മ്മിക്കാന്‍ പദ്ധതിയിട്ടിരിക്കുന്ന ചിത്രമാണ് പൃഥ്വിയുടെ ഡ്രൈവിംഗ് ലൈസന്‍സ്്. നായകനാവുന്നതിനൊപ്പം പൃഥ്വിരാജ് തന്നെയാണ് ചിത്രം നിര്‍മ്മിക്കുന്നതും. കഴിഞ്ഞ വര്‍ഷം പൃഥ്വിരാജും ഭാര്യ സുപ്രിയ മേനോനും ചേര്‍ന്ന് ആരംഭിച്ച പുതിയ നിര്‍മാണ കമ്പനിയായ പൃഥ്വിരാജ് പ്രൊഡക്ഷന്‍സും മാജീക് ഫ്രെയിംസും ചേര്‍ന്നാണ് പുതിയ ചിത്രം നിര്‍മ്മിക്കുന്നത്. ഈ വര്‍ഷം റിലീസിനെത്തിയ 9 എന്ന സിനിമയായിരുന്നു ഈ കമ്പനിയു ബാനറില്‍ നിര്‍മ്മിച്ച ആദ്യ ചിത്രം.

മറ്റ് വിശേഷങ്ങള്‍

ജീന്‍ പോള്‍ ലാല്‍ സംവിധാനം ചെയ്യുമ്പോള്‍ സച്ചിയാണ് ഈ സിനിമയ്ക്ക് വേണ്ടി തിരക്കഥ ഒരുക്കുന്നത്. സുരാജ് വെഞ്ഞാറമൂടാണ് മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. സിനിമയിലെ നായികയോ മറ്റ് താരങ്ങളോ കുറിച്ചോ കൂടുതല്‍ വിവരങ്ങള്‍ ഇനിയും വന്നിട്ടില്ല. ഷൂട്ടിങ് തുടങ്ങിയിരിക്കുന്നതിനാല്‍ പിന്നാലെ തന്നെ എത്തുമെന്നാണ് കരുതുന്നത്. ഒരു കംപ്ലീറ്റ് എന്റര്‍ടെയിനര്‍ ചിത്രമാണെന്ന് സൂചിപ്പിച്ച് കൊണ്ടാണ് ഡ്രൈവിംഗ് ലൈസന്‍സ് എത്തുന്നത്. സുശിന്‍ ശ്യാം സംഗീതം പകരുന്നത്.

മറ്റ് സിനിമകള്‍

ഏറ്റെടുത്ത മറ്റ് സിനിമകള്‍ കൂടി ഈ വര്‍ഷം ചെയ്ത് തീര്‍ക്കാനുള്ള ശ്രമത്തിലാണ് പൃഥ്വിരാജ്. ആരാധകര്‍ വലിയ പ്രതീക്ഷയോടെ കാത്തിരിക്കുന്ന പൃഥ്വിരാജ് ചിത്രമാണ് ആട് ജീവിതം. ബെന്യാമിന്റെ ആട് ജീവിതം എന്ന നോവലിനെ ആസ്പദമാക്കി ബ്ലെസി സംവിധാനം ചെയ്യുന്ന സിനിമയുടെ ആദ്യ ഷെഡ്യൂള്‍ പൂര്‍ത്തിയാക്കിയിരുന്നു. മറ്റൊരു ബിഗ് ബജറ്റ് ചിത്രമായി ഒരുക്കുന്ന സിനിമയുടെ ബാക്കി ഷൂട്ടിങ് ഈ വര്‍ഷം തുടങ്ങുമെന്നാണ് കരുതുന്നത്. ജോലി തേടി ഗള്‍ഫിലെത്തുന്ന നജീവ് എന്ന യുവാവ് അറബിയുടെ ചതിക്കുഴിയില്‍ വീണ് രക്ഷപ്പെടാനുള്ള ശ്രമമാണ് സിനിമയിലൂടെ പറയുന്നത്.

അയ്യപ്പന്‍

കേരളത്തില്‍ ശബരിമസ സ്ത്രീ പ്രവേശന വിധിയെ ചൊല്ലി വിവാദങ്ങള്‍ തുടരുന്നതിനിടെയായിരുന്നു അയ്യപ്പന്‍ എന്ന പേരില്‍ സിനിമ പ്രഖ്യാപിച്ചത്. പൃഥ്വിരാജ് നായകനായിട്ടെത്തുന്ന ചിത്രം ശങ്കര്‍ രാമകൃഷ്ണനാണ് സംവിധാനം ചെയ്യുന്നത്. അടുത്ത വര്‍ഷം പകുതിയോടെയായിരിക്കും ഈ സിനിമയുടെ ചിത്രീകരണം ആരംഭിക്കുന്നത്. ടൈറ്റില്‍ പ്രഖ്യാപിച്ചതിനൊപ്പം സിനിമയുടെ ഫസ്റ്റ് ലുക്ക് പോസ്റ്ററും പുറത്ത് വന്നിരുന്നു. ആഗസ്റ്റ് സിനിമാസ് നിര്‍മ്മിക്കുന്ന ചിത്രമാണിത്. കാളിയന്‍ എന്ന ചിത്രമാണ് അതിന് ശേഷം വരാനുള്ളത്. ഈ തിരക്കുകളെല്ലാം ഒന്ന് അവസാനിച്ചതിന് ശേഷമായിരിക്കും ലൂസിഫറിന്റെ രണ്ടാം ഭാഗമായ എമ്പുരാന്റെ ഷൂട്ടിംഗ് ആരംഭിക്കുക.