ഹൗസ് ഫുള്‍ ആയി ഓടിയ പുലിമുരുകന് ആളില്ല; അപ്പോള്‍ 150 കോടി എന്ന സ്വപ്‌നം......?

വന്‍ ഇടിവ്

1000, 500 നോട്ടുകള്‍ പിന്‍വലിച്ചതിന് തൊട്ടുതലേദിവസം വരെ പുലിമുരുകന് കേരളത്തിലെമ്പാടും ഹൗസ്ഫുള്‍ പ്രദര്‍ശനങ്ങള്‍ ഉണ്ടായിരുന്നെങ്കില്‍ അപ്രതീക്ഷിത പ്രഖ്യാപനത്തോടെ തീയേറ്ററിലേക്ക് എത്തുന്നവരുടെ എണ്ണത്തില്‍ ഭീമമായ ഇടിവുണ്ടായി. 60-70 ശതമാനം കുറവാണ് പ്രേക്ഷകരുടെ എണ്ണത്തില്‍ കഴിഞ്ഞ ദിവസങ്ങളില്‍ ഉണ്ടായത്.

ഇനി 150 കോടി.. ?

100 കോടിക്ക് ശേഷവും ഹൗസ്ഫുള്‍ പ്രദര്‍ശനങ്ങള്‍ തുടര്‍ന്നിരുന്നതിനാല്‍ ചിത്രം 150 കോടിയിലേക്ക് പോലും അന്തിമകളക്ഷനില്‍ എത്തുമെന്ന് കരുതപ്പെട്ടിരുന്നു. എന്നാല്‍ ഈ പ്രതീക്ഷകളെല്ലാം ഇപ്പോള്‍ കൈയാലപ്പുറത്താണ്. 150 കോടി എന്ന സ്വപ്‌നം പുലിമുരുകന് ഇനി സാധ്യമാവുമെന്ന് തോന്നുന്നില്ലെന്ന് പറയുന്നു തീയേറ്റര്‍ ഉടമയും ഫിലിം എക്‌സിബിറ്റേഴ്‌സ് പ്രസിഡന്റുമായ ലിബര്‍ട്ടി ബഷീര്‍.

ബി ഉണ്ണികൃഷ്ണന്‍ പറയുന്നു

എന്നാല്‍ ഒരാഴ്ചയ്ക്കകം പ്രതിസന്ധി പരിഹരിക്കപ്പെട്ടാല്‍ ജനം തീയേറ്ററിലേക്ക് വീണ്ടും എത്തിയേക്കുമെന്ന് പ്രതീക്ഷ പുലര്‍ത്തുന്നു സംവിധായകനും തീയേറ്റര്‍ ഉടമയും ഫെഫ്ക സ്റ്റിയറിംഗ് കമ്മിറ്റി ചെയര്‍മാനുമായ ബി. ഉണ്ണികൃഷ്ണന്‍.

ലിബേര്‍ട്ടി ബഷീര്‍ പറയുന്നു

എടിഎമ്മില്‍ വൈകാതെ പണമെത്തിയാലേ കാര്യങ്ങള്‍ മുന്നോട്ട് പോകൂ. 100 കോടി പിന്നിട്ട ഒരു ചിത്രം ഹൗസ്ഫുള്‍ ഷോകളോടെ തീയേറ്ററുകളില്‍ തുടരുമ്പോള്‍ അത് 150 കോടി പിടിക്കുമെന്നായിരുന്നു ഞങ്ങളുടെയൊക്കെ പ്രതീക്ഷ. പക്ഷേ ഇപ്പോഴത്തെ ഈ പ്രതിസന്ധി വന്നതോടെ അതുണ്ടാവില്ല. പുലിമുരുകന്‍ 150 കോടി നേടില്ല.

മറ്റൊരു പ്രശ്‌നം

1000, 500 നോട്ടുകള്‍ പിന്‍വലിച്ചത് കൂടാതെ പുലിമുരുകന്റെ കളക്ഷനെ ബാധിക്കുന്ന മറ്റൊരു വിഷയം കൂടിയുണ്ട് എന്ന് ബഷീര്‍ പറയുന്നു. അത് പൈറസിയാണ്. പടം ഒരിക്കല്‍ കണ്ട് വീണ്ടും കാണാന്‍ ആഗ്രഹിക്കുന്നവര്‍ തീയേറ്ററിലേക്ക് വരുന്നതിന് തടസം സൃഷ്ടിക്കുന്നുണ്ട് പുലിമുരുകന്റെ വ്യാജന്‍. മറ്റ് തീയേറ്റര്‍ ഉടമകളുടെ അടുത്തുനിന്ന് ലഭിക്കുന്നതും ഇത്തരത്തിലുള്ള പ്രതികരണമാണ്. കേരളം മുഴുവന്‍ ഇതുതന്നെയാണ് സ്ഥിതി.